Ibibanza bingana na 98% muri Expo ya 2018 byamaze gufatwa

Yanditswe na Mukaneza M.Ange
Kuya 29 Kamena 2018 saa 10:59
Yasuwe :
0 0

Mu gihe habura igihe kitageze ku kwezi ngo Imurikagurisha mpuzamahanga rya Kigali (EXPO 2018) ritangire, Urugaga rw’abikorera mu Rwanda (PSF) ruratangaza ko kugeza ubu 98 % by’ibibanza bimurikirwamo byamaze gufatwa.

Iri murikagurisha ngarukamwaka rigiye kuba ku nshuro ya 21 kuva ku wa 26 Nyakanga kugera ku wa 15 Kanama 2018, rizahuriza hamwe abamurika ibicuruzwa na serivisi baturutse mu bihugu bisaga 20.

Iri murikagurisha rizabera i Gikondo nk’uko bisanzwe, ryongerewe iminsi yavuye ku byumweru bibiri igera kuri bitatu nyuma y’ubusabe bw’abamurika ndetse n’ababa baje kwihahira.

Aganira na IGIHE, Umuyobozi ushinzwe itumanaho n’imenyekanishabikorwa muri PSF, Eric Kabera, yavuze ko kugeza ubu imyiteguro irimbanyije.

Yagize ati “ Turateganya ko abazaza kumurika bazaba bari hejuru ya 500 kandi barakiyandikisha. Twavuga ko ibibanza bimaze gufatwa ku kigero cya 98 %, hasigaye ahantu hato gusa.”

Yakomeje avuga ko abacikanywe bifuza kumurika bakwihutira kwiyandikisha ndetse n’abiyandikishije bagatangira kubaka kuko hari bagenzi babo babigerereje kugira ngo umunsi nyirizina uzagere byose biri ku murongo.

Mu kugabanya umubyigano, Kabera avuga ko uretse kuba barongereye ubuso bwamurikirwagaho, batangiye n’ibikorwa byo kongera umubare w’imiryango ikoreshwa mu kwinjira kugira ngo bagabanye umurongo n’umwanya abantu batakazaga bategereje.

Ikindi gishya kiri muri iyi Expo 2018 ni uko abacuruzi bo mu Rwanda bazajya bahuzwa na bagenzi babo baturutse mu mahanga bitewe n’ibyiciro barimo kugira ngo baganire, bungurane ibitekerezo ku buryo barushaho kunoza ibyo bakora.

Kabera asobanura ko imurikagurisha mpuzamahanga rimaze gutanga umusaruro ufatika, by’umwihariko hari ibigo by’ubucuruzi byo mu mahanga byaryitabiriye nyuma bigafungura amashami mu Rwanda.

Yagize ati“Bimaze kugaragara ko hari benshi batangije ubucuruzi hano bitewe n’uko baje kumurika bakabona gukora ubucuruzi mu Rwanda byoroshye.”

Ibigo by’ubucuruzi byabengutse u Rwanda kubera imurikagurisha mpuzamahanga birimo; JKK International ya Dubai yatangije ibikorwa by’ubwubatsi, Mukwano na Movit zo muri Uganda, ALINK Technologies yo mu Bushinwa, Yvonne Exclusive Design ikora ibijyanye n’imideli.

Hari Roofing Rwanda Ltd, Uruganda rwa Dodoma rukora matela, Egyptian House of Kitchen, Desire Products yo muri Uganda, Azam yo muri Tanzania n’ibindi.

Imurikagurisha riheruka ryitabiriwe n’ibigo bimurika 433 birimo ibyo mu Rwanda 289, ibyo muri Afurika 94 naho ibyo ku yindi migabane ni 50.

Bamwe mu bazamurika bageze kure ibikorwa byo kubaka aho zazamurikira
Abitabira imurika gurisha bongereweho icyumweru ku minsi ryajyaga rimara
Iyi mirongo cyangwa umubyiganiro ntibizagaragara muri Expo 2018

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza