Kwamamaza

U Budage bwahaye u Rwanda miliyoni 8.5 € zizateza imbere ibyoherezwa mu mahanga

Yanditswe kuya 21-11-2016 saa 19:20' na Cyprien Niyomwungeri


Guverinoma y’u Budage ibicishije muri Banki yayo y’iterambere, KfW, yateye inkunga u Rwanda ya miliyoni 8.5 z’amayero, asaga miliyari zirindwi z’amanyarwanda, zizafasha abikorera guteza imbere gahunda yo kohereza ibicuruzwa mu mahanga, nk’imwe mu ntwaro izafasha u Rwanda kugabanya icyuho kigaragara hagati y’ibyoherezwa mu mahanga n’ibivayo.

Umuhango wo kwakira iyo nkunga yatanzwe binyuze muri Banki itsura amajyambere y’u Rwanda, BRD, wabaye kuri uyu wa Mbere tariki 21 Ugushyingo 2016.

Inkunga y’u Budage izafasha gahunda u Rwanda rumaze umwaka umwe rutangije rubinyujije muri BRD, aho rwashyizeho ikigega ‘Export Growth Facility’ EGF, gifasha abohereza ibicuruzwa mu mahanga. Ku ikubitiro leta yashoyemo miliyari imwe n’igice.

Umuyobozi mukuru wa BRD, Alexis Kanyankole, yasobanuye ko iyi nkunga izacungwa na BRD, ikoreshwe ifatanyije n’izindi banki ziganjemo iz’ubucuruzi. Imishinga izajya ikorwa ku rwego rw’abikorera bayishyikirize Banki z’ubucuruzi noneho BRD itange amafaranga yo gufasha imishinga muri izo banki.

Yavuze ko iyi nkunga iziyongera ku yo Guverinoma y’u Rwanda yashoye mu kigega EGF, igafasha abikorera gukomeza koroherezwa kubona inguzanyo cyane cyane bagabanyirizwa inyungu.

Yagize ati “Izorohereza abikorera ku bijyanye n’inyungu za banki kuko mu gihe ahandi ziba ari 18% cyangwa 19% ahangaha ziba ziri kuri 11% na 12%. Kuba twongeyemo miliyoni hafi zirindwi z’amadolari no kuba tugiye gufatanya na KFW kuko hazabamo no kudufasha mu bya tekiniki ni ikigaragara ko bizafasha abikorera.”

Kanyankole yakomeje avuga ko aya mafaranga yari akenewe kuko kohereza ibicuruzwa mu mahanga, ari kimwe mu bikeneye gutezwa imbere mu rwego rwo kuzamura ibyoherezwa mu mahanga kuko ubu ibyaturukaga hanze byari byinshi kuruta ibyoherezwayo.

KfW ni Banki inagenzura ikoreshwa ry’inkunga Guverinoma y’u Budage itanga. Uyihagarariye mu Rwanda, Markus Bär, yavuze ko ntakizatuma badakorana n’u Rwanda igihe cyose kuko rwagaragaje ko rukoresha neza inkunga ruhabwa mu iterambere ry’abaturage n’igihugu muri rusange.

Minisitiri w’Imari n’Igenamigambi, Gatete Claver, yavuze ko guteza imbere ibyoherezwa mu mahanga ari kimwe mu bizagabanya icyuho cyajyaga kigaragara. Ati "Iyi ni intangiriro kandi twizeye ko tuzakomeza kugirana ibiganiro bagashora imari no mu bindi."

U Budage bufasha u Rwanda kuzamura inzego z’ibanze mu iterambere, gutera inkunga amashuri y’imyuga n’ubumenyingiro TVET, ikoranabuhanga n’ishoramari, aho kugeza ubu hari ibigo 25 by’ishoramari byo mu Budage bikorera mu Rwanda birimo Strawtec, AB Bank, Mobisol n’ibindi.

Minisitiri w'Imari n'Igenamigambi, Amb. Claver Gatete
Uhagarariye KfW mu Rwanda, Markus Bär
Kanyankore Alexis, Umuyobozi wa BRD

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved