Kwamamaza

Abayobozi b’ibigo by’ubucuruzi basinyiye guhangana n’ihezwa ry’abagore riteza ibihombo

Yanditswe kuya 16-09-2016 saa 17:16' na Rabbi Malo Umucunguzi


Ubushakashatsi ku bikorwa bibyara inyungu mu Rwanda, bugaragaza ko hagendewe ku mibare yo mu 2014, mu bigo bigera ku 154 236, ibigera ku 112,700 ari iby’abagabo, mu gihe iby’abagore ari 41 417 bingana na 26.8%.

Minisitiri w’Ubucuruzi n’Inganda, François Kanimba yavuze ko kuba 55% by’ibigo byo mu Mijyi ari iby’abagabo 45% bikaba iby’abagore, mu cyaro 83.4% byose bikaba iby’abagabo, abagore bagasigarana 16.6%, bisaba ko ibibazo abagore bafite bihabwa umwanya ngo hazamurwe umusanzu wabo mu iterambere.

Usanga kandi abagabo aribo bihariye ibigo bifite amafaranga menshi kurusha abagore, mu mbogamizi hakagaragazwa ko abagore benshi babura ubumenyi abandi bakazitirwa bigeze ku kubona igishoro.

Umuyobozi Uhagarariye Ishami ry’Umuryango w’Abibumbye ryita ku bagore, mu Rwanda, Fatou Lo, yagaragaje ko nta gihugu gishobora kugira iterambere rirambye mu gihe kiri kwirengagiza abagore n’abakobwa bacyo ahenshi usanga banagera kuri 50% by’abaturage bose.

Ati “Umwaka ushize, ikigo cya McKinsey cyatangaje ko uburinganire bwuzuye bushobora kongera tiriyali $28 ku musaruro mbumbe w’Isi bitarenze 2025. Mu minsi ishize ho Raporo ku Iterambere ry’imibereho y’abatuye Afurika ya 2016, yagaragaje ko igihombo giterwa n’ubusumbane bw’ibitsina muri Afurika yo munsi y’Ubutayu bwa Sahara kiyingayinga miliyari $95 buri mwaka, cyangwa se 6 ku ijana by’Umusaruro mbumbe w’akarere kose, bigakoma mu nkokora imbaraga uyu mu mugabane ushyira mu iterambere n’ubukungu bidaheza.’’

Hagendewe ku mbogamizi zikigaragazwa nk’izibangamiye abagore mu kwihangira imirimo, Imyanzuro ya raporo y’Ihuriro rya ba rwiyemezamirimo b’abagore mu Rwanda, RCWE, ikubiyemo ko hakenewe ubukangurambaga busaba ko abagore bagabanyirizwa inyungu ku nguzanyo.

Harimo gukangukira serivisi z’imari bemerewe nka ba rwiyemezamirimo b’abagore n’urubyiruko, gukorana na BDF, ndetse n’abagore ubwabo bakajya biha intego bagashyiraho n’Imihigo.

Guverineri Wungirije wa Banki Nkuru y’igihugu Dr Monique Nsanzabaganwa, akaba n’Umuyobozi w’Umuryango New Faces New Voices, yagaragaje ko hari ibibazo bikomeye bikibangamira ba rwiyemezamirimo b’abagore, ku buryo bikeneye kwitabwaho byihariye.

Ati “Bamwe mu bagore bake babasha gushinga ibigo bibyara inyungu bahura n’ibibazo by’inguzanyo, bazibona zinabahenze, ikindi amabanki ntabwo abizera, hari abayobora amabanki batarumva ko umugore ashobora kuyobora ikigo runaka akakigeza ku rundi rwego.’’

“Hari ibyo turi gushaka gukora, abagore bahanze amaso Iki kigega cy’ishoramari ry’abagore turi gutegura nka New Faces New Voices, kikazabafasha gushakira igisubizo ibyo bibazo. Kizita cyane ku bijyanye n’inguzanyo, ingwate… ubu turi kunoza inyingo ku buryo mu gihe gito tuzagitangiza abantu bagatangira kuguramo imigabane.’’

’New Faces, New Voices’ yatangiye gukorera mu Rwanda muri Kamena 2015, iteganya ko iki kigega kizaba kirimo miliyoni $20, ni ukuvuga agera kuri miliyari 16 Frw, agenewe kugoboka abagore bari batorohewe no kugera kuri serivisi z’imari.

Abayobozi b’ibigo by’abikorera basinyiye gahunda ya HeforShe

Nyuma yo kugaragarizwa uko abagore bari inyuma mu kwikorera, abikorera bashyize umukono kuri gahunda ya HeforShe yatangijwe n’Ishami ry’Umuryango w’abibumbye ryita ku bagore muri Nzeri 2014, igamije gukangurira abagabo n’abahungu guhagurukira iterambere ry’umugore n’umukobwa.

Iyi gahunda kandi yahawe intego y’uko isinywaho n’abagabo n’abahungu miliyari imwe kugeza mu Ukuboza 2016, hagamijwe kwihutishwa ishyirwa mu bikorwa ry’uburinganire ryiyemejwe bitarenze 2020.

Uyu munsi imaze gusinywaho na miliyoni 1.1, harimo harimo abagabo 953 642, abagore 166 693, n’abandi 20 302.

U Rwanda ruyoboye ibindi bihugu n’abantu 153 434 bamaze gusinya bose hamwe (barimo abagabo 112 215, abagore 35542 n’abandi 5677), rugakurikirwa na Leta zunze ubumwe za Amerika (111,494), Mexico (87,453), u Bwongereza bwagutse (52,721) na Ecuador (41,774).

Umunyamabanga Uhoraho muri Minisiteri y’Uburinganire n’Iterambere ry’Umuryango, Umutoni Gatsinzi Nadine yavuze ko hashize igihe bakorana n’inzego za leta zisanzwe, ariko ubu igihe kikaba kigeze ngo abikorera bagaragaze ubushake bwabo.

Ati “Ni ibintu twishimiye kuko abikorera nibo ba mbere batanga imirimo myinshi kurusha na leta ku buryo ari ikintu gikomeye iyo bemeye iryo hame ry’iterambere ry’umugore n’uburinganire, bihita bigera no ku baturage benshi.’’

Umuyobozi wa NFR Group, Mbundu Faustin, yabwiye IGIHE ko guteza imbere umugore ari ingenzi mu bikorwa bibyara inyungu, kuko banamaze kugaragaza ubushobozi bifitemo.

Ati “Ibigo byose mfite, byaba mu bwikorezi, ubwubatsi, ubugenzuzi, ubuhinzi, ibyo mfitemo imigabane, ibyinshi biyoborwa n’abagore kurusha abagabo. Ibyo nsinya uyu munsi ni ibyo nsanzwe nkora, ahubwo ni ukugira ngo mbyumvishe abandi. Abagore bagira ukwiyemeza, uzarebe nko mu mabanki n’ahandi, usanga umushinga uyoborwa n’umugore utera imbere. Ikindintibapfa gukoresha imitungo nabi. Si ukuvuga ko aro abagabo babikora gusa, ariko nkurikije ubushobozi bagaragaza, buri wese akwiye kwiyemeza kubashyigikira.’’

Biteganyijwe ko mu cyumweru gitaha, Perezida Kagame nk’umwe mu bakuru b’ibihugu 10 barangaje imbere iyi gahunda, azagaragaza raporo y’aho iki gikorwa kigeze, mugikorwa kizahurirana n’Inteko Rusange y’Umuryango w’Abibumbye.

U Rwanda ruheruka kuza ku mwanya wa mbere muri Afurika n’urwa 7 ku Isi mu kuziba icyuho mu buringanire, ndetse Perezida Kagame akaba yarasabye ko Abanyarwanda basinya kuri gahunda ya HeforShe bagera ku 500 000.

Abitabiriye itangizwa rya gahunda ya HeforShe mu nzego z'abikorera

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved