Abaguzi barakangurirwa kwibohora ku babaha serivisi zitanoze

Yanditswe na Uwishyaka Jean Louis
Kuya 1 Nzeri 2016 saa 03:19
Yasuwe :
0 0

Mu gihe hari aho abantu bajya bakaba biteze guhabwa serivisi nziza, batanazihabwa bakagaragaza ko batabyishimiye, hari n’ahandi bajya ugasanga batazihawe aho kugira icyo bavuga bakabifashe nk’aho ari ko byagakwiye kugenda.

Ibi ariko si ko bikwiye kugenda kuko haba harimo kwirengagiza no kudaharanira uburengenzira nk’umuguzi bigatuma serivisi nziza yagakwiye guhabwa atazigezwaho.

Mu kiganiro n’abanyamakuru kuri uyu wa 31 Kanama 2016, Umuyobozi w’ishami rishinzwe imitangire ya serivisi nziza mu Kigo cy’igihugu gishinzwe iterambere, RDB, Yves Ngenzi yagaragaje ko ari ikibazo gikomeye kuba imyumvire ku burengenzira bw’umukiliya ikiri hasi.

Ati” Mu rwego urwo ari rwo rwose umukiliya aba akwiye kubona serivisi nziza, cyane cyane mu bikorera ho ni akarusho kuko uba utwaye amafaranga yawe. Ikintu cya mbere dukangurira abaguzi ni uko badakwiye gutanga amafaranga yabo ahantu babona serivisi batishimiye.”

Yakomeje avuga ko kuri ubu itsinda rishinzwe kugenzura imitangire ya serivisi mu nzego z’abikorera ryatangiye gukora ubukangurambaga bibanda ku maduka mato n’amanini, station za Essence, amagaraji (garage) ndetse n’aho batunganyiriza imisatsi (hair saloon) kuko ari ho usanga abakiliya badahabwa serivisi nziza bakabifata nk’ibisanzwe.

Umuyobozi w’ishyirahamwe riharanira uburenganzira bw’umuguzi (ADECOR), Ndizeye Damien yavuze ko batakwigisha abacuruzi ngo basige abaguzi kuko hari ubwo bajya kugura ariko ugasanga bemeye ibyo bahawe byose nta kugaragaza ikibabangamiye.

Yakomeje avuga ko umuguzi yagakwiye kumenya ko afite uburenganzira ku buzima bwiza, kwihitiramo no gutegwa amatwi no guhabwa amakuru ashoboka ku kintu agiye kugura.

Yanagarutse kandi ku kijyanye n’amabanki, avuga ko umuntu ugiyemo yajya ahabwa amakuru yose ashoboka ku bijyanye n’ubwoko bwa konti afunguriwe, inyungu azatanga ku nguzanyo yatse ndetse n’amasezerano akajya ashyirwa mu rurimi yumva kugira ngo abashe gusobanukirwa ibyo asinye.

Itsinda rishinzwe kugenzura imitangire ya serivisi mu nzego z’abikorera, rihuriwemo na RDB, Minisiteri y’ubucuruzi n’inganda, Ikigo cy’igihugu gishinzwe imiyoborere (RGB) n’ibindi bigo bifite aho bihurira n’itangwa rya serivisi. Abagize iri tsinda bari kugenzura ibigo by’ubucuruzi bitandukanye aho bagirwa inama z’uburyo barushaho gufata neza abakiliya.

Mu bigo byasuwe kuri uyu wa 31 Kanama 2016, birimo aho batunganyiriza imisatsi, aho bagaragarijwe uburyo ari ingenzi kugira umwambaro wabugenewe, aho kujugunya imyanda, ibyuma byica udukoko tuba twagiye mu bikoresho bakoresha ndetse no kugaragaza ibiciro bya serivisi batanga.

N’igikorwa kizamara icyumweru cyose, aho biteganyijwe ko ibigo 40 ari byo bizagenzurwa n’abagize iri tsinda.

Kugeza ubu ibipimo bigaragaza ko gutanga serivisi nziza mu bigo by’abikorera biri ku kigero cya 65%, intego ikaba ari ukugera kuri 80% mu 2018 ubwo gahunda y’imbaturabukungu, EDPRS II izaba igeze ku musozo.

Umuyobozi w'ishami rishinzwe imitangire ya serivisi nziza muri RDB, Yves Ngenzi
Abagize itsinda rishinzwe kugenzura imitangire ya serivisi mu nzego z'abikorera
Salon zasuwe zasabwe kuvugurura ibintu bitandukanye birimo n'imyambaro y'akazi
Abatunganya imisatsi basabwe kujya bahorana amazi ashyushye kuko akenerwa cyane n'ababagana
Icyuma cyica udukoko duto (microbes) ziba zagiye mu byuma bikoreshwa mu gutunganya inzara

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244