Barifuza gutangiza mu Rwanda banki igendera ku mahame y’idini ya Islam iziririza inyungu

Yanditswe na Philbert Girinema
Kuya 28 Mutarama 2016 saa 10:53
Yasuwe :
0 0

Itsinda ry’ intumwa za Malaysia mu Rwanda zagiranye ibiganiro na Minisiteri y’Ubucuruzi n’Inganda ndetse n’abahagagariye ibigo by’ imari mu Rwanda; ibi biganiro bikaba byari bigamije gusangiza ababyitabiriye ubunararibonye bukoreshwa mu bigo by’ imari bigendera ku mategeko y’idini ya Islam.

Ubwo kuri uyu wa Gatatu basobanuraga imikorere y’aya mabanki atamenyerewe mu Rwanda, ibyo biganiro byitabiriwe na Minisitiri w’Ubucuruzi n’Inganda mu Rwanda, intumwa ya Banki Nkuru y’Igihugu ndetse n’abayobozi b’amabanki atandukanye.

Ahmad Tojun bin Abdoul Rahman, umwe mu bagize iri tsinda yasobanuye ko izi banki zakira abantu bose ariko na none agaragaza ko zidashobora gushyigikira ishoramari mu bikorwa bifatwa nk’icyaha muri Islam.

Harimo ko zidashobora gushora imari mu nganda zikora inzoga, ibiyobyabwenge, ingurube, itangazamakuru rikwirakwiza ibihuha cyangwa ibikorwa by’ubusambanyi kuko bizira muri Islam.

Ikindi ngo ntizishobora gushora imari muri banki zisanzwe, kuko zo zungukira mu nyungu zisanzwe Islam itemera.

Umwe mu bari muri iri tsinda, Prof. Dr. Barjoyai Bin Bardai, yavuze ko bafite uburyo bungukamo binyuze mu ishoramari, aho kwaka inyungu ku nguzanyo batanga nk’uko bikorwa n’andi mabanki.

Yagize ati ‘‘Muri Banki igendera ku mategeko ya Islam niba ushaka kugura inzu cyangwa urugero moto, nta nyungu baguca ahubwo bagufasha kugura inzu bakungukira ku giciro cy’iyo nzu. Ni nako bigenda iyo ubikije by’igihe kirekire amafaranga yawe muri Banki igendera ku mahame y’idini ya Islam. Banki nta nyungu iguha, ahubwo irayashora igakuramo inyungu kandi mukazayigabana.”

Bardai yakomeje avuga ko impamvu batemera inyungu kandi ari ikintu cy’ingenzi mu bijyanye n’amabanki, ngo ni uko usanga inyungu zakwa mu buryo busa n’ikandamizwa.

Ati “Muri Islam tubuza inyungu, kuko inyungu zirakandamiza. Urugero iyo ugujije amafaranga muri banki ntushobore kuyishyura mu gihe cyagenwe, bakwishyuza inyungu bakakwishyuza n’inyungu z’ubukererwe, ugasanga umukiRiya arakandamizwa.”

Minisitri w’Uburuzi n’Ingada, Francois Kanimba yasabye abari bitabiriye ibyo biganiro kubyumva neza no gusesengura ibirimo, bagasobanuza izo nararibonye, ibizavamo bikaba ari byo inzego zibishinzwe zashingiraho maze hakazarebwa icyakurikiraho.

Ati ‘Nzi neza ko abantu bayoboye ibigo by’imari mu Rwanda( banki), n’ abakurikiye ibi bisobanuro bakeneye kubyumva neza no kurushaho kuzamura imyumvire kugira ngo batangire gutekereza ku cyakurikiraho. »

Ku mpungenge z’uburyo izi banki n’ibigo by’imari bishobora gukorera mu Rwanda mu gihe igihugu kitagendera ku mahame ya Islam, Saifuddun Khalid waje uhagararariye iri tsinda yavuze ko icyifuzo cyabo ari ugukorana n’u Rwanda nk’igihugu gikomeje gutera imbere mu buryo bwihuse bityo bakaba biteguye gukurikiza amategeko n’amabwiriza bazahabwa.

Ati “Twemera ko umuntu agomba guhabwa amahirwe yo guhitamo mu bintu byinshi. Turabizi ko amategeko ashobora kuba imbogamizi ikomeye ariko twiteguye kubasangiza ubunararibonye bwacu no gukorana n’inzego zishyiraho amategeko kugira ngo dukemura iki kibazo.”

Izi ntumwa za Malysia zari mu Rwanda zaje ku wa mbere w’ iki cyumweru zikaba zashoje uruzinduko zagiriraga rwazo kuri uyu wa kane.

Ministiri Kanimba na Saifuddin Khalid
Abari bitabiriye ibi biganiro

Amafoto: Eric Niyonkuru
[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244