Igiciro cya lisansi i Kigali cyageze ku 1065 Frw

Yanditswe na Rabbi Malo Umucunguzi
Kuya 3 Gicurasi 2018 saa 06:50
Yasuwe :
0 0

Urwego Ngenzuramikorere (RURA) rwatangaje ko guhera kuwa Gatanu tariki 4 Gicurasi 2018, igiciro cy’ibikomoka kuri Peteroli kiriyongeraho 10Frw naho icya mazutu kikiyongeraho 11 Frw, bitewe n’izamuka ry’ibiciro by’ibikomoka kuri peteroli ku rwego mpuzamahanga.

Itangazo ryashyizweho umukono n’Umuyobozi Mukuru wa RURA, Lt Col Patrick Nyirishema rigira riti “Igiciro cya Essence i Kigali ntikigomba kurenga amafaranga 1065 y’u Rwanda kuri litiro; Igiciro cya Mazutu i Kigali ntikigomba kurenga amafaranga 1048 y’u Rwanda kuri litiro”

Ibi biciro byaherukaga kuvugururwa muri Werurwe, ubwo RURA yatangazaga ko litiro ya lisansi itagomba kurenza 1055 Frw i Kigali naho mazutu ntirenze 1037.

Lt Col Nyirishema yakomeje igira iti “Iri zamuka ry’ibiciro rishingiye ku izamuka ry’ibiciro ry’ibikomoka kuri peteroli klu rwego mpuzamahanga.”

Litiro ya lisansi cyangwa mazutu mu gihe cya vuba yatangiye kugura mu mafaranga 1000 mu Ugushingo umwaka ushize, lisansi yageraga ku Frw 1031 ivuye kuri 993 Frw kuri litiro, gusa icyo gihe mazutu yo yaguraga 994 Frw.

Ibiciro bihindagurika bitewe n’isoko mpuzamahanga, kuko nko mu kwezi nk’uku umwaka ushize wa 2017, igiciro cyalitiro ya lisansi i Kigali kitarenzaga 1002 Frw, mu gihe mazutu itarenzaga 950 Frw kuri litiro.

Ku itariki 4 Gicurasi 2016 bwo Minisiteri y’ubucuruzi yari ishinzwe kugenzura ibi ibiciro, yatangaje ko igiciro fatizo cya Essence na Mazutu i Kigari kitagomba kurenza amafaranga 860 kuri litiro.

Icyo gihe ibikomoka kuri peteroli byari bihendutse cyane, kuko nk’ibiciro byo muri Gicurasi 2012 byavugaga ngo ‘igiciro fatizo cya lisansi i Kigali ntikigomba kurenga amafaranga y’u Rwanda 1,030 kuri litiro naho igiciro fatizo cya mazutu i Kigali kigumye ku mafaranga 1000 kuri litiro.’


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza