Kwamamaza

Abanyarwanda basubije Tanzania yabashinje kubatwara imirimo ku cyambu cya Dar es Salaam

Yanditswe kuya 21-09-2016 saa 17:15' na Rabbi Malo Umucunguzi


Abanyarwanda basubije Urwego ruhagarariye abunganira abasora muri za gasutamo muri Tanzania yabashinje kubatwara imirimo ku cyambu cya Dar es Salaam.

Urwego ruhagarariye abunganira abasora muri za gasutamo mu Rwanda (ADR), rwagaragaje ko rudafite intego yo gutwara imirimo iboneka ku cyambu cya Tanzania nk’uko ruherutse kubishinjwa n’urwego nk’uru rwo muri Tanzania.

Mu Cyumweru gishize nibwo Umuyobozi w’Inama y’Ubutegetsi w’Ihuriro ry’Ibigo bitanga serivisi zo kwambutsa ibicuruzwa muri Tanzania, TAFFA, Steven Ngatunga, yasabye guverinoma y’icyo gihugu ko itaha agaciro ubusabe bw’u Rwanda rushaka ko Abanyarwanda bazajya kumenyekanishiriza ibicuruzwa byarwo byinjira muri gasutamo ku cyambu cya Dar es Salaam.

Nk’uko icyo gihe byatangajwe na The Citizen, Ngatunga yabyise ko Abanyarwanda bashaka “kubahenda ubwenge”, bikazatuma abenegihugu batabona imirimo kuko bazaba bayisangiye n’Abanyarwanda.

Yagize ati “Barashaka kuduhenda ubwenge birengagije ko amasezerano yo guhuza za gasutamo agena ko abanyamuryango baturutse mu kindi gihugu bategura ibyangombwa by’imizigo yabo, bakabishyikiriza bagenzi babo mu gihugu icyambu giherereyemo akaba ari cyo kibisuzuma.’’

Umuyobozi w’Urwego rw’Abunganira Abasora kuri za gasutamo ku ruhande rw’u Rwanda, Seka Fred, yabwiye IGIHE ko itsinda ry’Abanyarwanda ryari i Dar es Salaam kuwa 30 na 31 Kanama, rikabonana n’inzego zirimo Ikigo cy’Igihugu gishinzwe ibyambu, Ikigo cy’Imisoro n’Amahoro muri Tanzania n’ibigo byambutsa imizigo.

Yagize ati “Twebwe nk’ibigo bifasha abasora ntabwo tugiye gukora akazi k’Abanyatanzaniya, tugiye gukora akazi k’u Rwanda. Ni muri gahunda yo guhuza za gasutamo (Single Customs Territory), imisoro izakomeza iza mu Rwanda ariko ikabarurirwa Mombasa cyangwa Dar es Salaam.’’

Seka yavuze ko u Rwanda rufite ibigo bifasha abasora 164, ariko 30 byonyine nibyo byemerewe gukoresha ikoranabuhanga ry’Ikigo cy’Imisoro n’Amahoro cya Tanzania nubwo nabo batemerewe kwinjira mu cyambu cya Dar es Salaam, ahubwo bakoreraga hanze yacyo.

Ati “Icyari kitujyanye ni ukugira ngo bemererwe kwinjira mu cyambu, ngo babashe gukurikirana imizigo y’u Rwanda nubwo yakorwaho n’Abanyatanzaniya, kuko hari ubwo batinda kuyipakira.”

“Biramutse bikozwe nta muzigo watakara, nta muzigo wabura, ni ukugira ngo bigabanye amafaranga atangwa kuko nta makuru tuba dufite ku mizigo yacu iri ku cyambu. Ni ugukurikirana imizigo kuva ipakirwa, kugeza igeze i Kigali. Abanyatanzaniya bazakora akazi kabo, natwe dukore akacu maze dushake uko dukorana.’’

Seka yavuze ko aba banyarwanda bunganira abohereza cyangwa batumiza ibintu mu mahanga, bakabamenyekanishiriza umusoro kandi n’uburenganzira bwo kuwupakira.

Umuyobozi w’Urwego rw’Abunganira Abasora kuri za gasutamo ku ruhande rw’u Rwanda, Seka Fred

Vincent Safari ukorana na Minisiteri y’Ubucuruzi n’Inganda muri Komite ishinzwe ubuvugizi bwo gukuraho imbogamizi z’ubucuruzi zitari imisoro n’amahoro (Non-Tariff Barriers-NTBs), yabwiye IGIHE ko Steven Ngatunga yaba yaravuze ko Abanyarwanda bashaka gutwara imirimo y’Abanyatanzaniya “adafite amakuru nyayo ku mpamvu y’uruzinduko rwabo i Dar es Salaam.”

Ati “Ibyari bitujyanye ni uburyo bwo kwimenyekanishiriza ibicuruzwa bikihuta bitabanje guca mu nzira zose bisanzwe bicamo. Ubusanzwe abafasha abasora babikoreraga Dar es Salaam, bikajya ku mupaka, bigakomeza MAGERWA bigatwara n’amafaranga menshi yo kubimenyekanisha. Ibyo dushaka ni uko nk’imodoka niba baramenyekanishirije Dar es Salaam, ni ukuyizana bahita bashyiraho plaque (ibirango) gusa.’’

“Abanyarwanda bamaze igihe bakorayo, ariko bakigerayo ntabwo byahise bikunda ko bahita bakora muburyo basanzwe bakoramo. Ubwo twagiye duherekeje abikorera ngo tubafashe muri ibyo biganiro.’’

Iki cyambu cya Dar es Salaam mu gihe cyashize cyakunze gutera ibibazo Abanyarwanda, aho imizigo itabarika yagiye ihaburira cyane cyane iy’amabuye y’agaciro, mu gihe kinyuzwaho ibicuruzwa bisaga 70% y’ibyo u Rwanda rwohereza cyangwa rutumiza mu mahanga.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved