Uturere tune tugiye kubakirwa imihanda hakoreshejwe ikoranabuhanga rya ‘Do-nou’

Yanditswe na Jean Pierre Tuyisenge
Kuya 1 Werurwe 2018 saa 06:39
Yasuwe :
0 0

Ambasade y’u Buyapani mu Rwanda yasinyanye n’Umuryango w’Abayapani utera inkunga imishinga yo kubaka imihanda wa CORE, amasezerano y’impano y’amadolari 294992 agiye gufasha mu kubaka imihanda mu turere twa Rulindo, Gakenke, Nyamasheke na Rusizi hifashishijwe ikoranabuhanga rya ‘Do-nou.

CORE yasobanuye ko ikoranabuhanga rya Do-nou rikoreshwa mu gukora iyo mihanda, rikoresha ibikoresho bidahenze kandi byoroshye kubona, aho bafata ibitaka bakarunda mu mifuka hanyuma bagasiza neza ku buryo uba umuhanga nyabagendwa.

Ubwo yashyiraga umukono kuri ayo masezerano ku wa 1 Werurwe 2018, Ambasaderi w’u Buyapani mu Rwanda, Miyashita Takayuki, yavuze ko bizafasha abaturage bo muri utwo turere guhahirana no kugenderana, bikazanaha abatari bake akazi.

Yagize ati “Uyu mushinga ukoresha ibintu bike ariko ukagira akamaro kanini cyane, gutunganya iyo mihanda rero bizafasha guhuza imijyi n’ibyaro bikazagira uruhare mu iterambere ry’igihugu kandi abasore n’inkumi b’Abanyarwanda bagera ku 168 bazahabwa akazi mu gutunga iyo mihanda.”

Yavuze ko basanze mu Rwanda hari imihanda myiza mu mujyi ariko hakaba hari aho mu bice by’icyaro biba ikibazo cyane cyane iyo imvura yaguye; uwo mushinga ukazafasha mu gusana iyo mihanda y’imigenderano .

Umuyobozi w’uwo mushinga mu Rwanda, Kei Nakajima, yavuze ko iryo koranabuhanga bifuje kurizana mu Rwanda kuko ridahenze kandi rikoresha ibintu biciriritse, avuga ko ryakoreshejwe n’ahandi ndetse rikabyara umusaruro.

Yagize ati “Iri koranabuhanga ryatanze umusaruro n’ahandi hirya no hino ku Isi aho ryagiye rikoreshwa; navuga muri Aziya, Amerika y’Epfo, muri Kenya no mu Buyapani. Usibye kuba bizorohereza mu gutwara abantu n’ibintu, bizanatuma urubyiruko rwihangira imirimo kuko tuzabanza kubahugura hanyuma nabo bakazakoramo ibigo byabo byubaka imihanda nk’iyo hirya no hino mu turere.”

Do-nou ni uburyo bwavumbuwe n’umuhanga mu by’ubwubatsi witwa M.Kimura warangije muri Kaminuza ya Kyoto. Bukoreshwa mu kubaka imihanda, amateme, no gutinda ahantu haba hakenewe imihanda kandi ari mu bishanga.

Biteganyijwe ko uwo mushinga uzahera muri utwo turere dutatu mu gihe cy’umwaka, nyuma yawo ukazakomereza mu tundi tune buri mwaka.

Ambasade y’u Buyapani mu Rwanda yasinyanye n’Umuryango w’Abayapani utera inkunga imishinga yo kubaka imihanda wa CORE
Ambasaderi w’u Buyapani mu Rwanda, Miyashita Takayuki
Umuyobozi w’umushinga wa CORE, Kei Nakajima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza