U Budage bwongereye inkunga buha u Rwanda igera kuri miliyari 66 Frw

Yanditswe na Rabbi Malo Umucunguzi
Kuya 18 Gicurasi 2017 saa 07:58
Yasuwe :
0 0

Guverinoma y’u Budage yongereye inkunga iha u Rwanda igera kuri miliyoni €81, ni ukuvuga agera kuri miliyari 66.3 Frw azatangwa mu myaka itatu iri imbere, hagati ya 2018-2020.

Iyi nkunga yemeranyijweho kuri uyu wa 18 Gicurasi nyuma y’ibiganiro byahuje Guverinoma y’u Rwanda n’iy’u Budage, ibiganiro bisanzwe bikorwa buri myaka itatu harebwa inzego zikeneye ubufatanye bushya.

Ibiheruka byabereye i Kigali mu Ugushyingo 2014 hasuzumwa ubufatanye bwo mu myaka ya 2015-2017, icyo gihe busozwa u Budage bwemereye u Rwanda miliyoni € 69.5.

Iyi nkunga nshya izajya mu nzego guverinoma y’u Rwanda ishyize imbere zirimo guteza imbere ubumenyingiro, imiyoborere no kwegereza abaturage ubuyobozi, guteza imbere urwego rw’abikorera, guhanga imirimo igenewe urubyiruko no guteza imbere urwego rw’imari.

Minisitiri w’Imari n’Igenamigambi, Amb Gatete Claver yabwiye itangazamakuru ko u Budage busanzwe ari incuti y’u Rwanda, aho burufasha mu nzego zitandukanye.

Yakomeje agira ati “U Budage ni umufatanyabikorwa ukomeye cyane, tukaba twaganiraga ku bufatanye bwacu bwari buri kugera ku musozo. Bwari busanzwe ari miliyoni 69.5 z’amayero, bakaba bemeye kuyongera akagera kuri miliyoni 81 z’amayero, kandi ndashaka gushimangira ko ari inkunga atari inguzanyo, igenewe imyaka itatu iri imbere.”

Yakomeje agira ati “Ibi birerekana ubufatanye bukomeje kwiyongera, ubucuti dufitanye na guverinoma y’u Budage, kandi hejuru y’ibi tumaze iminsi turi gukorana na guverinoma y’u Budage mu cyo twita ‘Compact with Africa’ kiyobowe n’u Budage nk’igihugu kiyoboye ihuriro ry’ibihugu 20 bikize ku Isi.”

Ni gahunda ibihugu 20 bikize ku isi biri gushaka gukoranamo n’inzego z’abikorera bikiyongera ku byo basanzwe bakorana na guverinoma z’ibihugu, hagamijwe gukemura ibibazo bikomeza kuzitira ishoramari ry’abikorera.

Muri iyo gahunda, u Rwanda rwatoranyijwe mu bihugu bya Afurika bizakorana na G20, birimo Senegal, Cote d’Ivoire, Maroc na Tunisia.

Minisitiri Gatete yanavuze ko u Rwanda ruri gukorana n’u Budage mu kureba ko abikorera benshi bo mu Budage baza gushora imari yabo ku isoko ryo mu Rwanda kuko bamaze kugaragaza ubushobozi bafite ku rwego rw’Isi.

Umuyobozi wari ukuriye itsinda ry’u Budage muri ibi biganiro, Andreas Gies, yavuze ko ubufatanye bureba no ku nzego z’abikorera ari ingenzi cyane, kuko buhura na gahunda iheruka gutangizwa ya ‘The Martial Plan with Africa’, igamije gushyigikira ishoramari ry’abikorera muri Afurika.

Ni gahunda yitezweho gufasha uyu mugabane guhanga imirimo mishya miliyoni 20 buri mwaka, hakajya hagatangwa amahugurwa n’ubundi bufasha ku baturage byitezwe ko bazaba biyongereyeho miliyari ebyiri mu 2050.

Yakomeje agira ati “Afurika iza imbere muri gahunda z’u Budage, kandi muri uyu mwaka u Budage buyoboye (G20) tugiye kugira inama na Afurika kuwa 12 na 13 Kamena i Berlin, kandi twishimiye guha ikaze intumwa zizaza ziturutse mu Rwanda.”

Ambasaderi w’u Budage mu Rwanda, Dr. Peter Woeste, yavuze ko iyi ari intangiriro y’ibiganiro bikomeye hagati y’impande zombi, ndetse ashimishijwe no kuba Perezida w’u Rwanda Paul Kagame icyo gihe azajya mu Budage, akagirana ibiganiro n’abandi bayobozi barimo Chancelier w’u Budage, Angela Merkel.

Umubano w’u Rwanda n’u Budage uriho guhera mu 1963, ibigo nka GIZ na KFW bihagarariye u Budage mu Rwanda bikaba bifatanya na guverinoma mu mishinga itandukanye irimo kugabanya ubukene, guteza imbere ubuvuzi, imiyoborere no guharanira iterambere rurambye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza