Congo Kinshasa yakomoreye ubucuruzi bw’inkoko n’amagi bituruka mu Rwanda

Yanditswe na Mukwaya olivier
Kuya 18 Ukwakira 2017 saa 03:13
Yasuwe :
0 0

Nyuma y’amezi atandatu abacuruzi b’inkoko n’ibizikomokaho bo mu Karere ka Rubavu n’abo mu mujyi wa Goma muri Repubulika Iharanira Demokarasi ya Congo barira, bari mu byishimo byo gukomorerwa ubuhahirane bwari bwarahagaritswe.

Congo yari yafashe umwanzuro wo gukumira inkoko n’amagi bituruka mu Rwanda bitewe no kwikanga icyorezo cy’indwara y’íbicurane cyari cyibasiye ibiguruka muri Uganda, ruhana imbibi na yo.

Ubu bucuruzi bwongeye gusubukurwa mu cyumweru gishize; ugeze ku mupaka w’u Rwanda na Congo ubona abaturage bambukana inkoko n’amagi, bose bagaragarije IGIHE akanyamuneza.

Mwanaija Agnes, Umune-Congo utunzwe no kurangura inkoko n’ibizikomokaho mu Rwanda, yagize ati ’’Ndumva meze nkuri mu ijuru kubera ko badufunguriye tukaba turimo kwambutsa inkoko n’amagi, ndakeka ibintu bigiye kugenda neza kuko twari twarabuze uko twishyurira abana bacu amashuri bitewe n’ihagarara ry’ubucuruzi bw’inkoko n’amagi ariko kuba inzira yabonetse ndumva bizaba byiza cyane.’’

Umunyarubavu Umimana Anitha we yagize ati ’’Muri rusange byadushimishije cyane kuko mu by’ukuri twari tumaze guhomba amafaranga menshi, ubu bigiye kugabanya igihombo twagize kuko amafaranga tuzayagaruza.’’

Umuyobozi w’agateganyo w’Akarere ka Rubavu, Murenzi Janvier, yishimiye ubucuruzi bw’inkoko n’ibizikomokaho bwongeye gusubukurwa hagati ya Congo n’u Rwanda.

Yagize ati ’’Mu by’ukuri nta rwandiko twari twabona kugeza aya masaha ariko amakuru twabonye ashingiye ku biganiro n’inama zitandukanye twagiye tugirana ni ikintu twishimira kuko tubona bizafasha bwa buhahirane ku mpande zombi.’’

Akomeza asaba abaturage bakora ubu bucuruzi kubyaza umusaruro ayo mahirwe bongeye guhabwa, barushaho gukora ubucuruzi kinyamwuga kuko bafite isoko rigari muri Congo ariko batarahaza; usanga inkoko 1500 arizo gusa zambuka buri munsi.

Inkoko zongeye kwemererwa kuva mu Rwanda zikinjizwa muri Congo
Urujya n'uruza ku mupaka w'u Rwanda na Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza