Kwamamaza

U Buyapani bwamuritse amafoto y’urugendo bwanyuzemo bwiteza imbere

Yanditswe kuya 21-10-2016 saa 17:33' na IGIHE


U Buyapani bwagaragaje ko bwiteguye gukomeza gukorana n’u Rwanda mu rugendo rugana ku iterambere rirambye, bushingira ku byo bwagezeho mu myaka 40 ishize, bwifashishije amafoto agaragaza ibihe igihugu cyagiye kinyuramo.

Muri iri murika ry’amafoto rizamara ibyumweru bibiri guhera kuri uyu wa Gatanu tariki 21 kugeza kuwa 6 Ugushyingo, mu nzu mberabyombi y’abafite ubumuga iruhande rwa Stade Amahoro mu Mujyi wa Kigali, abantu bazajya babasha kureba amafoto agaragaza urugendo rw’u Buyapani guhera mu myaka ya 1970 kugeza mu 2004.

Mu gutangiza iki gikorwa, Ambasaderi w’u Buyapani mu Rwanda, Takayuki Miyashika, yavuze ko buri gihugu kigira urugendo cyanyuzemo cyiteza imbere, hakaba n’ibyo gishobora kwigira ku kindi.

Ati “Twagize abantu bakora cyane mu Buyapani, bagira uruhare rukomeye mu guteza imbere imibereho y’abaturage. Uyu munsi turifuza kwereka Abanyarwanda ibyo twakoze mu myaka 40 ishize, kandi ibi bizaba nko guhana ubumenyi ku iterambere ryanyu.’’

Yakomeje agira ati “Ushobora kubona iterambere ry’u Buyapani mu ikoranabuhanga wifashishije amafoto, kandi ndatekereza ko icy’ingenzi ari uko twagerageje kwikorera ibintu byose. Mu Rwanda na ho bafite gahunda ya ‘Made in Rwanda’, birajya gusa. Twe twubatse nka gari ya moshi yihuta cyane mu ikoranabuhanga ryacu, kandi iyo rikorewe mu gihugu biba ari ingenzi cyane.’’

Ambasaderi Takayuki yavuze ko u Rwanda na rwo ruri mu cyerekezo kizima ari na yo mpamvu ruri gutera imbere cyane.

Inkunga y’u Buyapani mu iterambere ry’u Rwanda

Amb. Takayuki yavuze ko binyuze mu Kigo Mpuzamahanga cy’Abayapani gishinzwe ubutwererane, JICA, u Rwanda rubona inkunga zitandukanye, harimo nk’iyubakwa ry’ikiraro ku mupaka wa Rusumo uhuza u Rwanda na Tanzania, cyoroheje ubwikorezi na serivisi za gasutamo ku buryo mbere ibinyabiziga byahakoreshaga iminsi itatu, bihamara amasaha atanu.

Hari n’indi mishinga irimo inkunga inyuzwa mu Ishuri rikuru ry’Ikoranabuhanga rya Tumba, ibikoresho n’impuguke z’abarimu no kwegereza amazi meza ku baturage basaga 131 000 muri Kayonza na Rwamagana, mu Ntara y’Iburasirazuba.

Ati “Nk’urwego rw’ikoranabuhanga rwo rufite ahazaza heza cyane ku bw’umubano w’u Rwanda n’u Buyapani. Dufite Kaminuza ikomeye cyane mu Buyapani iri kwakira abanyeshuri basaga 20 ku mwaka biga mu cyiciro cya Gatatu cya Kaminuza(Masters). Nyuma y’ayo masomo bahabwa kwimenyereza imirimo mu bigo byo mu Buyapani, kandi bose banyijeje ko bagomba kugaruka mu Rwanda nyuma y’amasomo.’’

“Uyu munsi turi kwitegereza ibyo twakoze, iki ni igihugu cyanyu mugomba gufata icyemezo. Mufite gahunda zanyu kandi ibyo twakoze mu myaka 40 ishize, ubu biratandukanye kuko hari ibibazo turi guhura nabyo ku rwego mpuzamahanga. Gusa ibi ni ibintu mwareberaho mukagena uko igihugu cyanyu kizamera.’’

Amb. Takayuki yavuze ko inkunga bagenera u Rwanda igera kuri miliyari 3.2 z’ama Yen akoreshwa mu Buyapani, bakaba bifuza kubona u Rwanda ruteye imbere vuba bishoboka.’

Imibare ya JICA igaragaza ko nibura hagati ya 2006 na 2014, u Buyapani bwahaye u Rwanda inkunga igera kuri miliyoni $233.83 asaga miliyari 188 mu mafaranga y’u Rwanda.

Minisitiri wa Siporo n'Umuco, Uwacu Julienne na Ambasaderi w'u Buyapani mu Rwanda, Takayuki Miyashika
Minisitiri Uwacu Julienne na Ambasaderi Takayuki Miyashika berekwa iterambere ry'u Buyapani mu mafoto
Iki gikorwa cyitabiriwe n'abantu batandukanye
Ubuyapani buri mu bihugu byazamuye ubukungu bwabyo mu buryo bwihuse

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved