2018: U Rwanda rwohereje mu mahanga ibicuruzwa bifite agaciro ka miliyoni 995.7 z’amadolari

Yanditswe na Mukaneza M.Ange
Kuya 21 Gashyantare 2019 saa 11:03
Yasuwe :
0 0

Banki Nkuru y’Igihugu, BNR, yatangaje ko mu mwaka ushize wa 2018, u Rwanda rwohereje mu mahanga ibicuruzwa bifite agaciro ka miliyoni 995.7$ avuye kuri miliyoni 943.5$ mu 2017.

Ibi byatangajwe kuri uyu wa 21 Gashyantare 2019 mu muhango wo kwerekana ishusho ya politiki y’imicungire y’urwego rw’imari n’aho agaciro k’ifaranga ry’igihugu gahagaze.

BNR yagaragaraje ko nubwo ibyoherejwe mu mahanga byiyongereye, ikinyuranyo cy’ibitumizwa mu mahanga cyo cyazamutse ku kigero 12.4%.

Guverineri wa Banki Nkuru y’Igihugu, John Rwangombwa, yasobanuye ko iki cyuho cyaturutse ku kuba ibyatumijwe mu mahanga byariyongereye ku kigero cya 9.5%, ibyoherejwe nabyo byiyongera ku kigero cya 5.5%.

Ati “ Ibi byatumye inyungu u Rwanda rukura mu byo rwohereza mu mahanga igabanuka igera kuri 41.1% mu 2018, ivuye kuri 42.6% mu 2017”.

Mu 2018 u Rwanda rwatumije ibicuruzwa bifite agaciro ka miliyoni 2 425 z’amadolari, bivuye ku bya miliyoni 2215.5$ byari byatumijwe mu 2017.

BNR isobanura ko uku kwiyongera kw’ibitumizwa hanze kwaturutse ku mishinga minini y’ibikorwaremezo iri gukorwa irimo Uruganda rw’amashanyarazi akomoka kuri Nyiramugengeri ruri kubakwa mu Karere ka Gisagara, Ikibuga cy’Indege cya Bugesera, imihanda itandukanye ndetse n’igurwa ry’ibicuruzwa bikenerwa mu nganda.

Rwangombwa kandi yavuze ko nubwo kugeza ubu batahita basobanura ingaruka gahunda ya ‘Made in Rwanda’ igamije guteza imbere ibikorerwa mu gihugu yagize ku nyungu ituruka mu byoherezwa hanze, kwiyongera kwa bimwe mu byoherejwe biyishamikiyeho bigaragaza ko itangiye gutanga umusaruro.

Ibi bigaragarira mu kuba ibyoherejwe mu mahanga byariyongereye aho nk’agaciro k’imyenda yoherejwe kiyongereye ku kigero cya 46.9% kagera kuri miliyoni 6.28$ zivuye kuri miliyoni 4.28 z’amadolari mu 2017, ibyuma n’ibibikomokaho byo byiyongereye ku kigero cya 81.6%, byinjiza miliyoni 9.31 z’amadolari zivuye kuri miliyoni 5.13$ zari zinjijwe mu 2017.

Ibyo u Rwanda rwohereza mu mahanga cyane birimo ikawa, icyayi, ibireti n’amabuye y’agaciro nabyo byiyongereye ku buryo bushimishije kuko byinjije miliyoni 312.7 z’amadolari zivuye kuri miliyoni 284$ yari yinjijwe mu 2017.

Guverineri wa Banki Nkuru y'Igihugu, John Rwangombwa, ubwo yagezaga ku bitabiriye uko ubukungu bw'u Rwanda buhagaze
Rwangombwa yagaragaje ko imwe mu mpamvu yatumye ibyo u Rwanda rutumiza mu muhanga byiyongera harimo ibikorwaremezo biri kubakwa muri iki gihe

Amafoto: Himbaza Pacifique

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza