Equity Bank yashoje icyumweru cyo kwita ku bakiliya yiyemeza kongera imbaraga mu ikoranabuhanga

Yanditswe na IGIHE
Kuya 8 Ukwakira 2017 saa 11:50
Yasuwe :
0 0

Equity Bank Rwanda yashoje icyumweru cyahariwe kwita ku bakiliya mu gikorwa cyo gusangira ifunguro rya mu gitondo na bo cyabereye mu mashami yayo yose mu gihugu kuri uyu wa Gatanu.

Mu kiganiro yagiranye n’abanyamakuru, Umuyobozi Mukuru wa Equity mu Rwanda, Hannington Namara, yavuze ko bashimiye abakiliya babo banabizeza kurushaho kubaha serivise nziza binyuze mu ikoranabuhanga.

Iyi banki iherutse kwegukana igihembo cyo gutanga serivise nziza muri expo mpuzamahanga yaberaga i Kigali ku nshuro ya 20. Abakiliya bakaba bayishima cyane ko idakata amafaranga uyifitemo konti buri kwezi nk’uko izindi banki zibigenza.

Namara yagize ati “Iki cyumweru cyahariwe kwita ku bakiliya gisobanuye byinshi kuri twebwe. Ni icyumweru cyatumye dusubiza amaso inyuma tureba aho tuvuye. Mu myaka itandatu ishize nta mukiliya n’umwe twari dufite. Ibi bituma twibaza ngo ni hehe dukura inyungu? Ni mu bakiliya.”

Yongeyeho ati “Ubu dufite abakiliya barenga ibihumbi 600, kuri twe ni igihe cyiza cyo kuzirikana aho abakiliya bacu badukuye tukababwira tuti ‘mwarakoze cyane’ ariko kandi tukarushaho kubigaragariza mu kubaha serivise nziza kugira ngo bamenye ko tubaha agaciro n’uruhare rwabo mu iterambere rya banki bahisemo.”

Namara yavuze ko icyo bashyize imbere ari ugushyira banki mu ntoki z’umukiliya binyuze mu ikoranabuhanga (digital platform) ku buryo umuntu azajya akoresha telefoni mu bikorwa byose haba mu gufungura konti, kubitsa, kubikuza, gusaba inguzanyo n’ibindi.

Equity Bank Rwanda imaze kugira amashami 13 mu gihugu ikaba yitegura gufungura andi abiri mu kwezi gutaha. Mu gihembwe cya gatatu cy’uyu mwaka cyarangiye muri Nzeri, umubare w’abakiliya wiyongereyeho hafi 5%, amafaranga yabikijwe yiyongeraho hafi 16% nk’uko Namara yakomeje abisobanura.

Mukamurenzi Ruth, yavuze ko yashimishijwe na serivise z’iyi banki mu myaka ibiri amaze akorana na yo akaba yarimo yiyandikisha muri serivise ya ‘mobile banking’ ituma umukiliya yiha servise akeneye atagombye kugana amashami ya banki.

Undi mukiliya ukora akazi k’ikoranabuhanga nk’umwuga, Ntamuhanga Rafiki, yavuze ko amaze imyaka ine akorana na Equity Bank akaba yarayikundiye by’umwihariko serivise z’ikoranabuhanga.

Yagize ati “Ikarita yabo yo kubikuza imfasha mu kugura ibicuruzwa hanze y’igihugu nyuze kuri internet nko ku rubuga Amazon ariko iz’andi mabanki ntizabinkoreraga. Si kenshi ngomba kugana amashami yayo, n’ubu nzanywe no gushaka ikarita yo kubikuza.”

Equity Bank Rwanda yafunguye ari iya 14 ariko ubu iri ku mwanya wa gatanu muri banki zihagaze neza mu Rwanda ikaba muri eshatu za mbere zitanga inguzanyo ku mishinga mitoya mu Rwanda.

Iyi banki ikomoka muri Kenya, ikaba ikorera mu bihugu birindwi byo mu karere aho ifite abakiliya bakabakaba miliyoni 20.

Umuyobozi Mukuru wa Equity Rwanda, Hannington Namara
Equity Rwanda yasangiye n'abakiliya bayo mu gusoza icyumweru cyahariwe kwita ku bakiliya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza