BK Group Plc yungutse miliyari 14.6 Frw mu mezi atandatu ya mbere ya 2019

Yanditswe na Rabbi Malo Umucunguzi
Kuya 30 Kanama 2019 saa 12:47
Yasuwe :
0 0

BK Group Plc yatangaje ko nyuma yo kwishyura umusoro, mu gice cya mbere cy’uyu mwaka wa 2019 yungutse miliyari 14.6 Frw, bingana n’izamuka rya 8.5% ugereranyije n’inyungu yabonetse mu gice cya mbere cy’umwaka ushize.

Mu mibare yatangajwe na BK Group Plc kuri uyu wa Gatanu, umutungo mbumbe w’iki kigo kibumbiye hamwe Banki ya Kigali, BK General Insurance, BK Capital na BK TecHouse wiyongereyeho 22.1% ugera kuri miliyari 893.2 Frw.

Bimwe mu byazamuye inyungu y’ikigo, harimo inguzanyo zatanzwe zazamutseho 35.1% zikagera kuri miliyari 650.2 Frw. Harimo izahawe imishinga ikomeye irimo uruganda rwa Mara Phones rwatangiye gushyira ku isoko smartphones zakorewe mu Rwanda, uruganda rurimo kubyaza nyiramugengeri amashanyarazi ya MW80 muri Gisagara no gufasha abakeneye inzu mu mudugudu wa Vision City uri i Gacuriro mu Mujyi wa Kigali.

Umuyobozi Mukuru wa Banki ya Kigali, Dr Diane Karusisi, yavuze ko iki kigo cyakoze inyungu ishimishije mu gice cya mbere cy’uyu mwaka.

Umuyobozi Mukuru muri BK Group Plc ushinzwe imari, Nathalie Mpaka, yavuze ko inyungu yabonetse mu gice cya mbere cy’uyu mwaka ijyanye n’icyizere ikigo cyahaye abanyamigabane umwaka ushize, ubwo cyabasabaga kongera imari shingiro yacyo ngo kibashe gushora imari mu mishinga ikomeye.

Nyuma y’inyungu yabonetse, BK Group Plc yatanze umusoro ungana na miliyari 6.9 Frw mu gice cya mbere cy’umwaka wa 2019.

Inyungu y’ubwishingizi yakomeje kuba hejuru

Ibigo bishamikiye kuri BK Group Plc byakomeje gukora inyungu ifatika, nk’aho Bank of Kigali Plc yazamuye amafaranga abitswa n’abakiliya ho 28.2% ndetse n’izindi serivisi zayo zikomeza kwitabirwa; BK TecHouse yazamuye ibyo yacuruje kuri 87%, BK Capital Ltd izamura imitungo icunze ho 20% ndetse BK General Insurance izamura inyungu ku 172.5%.

Umuyobozi wa BK General Insurance, Alex Bahizi, yavuze ko iki kigo gikomeje guhagarara neza kuko amafaranga yavuye gucuruza ubwishingizi yazamutseho 28.2% akagera kuri miliyari 2.4 Frw mu gice cya mbere cy’uyu mwaka.

Ati “Icyo kigereranyo cy’imikurire ku kigo kitamaze imyaka myinshi tubona gishimishije, ariko tugakomeza kongera serivisi kugira ngo cyiyongere. […] Mu bijyanye n’inyungu, ubundi ni ibigo bike bikora inyungu ahangaha, ngira ngo no mu mibare Banki Nkuru iherutse gusohora mwabonye ko uru rwego ruri mu bihombo bya miliyoni 900 Frw, ariko BK General Insurance yo ihafite urwunguko rurenze miliyoni 900 Frw.”

“Urumva ko imikorere ya BK General Insurance [BKGI] itandukanye kure n’imikorere musanzwe muzi y’ubwishingizi. Hanyuma ku bijyanye n’urwunguko rusange, mu mezi atandatu twungutse miliyoni 974 Frw, wazigereranya na miliyoni 357 Frw twari dufite mu gihe nk’icyo umwaka ushize, akaba aribyo biduha izamuka rya 172.5%.”

Yavuze ko ibipimo byose ubusugire bw’urwego rw’ubwishingizi BKGI ibirengeje, bigaragaza ko bafite ubushobozi bwo kwakira n’ibigo binini cyane.

Yakomeje ati “Urebye ku kigereranyo cy’urwunguko ku ifaranga umushoramari aba yarashyize mu bucuruzi, ubu turi kuri 39%, ngira ngo sinzi ko hari ubucuruzi bwinshi bushobora kugira iyo nyungu, birakwereka ko abanyamigabane b’iki kigo cy’ubwishingizi bashoye ahantu heza.”

Bank of Kigali Plc. igiye kugabanya inguzanyo zitishyurwa

Urwunguko rwa mbere yo kwishyura umusoro, mu gice cya mbere cy’uyu mwaka rwaragabanyutse kuko rwavuye kuri miliyari 22.2 Frw mu gice cya mbere cya 2018 rugera kuri miliyari 21.5 Frw.

Dr Karusisi avuga ko bifitanye isano n’inguzanyo zitishyuwe neza muri icyo gice zageze kuri 6.4% mu gihe mu gice nk’iki umwaka ushize zari kuri 5.8% ariko umwaka urangira ziri kuri 4.9%.

Ati “Banki yakomeje gutanga inguzanyo nyinshi mu buryo bushimishije ariko ikibazo twahuye nacyo muri iki gihembwe gishize ni uko ikigereranyo cy’abantu batishyura nacyo cyariyongereye, bituma nka banki igomba kuzigamira inguzanyo, byatumye inyungu yacu itiyongera nk’uko twabishakaga.”

“Ariko uko tubibona, muri iyi minsi iri imbere abo bantu bose bagiye batishyura turimo turareba ukuntu ayo mafaranga yagaruka muri banki, kandi twizeza abantu bose ko mbere y’uko umwaka urangira ikigereranyo cy’abantu batishyura neza kizongera kigasubira munsi ya 5%.”

Ibyo ngo byatewe n’umwe mu bakiliya banini wahombye, kugeza ubu amafaranga atarishyuwe neza agera kuri miliyari 45 Frw.

Uhereye ibumoso: Umuyobozi wa BK Capital Ltd, Carine Umutoni; Umuyobozi Mukuru wa BK General Insurance, Alex N. Bahizi; Umuyobozi Mukuru wa BK Group Plc. Dr. Diane Karusisi; Umuyobozi wa BK TecHouse, Claude Munyangabo n’Umuyobozi Mukuru muri BK Group Plc. Ushinzwe Imari, Nathalie Mpaka
Umuyobozi Mukuru wa Banki ya Kigali, Dr Diane Karusisi, yavuze ko ibigo bihurira muri BK Group Plc byose byabonye inyungu ishimishije
Bahizi Alex uyobora BKGI yavuze ko iki kigo cyabonye inyungu iri hejuru, ku buryo izamuka ryayo riruta iry’urwego rw’ubwishingizi mu gihugu
Umuyobozi wa BK TecHouse, Claude Munyangabo n’Umuyobozi Mukuru muri BK Group Plc. Ushinzwe Imari, Nathalie Mpaka, mu kiganiro n'abanyamakuru kuri uyu wa Gatanu
Umutoni Carine uyobora BK Capital Ltd yagaragaje ko imitungo icunze yazamutseho 20%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza