Bralirwa yungutse miliyari 2.1 Frw mu mezi atandatu ya mbere ya 2018

Yanditswe na Mukaneza M.Ange
Kuya 11 Kanama 2018 saa 12:39
Yasuwe :
0 0

Uruganda rukora ibyinyobwa bisembuye n’ibidasembuye, Bralirwa, rwatangaje ko mu mezi atandatu ya mbere ya 2018, rwabonye inyungu ingana na miliyari 2.1 Frw, ikaba yariyongereye ku kigero cya 1.7%.

Imibare yashyizwe hanze n’uru ruganda ku itariki ya 10 Kanama, igaragaza ko mu gice cya mbere cya 2018, amafaranga rwinjije yiyongereye ku kigero cya 9.7% kuko hinjiye miliyari 45.4Frw; igihe nk’iki mu 2017 bari binjije miliyari 41.3Frw. Ingano y’ibicuruzwa nayo yazamutseho 11.5%.

Umuyobozi Mukuru wa Bralirwa, Victor Madiela, yavuze ko uku kuzamuka kw’amafaranga binjije byaturutse ku kuba barongereye ishoramari ryabo, bibanda cyane ku binyobwa basanzwe bakora ndetse n’ibindi bikunzwe.

Ati “ Kuzamuka kw’ibiciro by’iby’ibikoresho by’ibanze ariko byabangamiye umusaruro wacu kabone nubwo twari twashyizeho gahunda yo kugerageza guhangana nabyo. Mu rwego rwo kuzamura umusaruro wacu, Bralirwa izakomeza gushora imari mu mutungo, ibicuruzwa n’abantu.”

Ubuyobozi bwa Bralirwa buvuga ko bufite icyizere ko 2018 izagenda neza, aho bazakomeza gushora mu binyobwa bitandukanye bakora n’ibishya, umutungo no kugabanya amadeni. Ku wa 29 Kanama hateganyijwe inama izaganirwamo inyungu ya Bralirwa mu gice cya mbere cya 2018.

Uru ruganda ubu rukora inzoga zirimo Primus yatangiye kugezwa ku bakunzi bayo mu 1959, Mützig, Legend, Amstel, Huza na Turbo King bikorerwa ku Gisenyi, na Heineken ikaba itumizwa mu Buholandi.

Kuva mu 1974 kandi Bralirwa ikora ibinyobwa bidasembuye birimo ibikorwa mu masezerano na Coca Cola Company birimo Coca Cola, Fanta Orange, Fanta Citron, Fanta Fiesta, Sprite, Krest na Stoney, Bralirwa ikaba ifite iyayo yitwa Vital’O.

Umuyobozi Mukuru wa Bralirwa Victor Madiela yavuze ko mu mezi atandatu ya mbere ya 2018 bungutse miliyari 2.1

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza