Kwamamaza

Miliyoni hafi 12$ zigiye guhabwa abagore bakora ubuhinzi buciriritse mu Rwanda

Yanditswe kuya 31-08-2016 saa 07:19' na Tombola Felicie


Inkunga ya miliyoni hafi 12 (11,891,659 ) z’amadorali ya Amerika zatanzwe n’Umuryango wa NEPAD, igiye guhabwa abagore bakora ubuhinzi buciriritse mu rwego rwo guhangana n’ibibazo biterwa n’ihindagurika ry’ikirere bikanagira ingaruka ku musaruro uva mu bikorwa by’ubuhinzi bikorwa n’umubare munini w’abanyarwanda.

Ihindagurika ry’ikirere rigira ingaruka ku musaruro w’ubuhinzi, aho usanga umusaruro wabaye muke cyangwa se wabuze burundu umuhinzi agataha amara amasa.

Mu rwego rwo guhangana n’ibi bibazo, abagore bakora ubuhinz buciriritse mu Rwanda, bagiye gushakirwa imbuto nziza zihangana, amafumbire, ibikoresho by’ikoranabuhanga mu kuvomerera ibihingwa n’amahugurwa yo ajyanye no guhinga kijyambere.

Mu biganiro Minisiteri y’Uburinganire n’Iterambere ry’Umuryango (MIGEPROF) yagiranye n’umuryango wa NEPAD binyuze mu ishami ryawo ryo guteza imbere umugore ukora ubuhinzi buciriritse mu guhangana n’ingaruka z’ikirere GCCASP (The Gender Climate Change Agriculture Support Program) n’abandi bafatanyabikorwa kuri uyu wa 30 Kanama 2016 i Kigali, hagaragajwe ko miliyoni hafi 12 z’amadorali ya Amerika ari zo zizahabwa abagore bakora ubuhinzi buciriritse mu Rwanda kugira ngo umusaruro wabo ube mwiza.

Umunyamabanga wa Leta muri MIGEPROF, Mutoni Gatsinzi Nadine atangiza iyo nama ku mugaragaro, yavuze ko kuba abagore ari bo benshi mu gihugu ku kigero cya 52% ndetse umubare w’abanyarwanda bakora ubuhinzi ukaba urenga 80%, ngo bivuze ko abagore babukora na bo ari benshi kandi ko bakeneye kuzamuka.

Yagize ati "Murabizi ko mu gihugu cyacu usanga abagore bakora ubuhinzi ari benshi , iyi porogaramu igamije kubafasha kwiteza imbere bakabona imbuto zijyanye n’agace baherereyemo , bakabona ifumbire bakeneye kandi umusaruro wabo nuba mwiza bazarwanya imirire mibi ikiboneka mu miryango imwe n’imwe".

Yakomeje avuga ko izi miliyoni zikabakaba 12 z’amadorali ya Amerika zagenewe u Rwanda mu myaka itanu, zizakoreshwa mu guhugura abagore baherereye mu makoperative kugira ngo bakore ubuhinzi butari gakondo, babone ibyo bakeneye nko kuhira imyaka, amafumbire, ndetse bashakirwe n’amasoko babashe gutera imbere.

Abagore ibihumbi 264 ni bo bari mu makoperative y’abakora ubuhinzi hirya no hino mu Rwanda, ariko ngo hari n’ababukora batayabamo.

Edna Kalima umukozi ushinzwe iyubahirizwa rya gahunda muri GCCASP, yavuze ko abagore bose bazagenerwa iyi nkunga ngo bazafashwa kubona ibyo bakeneye kugira ngo umusaruro wabo ube mwiza.

Yagize ati" Abagore bazafashwa mu kubona ibyatumaga umusaruro wabo utaba mwiza kandi nubwo aya mafaranga batazayahabwa mu ntoki, bizabafasha kubona ayabo binyuze mu byo bazaba baragejejweho”.

Abagore bari bahagarariye abandi muri iyo nama batangaje ko iki ari igisubizo kuko uretse n’umusaruro babonaga udashimishije ngo n’imvune bahuraga na zo zizagabanuka.

Yamfashije Jeanne umuhinzi w’imbuto mu karere ka Bugesera, avuga ko koperative yabo ihura n’ikibazo cyo kubura amazi igihe izuba ryavuye ibihingwa byabo bikuma.

Agira ati "Bugesera izwiho kwibasirwa n’izuba , dufashijwe kubona uburyo bwo kuhira imyaka byaba ari byiza n’imvune tugira dushakisha amazi zagabanuka".

Nyirabahire Venantie wo mu Karere ka Huye na we yunga mu rya mugenzi we avuga ko akenshi igihombo abahinzi bagiterwa n’izuba .

Agira ati "Tubonye nk’ibigega bifata amazi , ryazava tukuhira, umusaruro ntiwaba mubi kuko amafumbire twarayamenye ,imbuto nziza turazihabwa ariko izuba ryo ntimujya inama".

Biteganijwe ko iyi gahunda izatangirana n’umwaka wa 2017 muri Mutarama, mu gihe ibintu byose bya ngombwa bizaba byagiye mu buryo.

Ibihugu NEPAD yatoranyije izafasha ni u Rwanda, Nigeria, Cameroon, Ethiopia na Malawi. Ibi ngo byakozwe hagendewe ku bushake bw’ibihugu mu kuzamura ubushobozi bw’umugore.

Edna Kalima wo muri NEPAD na Mutoni Gatsinzi Nadine, umunyamabanga wa Leta muri MIGEPROF
Abagore bakora ubuhinzi buciriritse bagezwaho ibizabakorerwa mu kuzamura umusaruro wabo
Abitabiriye inama bafashe ifoto y'urwibutso

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved