Kwamamaza

U Rwanda na Singapore basinyanye amasezerano y’ubufatanye mu by’imyubakire

Yanditswe kuya 8-09-2016 saa 12:36' na IGIHE


U Rwanda na Singapore byasinyanye amasezerano mu bijyanye no guteza imbere imyubakire mu Rwanda, umuhango wabereye muri Singapore ku mugoroba wo ku wa Gatatu tariki ya 7 Nzeri 2016.

Ku ruhande rw’u Rwanda, aya masezerano yashyizweho umukono na Didier Sagashya, Umuyobozi Mukuru w’Ikigo cy’Igihugu gishinzwe guteza imbere imyubakire(Rwanda Housing Authority) naho ku ruhande rwa Singapore hari Choo Whatt BIN uhagarariye ikigo cy’iki gihugu gishinzwe inyubako n’imyubakire (Building and Construction Authority).

Hari kandi na Ambasaderi w’u Rwanda muri Singapore, Guillaume Kavaruganda ndetse na Minisitiri wa Singapore ushinzwe Amajyambere rusange, Desmond LEE.

Ayo masezerano yashyizweho umukono ku mpande zombi, agamije guhugura abanyarwanda mu bijyanye no kubaka inzu hitawe cyane cyane ku kuzigama amashanyarazi, gazi n’amazi inyubako ikoresha.

Agamije kandi guhugura abanyarwanda mu kugabanya ibikoresho bigenda ku nyubako nka sima n’ibindi bikoresho bityo bikagabanya amafaranga n’umwanya bigenda mu myubakire, bitabujije inzu gukomera no kugira isura nziza.

Ibi byose kandi ngo bikorwa hubahirijwe ibidukikije. Inzu zubatswe hakurikije ibi byose zihabwa icyemezo by’umwihariko ku mahoteli ngo bikayafasha kurushaho kubona abakiriya.

Singapore iri mu bihugu bikize cyane ku Isi, ikaba ari igihugu gito cyane(kingana na km 2 719 ni ukuvuga ko ari igihugu cyenda kungana n’Umujyi wa Kigali) ariko ikaba ituwe cyane(miliyoni zikabakaba esheshatu).

Ubuto bw’igihugu n’ubucucike bw’abaturage ba Singapore byatumye bagera ku myubakire irimo ubuhanga buhambaye mu bijyanye no kubungabunga amazi, amashanyarazi, gazi, ibidukikije, ubwiza ndetse n’imikomerere y’amazu ahubatse. Ibi biha iki gihugu kuba mu bihugu byihuta cyane mu iterambere.

U Rwanda na Singapore bifitanye ubufatanye mu nzego zinyuranye, aho nk’igishushanyo mbonera cy’umujyi wa Kigali cyubatswe ku bufatanye n’impuguke zo muri Singapore(Surbanajurong). Impuguke zo muri Singapore kandi zifasha u Rwanda mu kurwereka ibyo imijyi itandatu izunganira Umujyi wa Kigali(Muhanga, Nyagatare, Huye, Musanze, Rusizi na Rubavu) yakwibandaho kugira ngo igere ku iterambere rirambye.

Ubu bufatanye n’umubano mwiza hagati y’ibi bihugu kandi ushimangirwa n’uko ubu umunyarwanda ugenderera Singapore adasabwa viza iyo agiye muri iki gihugu azahamara iminsi itarenze 30.

Umwe mu mijyi y'ubucuruzi muri Singapore
Agace ka Marina Bay Sand ahantu abantu bakunda gusohokera cyane
Ikirwa cya Sentosa cyo muri Singapore buri mwaka cyakira ba mukerarugendo miliyoni 20 baba baje kwishimisha
Didier Sagashya (iburyo) asinya amasezerano y'ubufatanye na Singapore

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 29 Nzeri 2016
Copyright © 2009 -2014 - IGIHE Ltd - All Rights Reserved