Gorilla Logistics yagenewe igikombe cya zahabu ikesha umurimo unoze

Yanditswe na Kanamugire Emmanuel
Kuya 22 Nzeri 2016 saa 06:05
Yasuwe : XX
0

Gorilla Logistics, sosiyete yunganira abacuruzi kohereza no kwakira ibicuruzwa biva mu mahanga yishimiye kwakira igihembo mpuzamahanga cya zahabu (International Star for Quality) yagenewe kubera umurimo unoze.

Iki gihembo yagihawe n’ikigo Business Initiatives Directions (BID) i Genève mu Busuwisi ku itariki ya 18 Nzeri 2016. Igihembo cyakiriwe n’Umuyobozi mukuru wa Gorilla Logistics, Fred Seka Rwumbuguza.

Ubuyobozi bw’ikigo BID, gisanzwe kimenyerewe mu guharanira umurimo unoze ku isi, buvuga ko bwahaye Gorilla Logistics iki gihembo nk’ikimenyetso cy’uko iharanira gukora umurimo unoze, ubuyobozi bwiza no guhanga udushya baharanira guhora ari aba mbere mu cyiciro cy’abo bakora bimwe.

Mu kiganiro yagiranye na IGIHE, Umuyobozi ushinzwe ibikorwa muri Gorilla Logistics, Peter Gapira yavuze ko guhabwa iki gihembo nta ruhare na ruto bigeze babigiramo ahubwo ibikorwa ari byo byivugiye.

Ati” BID ifite uburyo bwayo igenda ishakisha ibigo, bo bafite ibyo bashingiraho bagenzura ibigo byo mu gihugu bidafite abafatanyabikorwa hanze, zikabasha kwiyubaka zikiremamo ubushobozi,imikorere zikabasha kugera ku ntego zabyo.”

Yakomeje avuga ko nyuma y’ubushakashatsi n’amakuru atandukanye yavuye mu bakiliya ba Gorilla ndetse no ku rubuga rwa Internet, BID yabonye ibisubizo by’ibibazo yari ifite, ari nabyo byatumye ibagenera ishimwe.

Ati” Iki gihembo hari abandi bakibonye mu Rwanda ariko si benshi. Ariko noneho by’akarusho abenshi babonye umuringa, ariko twe twabonye zahabu. Kuri twebwe biradushimishije.”

Gapira yavuze ko iki gehembo ari ngarukamwaka, uyu mwaka Gorilla Logistics akaba ariyo yonyine yahagarariye u Rwanda, aho yatoranyijwe mu bigo byaturutse mu bihugu 179 BID ikoreramo.

Ahamya kandi ko iki gikombe kigiye kubabera imbarutso yo kurushaho kumenyekanisha ibyo bakora haba imbere mu gihugu no hanze yacyo ndetse no gukosora amakosa yari akigaragara mu kigo.

Ati” Kiraduha imbaraga zo guharanira gukora ibyiza kurushaho. Kiraduha kudakora twenyine kuko igikombe twakibonye nk’ikipe, twese tugifiteho uruhare. Bigiye kudufasha gukora cyane kurushaho, tureba aho bitagenda neza.”

Gorilla Logistics yatangiye gukora mu 2008, itangiranye n’abakozi batatu gusa ariko kugeza ubu bamaze kugera hagati ya 27-30. Ikorera ku mipaka yose y’u Rwanda no ku byambu bya Mombasa na Dar es Salam.

Ifite kandi abafatanyabikorwa Dubai no mu Bushinwa ndetse ikaba ikorana na sosiyete zitandukanye zikora ubwikorezi ndetse n’izohereza ibintu hanze (shipping).

Umuyobozi Mukuru wa Gorilla Logistics, Fred Seka Rwumbuguza nyuma yo kwakira igihembo
Umuyobozi ushinzwe ibikorwa muri Gorilla Logistics, Peter Gapira
Rwumbuguza ashyikirizwa igihembo n'Umuyobozi wa BID, JOS E.Prieto
Peter Gapira ahamya ko iki gikombe batagisabye ahubwo ari byo byivugiye

angel@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza