Banki y’Abaturage igiye korohereza abajyana ibicuruzwa hanze kubona inguzanyo

Yanditswe na Kanamugire Emmanuel
Kuya 15 Nzeri 2016 saa 06:51
Yasuwe : XX
0

Ubuyobozi bwa Banki y’abaturage y’u Rwanda (BPR) bwatangaje ko bugiye gutera inkunga abanyarwanda bashaka kujyana ibicuruzwa byabo hanze y’igihugu, mu rwego rwo kongera umubare w’ibyo u Rwanda rwohereza mu mahanga.

Ibi byatangajwe mu biganiro Banki y’Abaturage yagiranye na bamwe mu bafite ibyo bohereza mu mahanga byabereye i Kigali kuri uyu wa 15 Nzeri 2016.

Gutera ingabo mu bitugu abafite ibyo bohereza mu mahanga ni gahunda ubuyobozi buvuga ko izateza imbere ibikorerwa mu Rwanda (Made In Rwanda), mu rwego rwo kubimenyekanisha hanze y’igihugu.

Umuyobozi Mukuru wa BPR,Sanjeev Anand yavuze ko batangije iyi gahunda mu rwego rwo gufasha abakiriya n’abanyarwanda muri rusange kujyana hanze umusaruro n’ibicuruzwa bikorerwa mu Rwanda.

Yagize ati “ Tumaze kubona ko ibyo u Rwanda rwohereza mu mahanga ari bike ugereranyije n’ibyo ruvanayo, twahisemo gufasha abantu mu buryo butandukanye tubafasha gukuraho imbogamizi zababuzaga gutwara ibicuruzwa byabo hanze, cyane cyane ko iki gihugu kiri mu nzira y’iterambere.”

Umwe mu bacuruzi bajyaga bajyana ibicuruzwa byabo hanze waganiriye na IGIHE, yatangaje ko hari igihe yajyaga yifuza kongera ingano y’ibyo yohereza hanze ariko akazitirwa no kubura igishoro.

Yagize ati “ Twagiraga ikibazo cyo kubura ingwate bigatuma ibicuruzwa tujyana mu mahanga biba bike. Icyemezo cyo koroherezwa kubona inguzanyo kizatuma natwe twongera ingano y’ibyo twoherezaga hanze y’igihugu.”

Umuyobozi ushinzwe ubucuruzi muri Banki y’Abaturage y’u Rwanda,Eric Rutabana yatangaje ko imbogamizi abacuruzi bahuraga na zo zavanyweho kuko ngo bagiye gukora uko bashoboye bakongerera ubushobozi abashaka kohereza ibicuruzwa byabo hanze.

Yagize ati “ Hari abajyaga bashaka kujyana ibicuruzwa byabo hanze bakagira imbogamizi y’igishoro. Ubu twe nka Banki y’Abaturage tugiye kujya dusuzuma niba koko umucuruzi afite ibyo yohereza, maze ku bufatanye tugirana na Banki y’u Rwanda itsura amajyambere (BRD) tuzajya tumwakira ingwate iri hagati ya 65% na 70%.”

Usibye gufasha abakiliya mu kubona ingwate, iyi banki izajya ishakira abacuruzi amasoko bajyanamo ibicuruzwa hanze, inabikurikirane kugeza biguzwe.

Mu bikorwa Banki y’Abaturage yatangaje ko igiye gutera inkunga, harimo ibikomoka ku buhinzi bw’icyayi, ikawa, n’ibihingwa by’imbuto n’imboga hamwe n’ibijyanye n’ubucukuzi bw’amabuye y’agaciro biba bigiye koherezwa hanze.

Tariki ya 7 Mutarama 2016, nibwo ikigo Atlas Mara cyo mu Bwongereza cyamuritse ku mugaragaro uguhuzwa kw’ishami ry’ubucuruzi rya BRD ryihariyemo 75% na BPR nyuma yo kuguramo imigabane ingana na 62% bigahinduka banki imwe ari yo BPR.

Atlas Mara yashoye miliyoni 21 z’amadorari ya Amerika muri BPR iguramo imigabane ingana na 62%, ndetse inagura ishami ry’ubucuruzi rya BRD ryihariye muri iyi banki 75%. Atlas Mara ifite gahunda yo kuba ikigo cy’imari cya mbere muri Afurika yo munsi y’ubutayu bwa Sahara.

Umuyobozi Mukuru wa BPR,Sanjeev Anand
Umuyobozi Mukuru wa BPR,Sanjeev Anand aganira n'itangazamakuru
Bamwe mu bari bitabiriye ibiganiro Banki y'Abaturage yagiranye n'abafite ibyo bohereza mu mahanga

Amafoto: Luqman Mahoro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza