Sitasiyo za Rulindo na Gifurwe zongerewe ubushobozi zigera kuri MVA 30

Yanditswe na Evariste Nsengimana
Kuya 24 Ukwakira 2018 saa 04:05
Yasuwe :
0 0

Sitasiyo ebyiri nto z’amashanyarazi zo mu Ntara y’Amajyaruguru, zongerewe uhushobozi ngo zikemure ikibazo cy’ibura n’itakara ry’amashanyarazi mu bice ziyagaburamo.

Ni mu mushinga Banki Nyafurika itsura amajyambere, BAD, yagurijemo u Rwanda miliyoni 46$ mu 2015.

Sitasiyo ya Rulindo yubatswe mu 1980, ifite ibyuma biringaniza umuriro ungana na MVA 3.15, ariko yari imaze gusaza bituma hubakwa iyisimbura itanga 20 MVA, bifasha gutandukanya imiyoboro ine iyishamikiyeho irimo uwa Byumba, Base, Musasa na Gasiza.

Iya Gifurwe yubatswe mu 1994 ariko kubera gusaza, umuriro wari usigaye ubura bya hato na hato. Yahawe icyuma kiyungurura umuriro ungana na MVA 10, hasanwa n’imiyoboro ya Gakenke, Ntaruka na Kirambo.

Umuyobozi wa REG, Eng Weiss Ron, yavuze ko sitasiyo ya Rulindo yuzuye muri Gashyantare uyu mwaka hamwe n’iya Gifurwe, zitwara miliyoni 7.2 z’amadolari.

Abatuye mu majyaruguru bavuze ko nyuma yo kuzongerera ubushobozi, amashanyarazi atakibura.

Nkusi Felicien utuye mu murenge wa Mutete mu Karere ka Gicumbi, usanzwe ari umubaji, yagize ati “Mbere tutarayabona nakoreshaga ingufu z’amaboko, nkoresha imbazo. Umaze kuza ibintu byose byaroroshye. Mbere ntabwo twinjizaga amafaranga kuko tutarangirizaga ku gihe.”

Ku munsi yakoraga urugi rumwe akabonaho inyungu ya 2000Frw, ariko ubu akora 10 akunguka 10000Frw yanahembye abakozi batandatu akoresha.

Uwitwa Mutuyemungu Egidie wo mu Karere ka Rulindo, yiteje imbere abikesheje amashanyarazi akoresha mu gutunganya imisatsi kuva mu 2005.

Ati "Icyo gihe amashanyarazi yakoraga mu buryo budasobanutse, hari igihe twamaraga iminsi ibiri cyangwa itatu twabuze umuriro, abakiliya bakigendera. Ariko kuva aho Guverinoma y’ubumwe iyobowe na Perezida Kagame, yaguye urugomero bakarugira rugari, baduhaye uhagije bituma n’imikorere yacu igenda neza. Nta nzitizi twongeye guhura nazo."

Byatumye yiteza imbere, ava mu bukode yigurira inzu ya miliyoni 10 Frw.

Umunyanabanga Uhoraho muri Minisiteri y’ibikorwa remezo, Uwase Patricie, yavuze ko baha “agaciro gakomeye” inkunga ya Banki Nyafurika itsura amajyambere kandi bishimira gukorana nayo “mu guhindura ubuzima bw’ abanyarwanda."

Visi Perezida ushinzwe ingufu muri Banki Nyafurika itsura amajyambere, Amadou Hott, yavuze ko uyu mushinga w’amashanyarazi uzafasha abanyarwanda ibihumbi 155 barimo abikorera, ugafasha na leta kwihutisha kugera ku ntego yo gutanga amashanyarazi ku banyarwanda bose bitarenze mu 2024.

Yakomeje avuga ko ikigo ahagarariye kizakomeza gutera inkunga u Rwanda mu mishinga itandukanye.

Mu 2013 Guverinoma yari yihaye intego yo kugabanya 1% by’ingano y’amashanyarazi atakara, icyo gihe yari 23%. Mu 2016/17 yari 21,1% naho mu 2017/18 yari 19,6%.

REG ivuga ko ingo zifite amashanyarazi mu Rwanda ari 46,6%.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza