Kwamamaza

U Rwanda ntiruri mu bihugu bya Afurika bikeneye inkunga y’ibiribwa

Yanditswe kuya 15-09-2016 saa 09:17' na Cyprien Niyomwungeri


Raporo y’Ishami ry’Umuryango w’Abibumbye ryita ku buhinzi n’ibiribwa, FAO, igaragaza ko mu bihugu 28 bya Afurika bikeneye imfashanyo y’ibiribwa mu buryo bwihutirwa, u Rwanda rutarimo.

Iyo raporo ivuga ku miterere y’umusaruro n’ibiribwa muri Nzeri 2016, yerekana ko ibihugu 36 ku Isi harimo 28 byo muri Afurika bikeneye inkunga y’ibiribwa biturutse mu bindi bihugu.

Ibivugwa n’iyi raporo ntaho bitaniye n’ibya Minisiteri y’Ubuhinzi n’Ubworozi idahwema gutangaza ko abavuga ko mu Rwanda hari inzara bakabya nubwo hari imirenge yo mu Ntara y’i Burasirazuba yahuye n’ikibazo cy’amapfa.

Ku rundi ruhande ariko hari abavuga ko mu Rwanda hari inzara babishingiye ko hari imwe mu mirenge y’Uturere twa Kayonza, Nyagatare na Kirehe, leta ifasha kubona ibiribwa guhera muri Mutarama 2016 no kuba ibiciro by’ibiribwa bikomeje kwiyongera ku masoko.

Raporo ya FAO, ivuga ko mu Burundi abagera kuri miliyoni 2.3 bo mu ntara za Kirundo, Muyinga, Rutada, Makamba ndetse no mu bice by’icyaro bya Bujumbura bashonje cyane.

Ivuga ko amakimbirane muri Nigeria na Sudani y’Epfo ndetse n’amapfa aturuka kuri El Niño byagabanyije umusaruro, bigatuma ibiribwa bibura muri Afurika mu mwaka wa 2016.

Mu mpera za Werurwe 2016, abaturage babarirwa mu bihumbi 28,600 bo muri Centrafrique bahungiye muri Congo Brazzaville, mu gihe ababarirwa muri miliyoni 5.9 bo mu Burasirazuba n’Amajyepfo ya Repubulika Iharanira Demokarasi ya Congo bashegeshwe n’amakimbirane yo muri izo ntara bakeneye ubufasha bwihuse.

Abarenga miliyoni 4.8 barashonje cyane kubera imvururu zo muri Sudani y’Epfo, guhagarika ubucuruzi n’ibiciro byiyongereye ku masoko.

Ababarirwa mu bihumbi 640 muri Kenya cyane cyane abo mu Majyaruguru y’Uburasirazuba n’abo mu Majyepfo y’Uburasirazuba mu bice bitunzwe n’ubworozi cyane, barashonje bikomeye bitewe n’imvura nkeya yaguye muri Werurwe kugeza Gicurasi.

Umuyobozi Mukuru wa FAO, José Graziano da Silva

Muri Ethiopia, amapfa yatubije umusaruro w’ubuhinzi bituma abagera kuri miliyoni 9.7 bibasirwa n’inzara ikomeye. Raporo yagaragaje ko muri Uganda abagera ku bihumbi 393 mu gace ka Karamoja bashonje bikomeye bitewe n’imvura yaguye nabi.

Muri rusange ibice bitandukanye by’Isi byagiye bihura n’amapfa yatumye umusaruro cyane cyane uw’ibinyampeke utuba ugereranyije n’uwari witezwe.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved