00:00:00 IGIHE NETWORK KN KINYARWANDA EN ENGLISH FR FRANCAIS

Rutsiro: Ingo zisaga 9000 zahawe amashanyarazi mu mwaka wa 2020/2021

Yanditswe na IGIHE
Kuya 29 Ukwakira 2021 saa 01:35
Yasuwe :
0 0

Akarere ka Rutsiro kari mu twarangwagamo ingo nke zifite amashanyarazi, ndetse kakaba kari gafite umwe mu mirenge itaragerwagamo na gato n’umuyoboro w’amashanyarazi. Mu mwaka w’ingengo y’imari wa 2020/2021, ingo zigera ku 9501 zahawe amashanyarazi bituma umubare w’iziyafite amashanyarazi ugera kuri 62.4% ubariyemo izifite amashanyarazi afatiye ku muyoboro mugari ndetse n’izikoresha akomoka ku mirasire y’izuba.

Umuyobozi w’ishami rya Sosiyete y’u Rwanda Ishinzwe Ingufu (REG) mu Karere ka Rutsiro, Maniraguha Jean Pierre, avuga ko kwiyongera cyane kw’ingo zahawe amashanyarazi muri aka Karere byatewe n’umushinga wubatse imiyoboro myinshi mu bice bitandukanye ku nkunga ya Banki y’Isi.

Ati “Uyu mushinga wubatse imiyoboro myinshi ndetse unatuma tugeza amashanyarazi mu Murenge wa Nyabirasi utarageragamo umuyoboro n’umwe. Byatumye tubasha guha amashanyarazi ingo zirenga 9500 turenza kure umuhigo twari twahize w’ingo 6000. N’ubu dufite icyizere ko tuzakomeza kuzongera kuko imiyoboro igera henshi, bidusaba gusa kugenda tuyongeraho gato tukagera no ku ngo ziri hirya gato.”

Maniraguha avuga ko uyu mwaka w’ingengo y’imari bateganya kuzaha amashanyarazi izindi ngo zisaga 3000 ndetse ko bafite icyizere cyo kurenza uyu mubare.

Mu Murenge wa Gihango, Akagari ka Bumba, hari umuyoboro uherutse kuzura utuma ingo zisaga 800 zihabwa amashanyarazi. Abahatuye bavuga ko bishimiye impinduka aya amashanyarazi yabazaniye kuko bihangiye imirimo ndetse n’imitangire ya serivisi irushaho kuba myiza.

Bigirimana Jean Claude akora akazi ko kogosha, avuga ko amaze ukwezi kumwe atangiye gukoresha umuriro ndetse akawubyaza umusaruro. Avuga ko ubu yogosha abantu benshi ndetse n’amasaha ya nijoro agakomeza gukora.

Ati “Ino usanga nijoro imisozi iba yererana amatara ari kwaka hose, natwe hano tukabasha gukora amasaha menshi. Ubu sinabona umukiliya ngo musubize inyuma n’iyo haba mu masaha ya nijoro. Ubu rero ndatekereza kuzagura ibikorwa byanjye, nkashinga n’indi salo ya kabiri nkakomeza kwinjiza amafaranga menshi.”

Bangayandusha Jacques na we ukora akazi ko gusya imyaka ukorera mu Mudugudu wa Kabuga, avuga ko amaze amezi abiri akora ako kazi akaba yaragatangiye ari uko amashanyarazi ageze iwabo.

Emmanuel Hategekimana, uyobora ikigo nderabuzima cya Kibingo kiri mu Murenge wa Gihango, avuga ko mbere y’uko iki kigo kigerwaho n’amashanyarazi, bakoreshaga moteri itanga amashanyarazi bigatuma bakoresha amafaranga menshi bishyura mazutu.

Ati “Hari ibyuma dukoresha muri laboratwari ndetse na za frigo; byasabaga ko dukoresha moteri ikoreshwa na mazutu kugira ngo tubone umuriro wo kubikoresha. Mazutu rero yaraduhendaga ugasanga dukoresheje amafaranga 340.000 buri kwezi. Ubu rero aho twaboneye amashanyarazi, twishyura REG amafaranga atarenga 50.000 buri kwezi. Urumva ko twabashije kugabanya amafaranga twakoreshaga buri kwezI.”

Hategekimana avuga ko ubu kuri iki kigo nderabuzima serivisi zose babasha kuzitanga neza nta mbogamizi kuko bafite amashanyarazi.

Imibare igaragaza ko mu Rwanda, ingo zifite amashanyarazi muri rusange zisaga 66,8% harimo izikoresha afatiye ku muyoboro mugari n’izikoresha adafatiye ku muyoboro mugari yiganjemo akomoka ku mirasire y’izuba.

Agasantere ka Kibingogaherutse kubona amashanyarazi
Banyangandusha Jacques yatangiye akazi ko gusya ubwo bari bamaze kubona amashanyarazi
Bigirimana Jean Claude avuga ko amashanyarazi amufasha cyane mu kazi ke ko kogosha
Ikigo Nderabuzima cya Kibingo cyahawe amashanyarazi
Ingo zisaga 9500 zahawe amashanyarazi mu mwaka w'ingengo y'imari wa 2020/2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .