U Rwanda mu bihugu bizaba bifite abakire benshi mu myaka 10 iri imbere

Yanditswe na Mukaneza M.Ange
Kuya 17 Nzeri 2018 saa 06:17
Yasuwe :
0 0

U Rwanda rwashyize mu bihugu bifite abakire bagenda biyongera cyane muri Afurika y’Iburasirazuba, aho byitezwe ko mu myaka 10 iri imbere rushobora kuzaba ruri mu bya mbere ku mugabane wose.

Ibi byagaragajwe na raporo yakozwe na AfrAsia Bank, igaragaza ko muri rusange ubukire muri Afurika bwazamutse ku kigero cya 13% mu myaka 10 ishize na 3% mu 2017, aho ibirwa bya Maurice biri ku mwanya wa mbere mu kuzamuka.

Muri Afurika y’Iburasirazuba, u Rwanda rwaje ku mwanya wa mbere mu kugira ubukire bwiyongere ku kigero cya 74%, rukurikirwa na Kenya iri kuri 73% na Tanzania iri kuri 66% mu gihe Uganda yo ifite 56%.

Nk’uko The EastAfrican yabyanditse, kugera mu mpera za 2017, Kenya niyo yari imbere mu kugira abaherwe benshi aho bose batunze miliyari 104 z’amadolari, igakurikirwa na Tanzania na Ethiopia bifite miliyri 60$.

Ku mugabane wose Afurika y’Epfo niyo ya mbere, ifite abaherwe batunze miliyari 722 z’amadolari, igarukirwa na Misiri ifite miliyari 330 z’amadolari na Nigeria ifite miliyari 253 z’amadolari.

Mu birebana n’imijyi ibarizwamo abaherwe benshi, Johannesburg niyo iri imbere aho umutungo wabo wose ungana na miliyari 276 z’amadolari, muri Afurika y’Uburasirazuba Nairobi yahize indi kuko ifite abaherwe batunze miliyari 54$,

Iyi raporo igaragaza ko byibura buri muturage wa Afurika afite umutungo ungana na 2000 by’amadolari. Habarurwa kandi abaherwe bagera ku bihumbi 148 batunze guhera kuri miliyoni imwe y’amadolari.

Abagera ku 7100 batunze kuva kuri miliyoni 10 z’amadolari, 320 bafite guhera kuri miliyoni 100 z’amadolari ndetse na 24 bafite umutungo ungana na miliyari imwe y’amadolari no hejuru yayo.

Nk’uko bigaragara muri iyi raporo, byitezwe ko muri rusange ubukire bw’abantu ku giti cyabo muri Afurika buzazamuka ku kigero cya 34% bukagera kuri tiriyoni 3.1 z’amadolari mu 2027 buvuye kuri tiriyoni 2.3$.

Ubukire bw’abaturage b’ibihugu birimo Mauritius, Ghana, u Rwanda na Uganda bwitezweho kuzamuka ku kigero kiri hagati ya 90% -150%.

Ni mu gihe Tanzania, Afurika y’Epfo, Angola, Maroc, Misiri na Côte d’Ivoire ubukire buziyongere ku kigero 10-30%, uku kugenda gake bikazaterwa na politiki n’izindi mpamvu z’ubukungu zikomeje gutuma abashoramari batishimira kuhakorera.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza