Kwamamaza

GTBank yamuritse ikarita y’Ikoranabuhanga yifashishwa mu kubikuza no kwishyura Serivisi

Yanditswe kuya 17-10-2016 saa 09:59' na Jean Pierre Tuyisenge


GTBank yamuritse ku mugaragaro ikarita ya Master Card yifashishwa mu kubikuza no kwishyura serivisi aho waba uri hose n’igihe icyo ari cyo cyose. Ni ikarita y’ikoranabuhanga ifasha abakiliya kutagendana amafaranga ndetse bakabasha gufata amafaranga ku byuma bya ATM bisaga miliyoni 1.2 ku Isi yose.

Ku mugoroba wo ku wa gatanu tariki ya 14 Ukwakira 2016, nibwo GTBank yamurikiye abakiliya bayo ku mugaragaro iyo karita, ubuyobozi bw’iyi Banki buvuga ko byakozwe mu rwego rwo gushyira mu bikorwa gahunda u Rwanda rwihaye yo kuba mu mwaka wa 2020, abanyarwanda bazaba batakigendana amafaranga mu mufuka.

Umuyobozi w’iyi banki ku rwego rw’igihugu, Bayo Veracruz, yavuze ko ufite iyo karita abasha kubikuza amafaranga ye, igihe icyo aricyo cyose .”

Yagize ati “Tunejejwe no kugeza ku bakiriya bacu mu Rwanda serivisi za banki zigezweho kuko gutangiza ikoreshwa ry’iyi karita ni ibuye fatizo rituma abakiliya bagera kuri servisi nziza, bakabasha gufata amafaranga yabo igihe cyose, baba mu Rwanda cyangwa bari hanze.”

Yongeyeho ko iyo ufite iyo karita ubasha no kwishyura ibyo ushaka byose nk’amazi, amashanyarazi, itike, amafaranga y’ishuri utiriwe ujya kuri banki kubikuza umutwaro w’amafaranga.

Umuyobozi mukuru wa Banki Nkuru y’u Rwanda, John Rwangombwa, wari muri uwo muhango, yishimiye icyo gikorwa avuga ko iyi Banki iri mu nzira u Rwanda rwihaye yo gukoresha ikoranabuhanga rihanitse muri Servisi zose z’Amafaranga.

Ati “ Mu myaka 10 ishize byari bigoye kubona aho wabikuza amafaranga y’amanyamahanga kuri ATM, ariko ubu biroroshye. Ni inzira nziza iganisha ku ntego twihaye yo gukoresha ikoranabuhanga muri Banki.”

Amakarita ya MasterCard yemewe ku Isi yose aboneka ahantu miliyoni 34 akaba anakoreshwa ku byuma bya ATM miliyoni 2.1 ku Isi.

Abakiliya b’iyi banki baganiriye na IGIHE badutangarije ko basubijwe kuko babonye uburyo bworoshye bwo kugera kuri servisi nziza bajyaga bifuza.

Sina Gerard, Umucuruzi akaba n’umukiliya w’iyi Banki yagize ati “ Mbyakiriye neza kuko ubu ni uburyo bwiza bwo kwishyura bworoshya serivisi zose za Banki cyangwa z’amafaranga waba ushaka gukora, kandi ni ukwihutisha ubukungu n’iterambere muri rusange.”

Ikarita ya Mastercard yamuritswe ku mugaragaro iri mu byiciro bitatu. Hari Mastercard Debit Classic Card, ikoreshwa amasaha 24/24 ku Isi yose muri sevisi zose za Banki, Platinum Debit masterCard ikoreshwa cyane cyane n’abakenera serivisi zirenze izitangwa n’amafaranga y’imbere mu gihugu; ikoreshwa kandi mu ngendo, igafasha n’abantu bakenera kubikuza amafaranga menshi na GTCrea8 card yashyiriweho by’umwihariko abanyeshuri bifuza kwakira amafaranga bari ku mashuri, n’ibindi bikorwa by’ishuri bikenera amafaranga.

Umuyobozi Mukuru wa Banki Nkuru y'u Rwanda, John Rwangombwa
Umuyobozi wa GTBank ku rwego rw’Igihugu, Bayo Veracruz
Alian Umutoni ushinzwe Itumanaho n'Ibikorwa by'Abakiliya muri GTBank
Sina Gerard, umucuruzi akaba n'umukiliya wa GTBank

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved