Guverinoma y’u Rwanda yashyize ku isoko imigabane yari ifite mu ruganda rwa CIMERWA

Yanditswe na HABIMANA James
Kuya 17 Kamena 2019 saa 03:21
Yasuwe :
0 0

Guverinoma y’u Rwanda yashyize ku isoko imigabane yayo yose ingana na 49%, yari ifite mu ruganda nyarwanda rukora sima rwa CIMERWA, ruherereye mu kibaya cya Bugarama mu Karere ka Rusizi.

Biciye mu kigega “Agaciro Development Fund” no mu kigo cy’Igihugu cy’Iterambere (RDB), leta yagaragaje ubushake busaba abashoramari kuza bakagura iyi migabane.

Yavuze ko ‘Leta y’u Rwanda biciye mu kigega Agaciro Development Fund no mu kigo cy’Igihugu cy’Iterambere (RDB), irashaka abantu cyangwa ibigo gutanga ibyangombwa bigaragaza ko bashaka kugura imigabane yayo n’ibindi byose yari ifite muri Cimerwa.”

Kugeza ubu ngo leta yamaze gushyiraho abayihagarariye bazajya bagenzura abashoramari bahuje n’ibikenewe na leta n’abandi banyamigabane basanzwe bari muri Cimerwa.

Leta yashyizeho tariki 5 Nyakanga nk’itariki ya nyuma ku bashaka gutanga ibyangombwa byo kwegukana iyi migabane yayo ifite muri uru ruganda.

Ibi bije nyuma yaho muri Weruwe leta isohoye itangazo rivuga ko iri mu nzira zo kuvana ishoramari ryayo muri Cimerrwa, kuko nta nyungu byatanze nubwo yagiye ikoresha imbaraga nyinshi ngo uru ruganda rutere imbere.

Muri Werurwe mu mwiherero wa 16 w’Abayobozi wayobowe na Perezida wa Repubulika, Paul Kagame, hafashwe umwanzuri wo ‘gusesengura inyungu Leta y’u Rwanda ivana mu mishinga itandukanye ifitemo imigabane (shares) no kwiga uburyo bwo kurushaho kuyibyaza umusaruro ku bufatanye n’abikorera’.

Ni nyuma y’uko Perezida Kagame yari yasabye Guverinoma kwikura mu bucuruzi bwose ifitemo imigabane butunguka, agatanga urugero ku ruganda rwa CIMERWA rukora sima nke cyane ugereranyije n’ikenewe ku isoko ryo mu Rwanda, wareba ugasanga rwungukira abashoramari bo muri Afurika bafitemo imigabane myinshi, Leta igahomba.

Yagize ati “CIMERWA murayizi, Minisitiri w’Intebe mbwira turacyafitemo imigabane? Ntimuravamo? CIMERWA ntishobora gukora sima ihagije, reka da! Kandi irahenze, Leta ifitemo imigabane, hakurikiyeho iki? Bumva twabuza sima ihendutse kwinjira mu gihugu kugira ngo bunguke! Mbese duhagarike sima yo mu karere ihendutse, tugumane sima ihenze ya CIMERWA kandi ndetse batanakora ihagije, ubwo ngo ni ubucuruzi!”

Iyo CIMERWA Leta ifitemo imigabane, hari n’abo hanze bafitemo imigabane myinshi ariko bo barunguka, uzi amayeri bakoresha, nta gihombo, igihombo kiri hano ku mugongo wa Leta, nabajije Minisitiri w’Intebe impamvu Leta ishora imari muri CIMERWA, ni ukumira igihombo mwashyize muri iyo kampani kugira ngo umufatanyabikorwa yunguke?”

Perezida Kagame yasobanuye ko CIMERWA, iba yifuza kwiharira isoko ryo mu Rwanda kandi ntinarihaze, avuga ko bibabaje kuba Leta igifite imigabane muri sosiyete idafitiye umumaro Abanyarwanda.

Ati, “Abanyarwanda ntacyo bakuramo, kuko Guverinoma ifitemo uruhare, ngo tugomba kubuza sima iva Uganda, Tanzania n’ahandi ihenze kugira ngo turinde CIMERWA! Narababwiye ngo ntituzabarinda.”

Umukuru w’u Rwanda yavuze ko mu gihe bigaragara ko uru ruganda rutabasha no gukora 1/4 cya sima ikenewe, kandi wareba na nke ikorwa ugasanga ihenze, Leta ikwiye kubivamo ikabiharira abikora bakirwariza byabananira bagafunga imiryango.

Ati “Narababwiye nti kuki mutabiharira kampani yigenga, mwe murakoramo iki? Kuko byatuma bakora sima neza cyangwa bagafunga imiryango, byaba ari byiza kuri njye. Kuki twabeshya ko dukora sima ariko ikaba ari sima iduhombya gusa, ubwo ni ubucuruzi nyabaki?”

Minisitiri w’Intebe, Dr Ngirente Edouard yasabwe kugira icyo abivugaho, asobanura ko Guverinoma yihaye ukwezi kumwe gusa ngo isuzume agaciro k’imigabane Leta ifite muri CIMERWA ndetse harebwe niba abo Banyafurika y’Epfo bafitemo imigabane myinshi bakwemera kugura iya Leta, Perezida Kagame asaba ko byakwihutishwa.

Ati “Ibyo simbikeneye, n’ibindi bimeze bityo, ndashaka kubafasha kubifunga, mwemerere abashaka gukora ubucuruzi.”

Mu 2012 ikigo cyo muri Afurika y’Epfo kizwi nka South Africa-based Pretoria Portland Cement (PPC), cyaguze imigabane myinshi muri Cimerwa ingana na 51% leta isigaranamo 49%, byari byitezwe ko byagombaga gutuma iki kigo gitera imbere gusa leta yaje gutera icyizere Cimerwa nyuma yaho kinaniwe guhaza isoko ry’imbere mu gihugu.

Kugeza ubu abakenera sima bakomeje kwinubira ko ibiciro biri hejuru, kandi imibare igaragaza ko abantu bakenera sima bakomeje kuyivana hanze nko muri Uganda na Tanzania.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza