Amatike yo kwinjira mu imurikagurisha mpuzamahanga rya 2019 azishyurwa kuri Mobile Money

Yanditswe na Evariste Nsengimana
Kuya 18 Nyakanga 2019 saa 05:49
Yasuwe :
0 0

Urugaga rw’abikorera mu Rwanda, PSF, rwatangaje ko umuntu ashobora kwigurira cyangwa kugurira mugenzi we itike imwemera gusura ibikorwa bitandukanye bizamurikirwa ahazabera imurikagurisha mpuzamahanga ku nshuro ya 22, yifashishije telefone igendanwa.

Iri murikagurisha biteganyijwe ko rizitabirwa n’abamurika basaga 500 baturutse mu bihugu bisaga 20, rizaba ku wa 22 Nyakanga kugera kuwa 11 Kanama 2019 i Gikondo kuri Expo Grounds.

Umuvuguzi wa PSF, Theoneste Ntagengerwa, yabwiye RBA ko imyiteguro irimbanyije ndetse kwishyura amatike abantu bazifashisha Mobile Money nta mbogamizi bazagira.

Ati “Gahunda dufite yo kwinjira isa n’aho ari nshyashya, umuntu azajya aba yicaye mu rugo cyangwa ari mu nzira aza, afate telefone ye agure itike.”

Yasobanuye ko hari uburyo bubiri izi tike zizagurwamo burimo kwandika muri telefone bisanzwe ijambo ‘Expo, ugasiga umwanya, ugashyiraho umubare w’amatike wifuza ukohereza kuri 7799 ukemeza’ ugahita uhabwa ubutumwa bugusobanurira uko wishyura ukoresheje MTN Mobile Money.

Nyuma yo kwishyura telefone izajya ihita yakira ubutumwa bwemeza ko kwishyura byageze neza, mbere yo kwinjira ahabera Expo uzajya uhasanga abakozi babishinzwe ubereke ubwo butumwa babusuzume bifashishije ibyuma by’ikoranabuhanga byabugenewe.

Bitewe n’umubare wa tike umuntu yishyuye, icyo cyuma uko bagikozaho telefone niko kizajya kigaragaza izisigaye umuntu ashobora kwinjiriraho.

Umuntu ashobora no gukanda *779# akemeza, agahitamo ururimi akoresha maze agakurikiza ibikurikira birimo guhitamo umubare wa tike yifuza. Gusa hazaba hari n’abantu bashobora gufasha abadafite telefone cyangwa ubundi buryo bwo kwigurira tike.

Ibyo ngo bizafasha mu kugabanya umwanya umuntu yamaraga ategereje kwishyura itike bitewe n’uko yasanze hari abantu benshi bategereje kwinjira. Bizanafasha kwimakaza gahunda ya Leta yo kugabanya umubare w’amafaranga ahererekanywa mu ntoki.

Muri Gicurasi Ikigo cy’Itumanaho cya MTN Rwanda cyasinyanye amasezerano na PSF, azatuma ibikorwa mu imurikagurisha mpuzamahanga bikorwa hatabayeho guhererakanya amafaranga mu ntoki.

MTN Rwanda imaze kubaka uburyo bwo kwishyura ibicuruzwa mu masoko asanzwe n’andi maguriro nka Tap & Pay cyangwa Momo Pay bwifashisha telefone yanditse muri serivisi ya Mobile Money, aho umuntu *182*3# agakurikiza amabwiriza.

Ubucuruzi butifashisha amafaranga mu ntoki ni intambwe ikomeye mu gihe Afurika iheruka kwemeranya ku masezerano ashyiraho isoko rusange, AfCFTA, yasinyiwe i Kigali muri Werurwe 2018 ndetse azatangira kubahirizwa mu mpera z’uku kwezi.

Amatike zo kwinjira mu imurikagurisha mpuzamahanga rya 2019 azishyurwa kuri Mobile Money
Ubwo Umuyobozi wa PSF n'uwa MTN basinyaga amasezerano

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza