BK na RwandAir byaje ku isonga mu bigo byitwaye neza muri Expo 2017

Yanditswe na Ferdinand Maniraguha
Kuya 6 Nzeri 2017 saa 10:24
Yasuwe :
1 0

Imurikagurisha mpuzamahanga rya 20 (Expo 2017) ryari rimaze iminsi 14 ribera mu Rwanda ryasojwe kuri uyu wa Gatatu tariki 9 Nzeri 2017, Urugaga rw’Abikorera mu Rwanda (PSF) ruhemba ababaye indashyikirwa mu kumurika.

Expo2017 yitabiriwe n’ibigo 433 birimo ibyo mu Rwanda 289, ibyo muri Afurika 94 naho ibyo ku yindi migabane ni 50.

Ubwo yasozwaga hatanzwe ibihembo ku bigo bitandukanye byitwaye neza mu ngeri zinyuranye.

Banki ya Kigali (BK) nicyo kigo cya mbere cyahembewe kwitwara neza mu imurikagurisha ry’uyu mwaka, gikurikirwa na sosiyete itwara abantu mu ndege, RwandAir, naho ku mwanya wa gatatu haza uruganda rukora amarangi rwa Ameki Color.

Mu cyiciro cy’umuterankunga wabanye n’iri murikagurisha mu myaka 20 rimaze, hahembwe sosiyete y’itumanaho ya MTN ndetse n’uruganda rwenga inzoga rwa Bralirwa.

Mu cyiciro cy’abamurika bagaragaye mu mamurikagurisha 20 yose amaze kuba, hahembwe Entreprise Urwibutso ya Sina Gerard, ku mwanya wa kabiri haza Sulfo Rwanda Industries, ku mwanya wa gatatu haza Mukwano Group of companies.

Icyiciro cy’igitangazamakuru cyagaragaye mu mamurikagurisha 20 amaze kuba cyatwawe n’Ikigo cy’Igihugu gishinzwe Itangazamakuru (RBA).

Umufatanyabikorwa wabaye mu mamurikagurisha yose amaze kuba, hahembwe Polisi y’u Rwanda naho u Buhinde buba igihugu cyitwaye neza mu imurikagurisha ry’uyu mwaka.

Umunyamahanga wahize abandi mu imurika muri uyu mwaka ni Ikigo gishinzwe ibyambu cya Kenya, Kenya Port Authority, ku mwanya wa kabiri haza Movit.

Mu cyiciro cy’ibigo byitaye ku bakiliya ku rwego rwo hejuru, umwanya wa mbere watwawe na Inyange Industries naho Tecno iza ku mwanya wa kabiri.

Mu bigo bitanga serivisi z’ubwishingizi, Ikigo cy’Igihugu gishinzwe Ubwiteganyirize (RSSB) cyabaye icya mbere, gikurikirwa na Mayfair Insurance.

Banki yigaragaje cyane muri iri murikagurisha yabaye BRD ikurikirwa na Equity Bank.

Mu bijyanye n’itumanaho n’ikoranabuhanga, Dynamic solution Group niyo yaje ku isonga, ikurikirwa na Made in Rwanda online Ltd.

Umurika wagaragaje udushya yabaye Skat Consulting Rwanda Ltd, sosiyete yazanye agashya k’inzu ya miliyoni umunani yubatse ku buso buto, ikurikirwa na Agropy Leverage Nature ikora imiti yica udukoko n’ibindi.

Mu bijyanye n’inganda, CIMERWA ikora sima niyo yaje ku isonga, ikurikirwa na Trust Industries ikora ibijyanye n’isuku.

Icyiciro cyo kwakira neza no gushimisha abakiliya, hahembwe uruganda rukora inzoga rwa SKOL ndetse na IMAHS Entertainment yashimishaga abana bitabiriye Expo.

Sosiyete zikora ibikomoka ku buhinzi n’ubworozi zitwaye neza muri Expo, iya mbere yabaye Africa Improved Foods, ikurikirwa na APTC Ltd itunganya inyama, amata n’ibiyakomokaho.

Mu cyiciro cya ba rwiyemezamirimo bakiri bato hahembwe sosiyete Holy Trust Ltd ikora amavuta yo mu misatsi iyakuye mu buki ndetse n’ibindi, ikurikirwa na Cow Horns Kigali ikora ibipesu (ibifungo by’imyenda) ibikuye mu mahembe.

Mu bukorikori, UZURI KY Ltd yaje ku mwanya wa mbere ku bw’inkweto ikora ikazohereza mu mahanga naho Posh Creation nayo ikora inkweto iyigwa mu ntege.

Mu baranguza bakanakwirakwiza ibicuruzwa, Lime Fresh Family Ltd, ikurikirwa na New Hope Electronics.

PSF yishimira intera imurikagurisha rigenda rifata n’uburyo abantu baryitabira ku bwinshi, yaba abamurika n’abaza kureba ibimurikwa.

BK yabaye iya mbere mu kwitwara neza muri EXpo2017
Minisitiri w'ubucuruzi n'inganda, Vincent Mushyeshyaka (hagati) ashyikiriza igihembo Umuyobozi wa BK, Dr Diane Karusisi
Rwandair yashimiwe nk'umwe mu bamurika bitwaye neza mu imurikagurisha
Ameki Color yahembwe nk'umwe mu bamurika bitwaye neza cyane muri Expo2017
U Buhinde ni cyo gihugu cyitwaye neza muri Expo
Bamwe mu bitabiriye umuhango wo gusoza Expo2017
Movit iri mu bashimiwe
MTN yahembwe nk'umuterankunga wa Expo w'igihe kirekire
Umuyobozi mukuru wa PSF, Gasamagera Benjamin ashyikiriza igihembo Polisi kuko yitabiriye imurikagurisha igihe cyose ryabaye
Havugimana Francine ashyikiriza Umuyobozi wa Mayfair Insurance igihembo
Umuyobozi wa RBA, Arthur Asiimwe ashyikirizwa igihembo cy'igitangazamakuru cyabanye na Expo mu myaka 20 ishize

Amafoto: Moses Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza