Kwamamaza

U Rwanda rwiyemeje gukuraho 11% by’abataragerwaho na serivisi z’imari

Yanditswe kuya 1-11-2016 saa 14:05' na Mukaneza M. Ange


U Rwanda rwifatanyije n’isi yose mu kwizihiza umunsi mpuzamahanga wo kuzigama, aho wizihijwe hakangurirwa abanyarwanda kugira umuco wo kwizigama ndetse, igihugu cyiha intego yo gukuraho 11% by’abataragerwaho na serivisi z’imari.

Umunsi mpuzamahanga wo kuzigama wizihizwa ku itariki 31 Ukwakira. Washyizweho mu 1924 mu nama ya mbere ku bijyanye no kuzigama yabareye i Milan mu Butaliyani, utangira kwizihizwa ku isi yose mu 1989 nyuma yo kwemezwa n’Umuryango w’Abibumbye.

Ubushakashatsi bwakozwe ku buryo Abanyarwanda bagerwaho na serivisi z’imari, FinScope Survey 2016, bwagaragaje ko Abanyarwanda 89% bagerwaho na serivisi z’imari, bakaba bariyongereye cyane ugereranyije na 72% bo mu 2012 na 48% bagerwagaho n’izi serivisi mu 2008.

Uku kwiyongera kw’abagerwaho na serivisi z’imari kandi byagize uruhare runini mu kuzamura umubare w’abitabira kuzigama kuko ubu bageze ku kigero cya 86% bavuye kuri 71% mu 2012.

Leta ivuga ko ifatanyjije n’abafatanyabikorwa bayo bazakomeza gushyira ingufu mu gushinga no kongera ibigo by’imari by’Umurenge SACCO, abakorana n’amabanki (bank agents), gushyira ingufu mu buryo bwo gukoresha telefoni (mobile money) n’ubundi.

Minisitiri w’Imari n’Igenamigambi, Ambasaderi Claver Gatete, yavuze ko binyuze mu buryo butandukanye bugamije kugeza ku banyarwanda serivisi z’imari, u Rwanda rufite intego yo gukuraho inzitizi kuri 11% by’abanyarwanda basa n’abasigaye inyuma muri iyo gahunda, banaharanira ko 89% by’abamaze kugerwaho na zo babasha kurushaho kwitabira kuzigama.

Ati”Twifashishije uburyo bunyuranye bwo gukomeza gutanga serivisi z’imari, turifuza gukuraho 11% by’abanyarwanda basigaye bataragerwaho n’izi serivisi, ndetse no kwizera neza ko n’abo 89% bagerwaho na zo zibafasha kwizigamira. Kwigira ntibishobora kugerwaho igihe abanyarwanda batagerwaho na serivisi z’imari zibafasha kwizigama. Mu gihe twizihiza umunsi mpuzamahanga wo kuzigama turashishikariza abanyarwanda kugira umuco wo kwizigama nk’inzira nyayo yo kwigira.”

Mu kwizihiza uyu munsi kandi Minisiteri y’Imari n’Igenamigambi ku bufatanye na Banki Nkuru y’igihugu ndetse n’abandi bafatanyabikorwa, bateguye icyumweru cy’ubukangurambaga bwo kwizigama cyari gifite insanganyamastiko igira iti "Kuzigama, Inzira nyayo yo kwigira."

Iyi nsanganyamatsiko ijyanye n’intego u Rwanda rwihaye yo kuba mu 2020 ruzaba rubarizwa mu bihugu bifite ubukungu buringaniye.

Mu bikorwa bitandukanye byakozwe harimo kwereka abanyarwanda serivisi zitandukanye z’imari bashobora kugeraho bifashishije ikoranabuhanga, kwereka abanyarwanda inyungu ziri mu kuzigama, ibiganiro mpaka mu mashuri, ubutumwa bukangurira abantu kwizigamira bwatangiwe mu muganda n’ibindi.

Minisitiri Gatete avuga ko nta terambere ryagerwaho hatabayeho umuco wo kuzigama

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved