Maroc igiye kubona gari ya moshi ya mbere yihuta kurusha izindi muri Afurika

Yanditswe na Rabbi Malo Umucunguzi
Kuya 29 Mutarama 2017 saa 05:50
Yasuwe :
4 0

Maroc igiye kubona gari ya moshi yihuta kurusha izindi ziboneka muri Afurika, byitezwe ko izahuza umujyi wa Tangier uherereye ku Nyanja ya Méditerranée n’umurwa w’ubucuruzi Casablanca mu 2018.

Iyi gari ya moshi yakorewe mu Bufaransa izaba igizwe n’ibice bibiri, ikazaba ishobora kugendera ku muvuduko ugera mu bilometero 320 ku isaha imwe.

Izagabanya kabiri igihe cyakoreshwaga mu kugenda intera iri hagati y’iyo mijyi ibiri, umujyi wa Tangiers ukaba uherereye mu Majyaruguru ya Maroc ku bunigo (détroit) bwa Gibraltar, mu gihe Casablanca iherereye mu burengerazuba bw’igihugu, mu bilometero 337 ugenda n’imodoka.
Izaba ikubye kabiri umuvuduko w’iya Gauteng muri Afurika y’Epfo, yatangijwe mu 2012 ifite ubushobozi bwo kugendera ku muvuduko wa kilometero 160 ku isaha.
Uwo mushinga uzatwara miliyari $2 umaze imyaka igera ku icumi ukorwaho, ugaterwa inkunga na guverinoma za Maroc, u Bufaransa, Arabia Saudite, Kuwait na Leta Zunze Ubumwe z’Abarabu.

Nk’uko CNN yabitangaje, Umwami Mohammed VI na Guverinoma ya Maroc biteze ko izi gari ya moshi zizongera ubukungu ku baturage n’ishema ku gihugu, mu gihe abatavuga rumwe n’ubutegetsi bo batarabyumva bitewe n’uburyo uyu mushinga uhenze.

Iyi gari ya moshi kandi iri muri gahunda iyi guverinoma yihaye zo gukomeza kwagura ibikorwa remezo muri Maroc, harimo n’umushinga munini wo kubyaza ingufu z’amashanyarazi imirasire y’izuba no kubaka ibyambu bishya bitandukanye kandi binini.

Ubwo Banki Nyafurika Itsura Amajyambere yavugaga ku miterere ry’ubukungu bwa Maroc muri raporo yayo ya 2016, yavuze ko "Guverinoma ikomeje amavugurura yayo n’ishoramari rikomeye hagamijwe guteza imbere ubucuruzi no kureshya abashormari mpuzamahanga.”

Umuhanda Tangier-Casablanca byitezwe ko uzafasha mu kongera ubukerarugendo no kuzamura iterambere ry’ubukungu muri iyo mijyi kimwe no gushyigikira ishoramari, ndetse n’abagenzi bakoresha iyo nzira mu mwaka bakikuba kabiri, bakaba miliyoni esheshatu mu myaka itatu iri imbere.

Gusa izi gari ya moshi nubwo zizaba zihuta zizaba zirutwa cyane na Hyperloop iteganywa kubakwa muri San Francisco muri Leta Zunze Ubumwe za Amerika izaba ishobora kwihuta ibilometero 1120 ku isaha, cyangwa Chuo Shinkansen yo mu Buyapani izaba yiruka ibilometero 600 mu isaha imwe.

Gari ya moshi zihuta cyane zigiye guhuza Tangier na Casablanca
Izi gari ya moshi ziri kugeragerezwa ku gice cyo ku nkombe muri Maroc

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza