Mineacom yahamije ko nta kigo cya Leta kizongera gutumiza ibikoresho byo mu biro hanze

Yanditswe na Jean Pierre Tuyisenge
Kuya 11 Gashyantare 2017 saa 11:09
Yasuwe :
0 0

Minisiteri y’Ubucuruzi n’Inganda n’Ibikorwa by’Umuryango wa Afurika y’Uburasirazuba Mineacom, yatangaje ko nta kigo cya Leta na kimwe kizongera kwemererwa gutanga amasoko yo kugura ibikoresho bitakorewe mu Rwanda.

Ni ingamba zifite icyo zivuze kuri iki kibazo iyi Minisiteri yita igishingiye ku myumvire, haba mu baturage no muri bamwe mu bashinzwe kubishyira mu bikorwa, babona ko igikoresho cyiza ari igituruka hanze.

Zishobora kandi no kugira icyo zikora mu kunagura ubukungu bw’igihugu cyane cyane kashingiwe ku kugabanya ibyaturukaga hanze.

Raporo y’Ikigo cy’Igihugu cy’Ibarurishamibare iheruka yerekanye ko mu gihembwe cya gatatu mu mwaka ushize igipimo cy’ibyoherezwa hanze cyari hasi ugereranije n’ibyatumijweyo nubwo na byo byagabanutse mu gaciro ku gipimo cya 8.68%, bikagera kuri miliyoni 439.39 z’amadolari y’Amerika.

Ibi babigereranyije n’ayo ubwo bucuruzi bwinjirije u Rwanda mu gihembwe cya gatatu mu mwaka wabanje wa 2015 aho ibyoherejwe hanze byari bifite agaciro ka miliyoni 481.15 z’amadorali ya Amerika.

Minisitiri François Kanimba ubwo yari mu kiganiro kuri Radio Rwanda kuri uyu wa Gatandatu tariki ya 11 Gashyantare 2017, yavuze ko icyemezo cyamaze gufatwa ku buryo nta bikoresho byo mu biro bizongera kujya gutumizwa hanze.

Yagize ati “ Ubundi Leta ni umwe mu baguzi bakomeye cyane.Urugero rero tugomba gutanga ni uko byabindi twavugaga ku byerekeye gutanga amasoko ya Leta, mbere na mbere dushyire imbere ibikorerwa mu Rwanda.”

Yongeyeho ati “ Kandi n’ibyemezo byatangiye gufatwa nk’ubu nababwira ko ibyerekeye ibikoresho byo mu biro, ibijyanye n’ameza n’intebe ubu twafashe icyemezo cy’uko nta kigo kizongera kujya kubishaka za Dubai cyangwa za Malaysia. Dufite inganda hano mu Rwanda zikora ameza meza, ku biciro bito.”

Minisitiri Kanimba abibonera mu ndorerwamo y’imyumvire kuko ngo kugeza ubu hari inganda nyinshi zikora ibikoresho byo mu biro bitakabaye bigurwa hanze y’igihugu.

Kugira umuco wo gukoresha ibikorerwa mu Rwanda kandi byagarutsweho na Perezida Kagame ubwo yasuraga agace kahariwe inganda ka Kigali Special Economic Zone, yasabye ko abatanga amasoko ya leta n’abikorera bakwiye kujya bahera ku bikoresho bikorerwa mu Rwanda mbere yo kujya gushaka ibyo mu mahanga.

Abasesenguzi mu by’ukukungu bagaragaza ko inganda nyinshi zikomeye ku Isi zagiye zitangirira hasi ariko zikaza gukomera bigizwemo uruhare na gahunda zifite umuzi ku bufasha bw’impande zitandukanye zirimo no gufashwa na za Leta zazo.

François Kanimba , Minisitiri w'Ubucuruzi, Inganda n'Ibikorwa by'Umuryango wa Afurika y'Uburasirazuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza