I&M Bank yungutse miliyari 5.3 Frw kugeza muri Kamena 2018

Yanditswe na Mathias Hitimana
Kuya 31 Kanama 2018 saa 04:57
Yasuwe :
0 0

I&M Bank Rwanda Plc yatangaje ko kugeza ku wa 30 Kamena 2018, mbere yo kwishyura umusoro yungutse miliyari 5.3Frw bingana n’izamuka rya 11.1%, ugereranyije n’inyungu yabonetse mu gihe nk’icyo mu mwaka ushize.

Imibare yashyizwe ahagaragara kuri uyu wa Gatanu, yerekana ko amafaranga yinjijwe na I&M Bank kugeza ku wa 30 Kamena 2018 yari miliyari 13.9Frw, ziyongereyeho 31% zivuye kuri miliyari 10.6 Frw zinjijwe kugeza muri Kamena 2017.

Inyungu ya mbere yo kwishyura imisoro yazamutseho 11% igera kuri miliyari 5.3Frw, ivuye kuri miliyari 4.7Frw zabonetse kugeza muri Kamena 2017.

Naho inyungu ya nyuma yo kwishyura imisoro yabaye miliyari 3.4 Frw, izamukaho 10.7% ugereranyije n’iy’igihe nk’icyo mu mwaka ushize.

Iyi banki ikomeje gukura kuko umutungo mbumbe wayo wiyongereyeho 11.2%, ku buryo ku wa 30 Kamena 2018 wanganaga na miliyari 289 Frw, hariho miliyari 35.6 Frw z’abanyamigabane.

Ukuzamuka kw’inyungu kwagendanye n’uburyo yanogeje ibijyanye n’inguzanyo, izatanzwe ziyongeraho 7.6% zigera kuri miliyari 157 Frw muri Kamena 2018, zivuye kuri miliyari 146.5 Frw mu Ukuboza 2017.

Inguzanyo zitishyurwa zo zaragabanyutse, muri Kamena 2018 zigera kuri 2.24% mu gihe mu Ukuboza 2017 zari 2.49%.

Amafaranga abakiliya babikije nayo yiyongereyeho 10.5%, ava kuri miliyari 209Frw mu Ukuboza 2017 agera kuri miliyari 231 Frw muri Kamena uyu mwaka.

Umuyobozi Mukuru wa I&M Bank (Rwanda) Plc, Robin Bairstow, yishimiye uko iyi banki yitwaye mu gice cya mbere cy’umwaka, ashimira abakiliya batumye ikomeza kuba imwe mu zihagaze neza mu gihugu kandi abizeza kurushaho kubegereza serivisi nziza.

Yagize ati “Kwitwara neza mu gice cya mbere cya 2018 byaturutse ku mbaraga z’ishoramari ryacu, ibyemezo byagiye bifatwa mu bihe byashize ndetse n’intego yo kuba banki yita ku mukiliya kandi itanga serivisi mu buryo bworoshye.”

I&M Bank (Rwanda) Plc yanijeje abakiliya ko ku wa 3 Ukuboza 2018, banki izavugurura porogaramu zayo maze bakabona serivise nshya hakoreshewe ikoranabuhanga.

Zinajyanye na gahunda y’ubukungu bushingiye ku kudahererekanya amafaranga mu ntoki.

Ubwo buryo buzaba bwiyongera ku ikoranabuhanga rya SPENN rifasha abantu guhererekanya amafaranga no guhaha bifashishije telefone zigezweho, nta mafaranga bakaswe.

Umuyobozi Mukuru wa I&M Bank Rwanda, Robin Bairstow
Icyicaro gikuru cya I&M Bank (Rwanda) Plc giherereye mu Mujyi rwagati imbere y'Ibiro by'Umujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza