00:00:00 IGIHE NETWORK KN KINYARWANDA EN ENGLISH FR FRANCAIS

Nyamasheke: Abakoraga urugendo rw’amasaha ane bashaka umuriro w’amashanyarazi bawegerejwe

Yanditswe na Sitio Ndoli
Kuya 7 Nyakanga 2021 saa 10:24
Yasuwe :
0 0

Abatuye mu gice cy’Umurenge wa Shangi ahazwi nka Nyamugari bavuga ko bakoraga urugendo rw’amasaha ane bashaka serivisi z’umuriro w’amashanyarazi none barawegerejwe.

Izo serivisi bakeneraga zirimo kwiyogoshesha, gushesha ifu y’ibigori, soya, ubunyobwa n’imyumbati, gusudiza ibikoresho byo kubakisha nk’amadirishya n’inzugi.

Abaturage basaga 740 ni bo batangiye kugerwaho n’umuriro w’amashanyarazi aho biyemeje kuwubyaza iterambere bari barabuze mu gihe kinini cyashize.

Akingabire Léoncie ufite icyuma gisya afatanyije na bagenzi be yagize ati “Kwiteza imbere muri Nyamugari byari bigoye, nkatwe urubyiruko bizadufasha cyane.Uyu muriro ugiye kudufasha mu iterambere kuko dufite koperative isya kawunga ikorera mu kandi Kagari none tuzayizana ikorere mu kacu.”

Annonciata Tuyisabe avuga ko amaze imyaka 26 ashatse muri Nyamugari ariko atigeze abona haka na rimwe keretse uwishoboye akabona imirasire y’izuba none bakaba babonye umuriro w’amashanyarazi.

Ati “Navukiye muri Shangi ariko nashatse hano muri Nyamugari hashize imyaka 26. Kuva nahagera ni ubwa mbere mbonye umuriro hano. Mu cyumweru gishize rero twatangiye gucana.Twakeneraga gushesha imyumbati, isombe n’ibindi none tugiye kubona izo serivisi hafi yacu kuko twagendaga hafi amasaha abiri.”

Umuyobozi w’Akarere ka Nyamasheke, Mukamasabo Appolonie yavuze ko bagiye gukomeza gushakisha uburyo abaturage bose bagerwaho n’amashanyarazi mu gihe cya vuba.

Ati “Mu Karere ka Nyamasheke turacyari hasi kuko turi kuri 40.5 % ariko twafashe ingamba no mu bihe biri imbere tuzatanga amashanyarazi mu Mirenge ya Rangiro, Cyato na Nyabitekeri. Turi gushyiramo imbaraga cyane kugira ngo tuzamure ijanisha ry’abagerwaho n’amashanyarazi.”

Uyu muriro w’amashanyarazi watwaye amafaranga asaga miliyoni 410 ku bufatanye bw’Akarere ka Nyamasheke, ikigo cy’igihugu gishwe ingufu (REG) ndetse n’urwego rw’Inkeragutabara (Reserve Force).

Uyu muyoboro w'amashanyarazi watwaye asaga miliyoni 410 Frw
Batangiye gucana umuriro w'amashanyarazi kandi bagiye no gutangira kuwubyaza umusaruro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .