Kwamamaza

U Rwanda mu bihugu byashimiwe kuba bitaraheranwe n’ihungabana ry’ubukungu bw’Isi

Yanditswe kuya 27-10-2016 saa 21:52' na Jean Louis Uwishyaka


Ikigega Mpuzamahanaga cy’Imari IMF kiratangaza ko muri rusange mu rwego rw’Isi ubukungu bwasubiye inyuma, ariko kigashima ingufu ibihugu byo munsi y’ubutayu bwa Sahara harimo n’u Rwanda byashyizemo mu guhangana n’iryo hungabana ry’ubukungu.

Ubwo iki kigega cyamurikiraga inzego zitandukanye zifite aho zihuriye n’ubukungu mu Rwanda, ishusho y’ubukungu ku Isi no mu Karere u Rwanda ruherereyemo kuri uyu wa Kane, cyagaragaje ko ku Isi hose ubukungu bwasubiye nyuma bitewe n’ibibazo bitandukanye bigenda bigaragara.

Nubwo bimeze bityo ariko, impuguke z’iki kigega zigizwe na Laure Redifer na Alun Thomas bagihagarariye mu Rwanda, zigaragaza ko bimwe mu bihugu biri munsi y’ubutayu bwa Sahara harimo n’u Rwanda, byagerageje kubyitwaramo neza bifata ingamba zituma ubukungu bwabyo butazahara cyane.

Bagaragaje ko ubukungu bw’u Rwanda bwazamutse ku kigero cya 6,9% umwaka ushize, mu gihe uyu mwaka buzazamukaho 6%.

IMF kandi igaragaza ko ifite icyizere ko aka karere kazakomeza guhangana n’iki kibazo, bitewe n’uko bateganya ko ubukungu bwako buzazamukaho 1.4% muri uyu mwaka, mu gihe umwaka utaha buzazamuka ku kigero cya 3%.

Izamuka ry’ibiciro ku masoko nk’imwe mu nzitizi

IMF yagaragaje ko ibihugu birimo u Rwanda byahuye n’ikibazo cy’izamuka ry’ibiciro, aho bagaragaza ko ahanini ryaturutse ku ihindagurika ry’ibihe n’izamuka ry’ibiciro by’ibiribwa kandi ko ibyo utabisubiza inyuma.

Ikigo cy’igihugu cy’Ibarurishamibare mu Rwanda (NISR) giherutse gutangaza ko ibiciro ku masoko mu Rwanda muri Nyakanga byazamutseho 7.8%. Iki kigo kigaragaza ko bimwe mu byatumye ibiciro byiyongera kuri iki kigero ari ibiciro by’ibiribwa n’ibinyobwa bidasembuye byazamutseho 14,3%, ibiciro by’amazu, amazi, amashanyarazi, gazi n’ibindi bicanwa byazamutseho 2,0% n’ibiciro by’ibijyanye n’ubwikorezi byazamutseho 5,9%.

Izi mpuguke zitanga inama kuri iki kibazo zirimo kwitabira gahunda zo guhangana n’ihindagurika ry’ibihe nko kuhira imyaka n’ibindi.

Avuga kuri iki cyegeranyo, Prof Thomas Kigabo uyobora ikigo EPRN gifasha mu bushakashatsi bukorwa kuri politiki z’ubukungu mu Rwanda, avuga ko ari ibyo kwishimira kuba ubukungu bw’aka karere bugenda butera imbere kabone n’ubwo ku Isi muri rusange butifashe neza.

Ati "Ni byiza ko mu bihugu bike bavuze bidafite ibibazo bikomeye mu bukungu nk’ibindi, ari ibyo muri aka karere; u Rwanda, Tanzania, Kenya na Uganda. Ni ukuvuga ko ibindi bihugu bihura n’ibibazo, ariko natwe muri Afurika y’u Burasirazuba ntibivuga ko nta ngorane duhura nazo ariko icyangombwa kandi cyiza ni uko nubwo Isi yose ifite ibibazo ariko mu karere ka Afurika y’u Burasirazuba biragaragara ko twebwe mu rwego rw’ubukungu tucyifashe neza."

Avuga ko bitewe n’uko u Rwanda rudafite ibibazo bikabije by’ubukungu, bikwiye guha ingufu buri wese agakora cyane, arushaho kongera umusaruro bityo igihugu kigatera imbere.

Ubukungu bw’Isi biteganyijwe ko buzaba buri ku kigero cya 3.1% uyu mwaka, mbere y’uko bwongera kuzamuka ku ijanisha rya 3.4 mu 2017.

Igabanuka ry’ubukungu bw’Isi rishingirwa ahanini ku ihungabana ry’ubukungu bwa bimwe mu bihugu by’ibihangange ku Isi nk’u Bushinwa, igabanuka ry’ibiciro by’ibikomoka kuri peteroli n’ibindi.

Prof Kigabo avuga ko nubwo ubukungu bw'Isi bwahungabanye, bishimishije kuba u Rwanda ruri mu bihugu bike bifite ubukungu bwifashe neza

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved