Made in Rwanda Expo: Minisitiri Munyeshyaka yijeje abikorera amasoko menshi ya leta

Yanditswe na Herve Ugirumukunda
Kuya 30 Ugushyingo 2017 saa 09:55
Yasuwe :
0 0

Minisitiri w’Ubucuruzi n’Inganda, Munyeshyaka Vincent, yatangije imurikagurisha ry’ibikorerwa mu Rwanda, ‘Made in Rwanda Expo’ ku nshuro ya gatatu kuri uyu wa 30 Ugushyingo 2017, asobanura ko abafite ibicuruzwa bikorerwa imbere mu gihugu bongerewe amahirwe bari bafite yo gutsindira amasoko ya leta.

Mu ijambo yavuze mu muhango wo gufungura iryo murikagurisha, yashimye uburyo abaryitabira biyongereye ndetse n’ibimurikwa bikarushaho kuba byinshi kandi bifite ireme.

Yabwiye abikorera ko guverinoma yashyizeho amahirwe menshi ku nganda z’Abanyarwanda n’iz’abanyamahanga zikorera imbere mu gihugu kuko hagiye gushyirwaho itegeko rica intege abakorera mu mahanga bapiganira amasoko ya leta.

Yagize ati “ Nagira ngo mbabwire ko ubungubu twarangije kuvugurura itegeko rigenga amasoko ya leta ku buryo rigeze ku rwego rwo kuganirwaho mu Nteko Ishinga Amategeko […] twashyizemo ko hari amahirwe angana na 15% ku bakorera mu Rwanda ibikoresho bikenewe ku masoko ya leta mu gihe bahanganye n’abakorera mu mahanga.”

Yongeyeho ko abanyamahanga bafite inganda zifite ibicuruzwa bikorerwa mu Rwanda nabo muri iryo tegeko rizabaha amahirwe ya 10% mu gihe bahanganye na bagenzi babo bakorera hanze y’igihugu.

Munyeshyaka yabasabye kurushaho gukora ibicuruzwa byiza kandi byujuje ubuziranenge, kugira ngo na leta izabone aho ihera ibaha amahirwe. Yabijeje ko mu minsi iri imbere nta ruganda ruzongera guhombywa n’ibura ry’umuriro w’amashyanyarazi rya hato na hato kuko bazajya bamenyeshwa igihe umuriro uzaburira bakitegura.

Ati “ Turimo gutekereza ukuntu nibura twashyiraho uburyo bwo kuba twamenyesha abashoramari tuti ‘umuriro uzabura igihe iki n’iki nabo babone uko bakora igenamigambi ryatuma bakomeza gutanga umusaruro’.”

Kuva muri 2010 kugeza muri 2016 ibitumizwa mu mahanga byagabanutseho 2% mu gihe ibyoherezwayo byiyongereyeho 11%. Mu gihembwe cya mbere cy’umwaka w’ingengo y’imari wa 2017/2018, ibyoherezwa hanze byiyongereyeho 10% naho ibitumizwayo bigabanukaho 8%.

Imurikagurisha rya Made in Rwanda niryo ryitabiriwe n’abikorera benshi bagera kuri 420 mu gihe mu mwaka ushize bari 305 naho muri 2015 bari 250.

Umuyobozi Mukuru w’Urugaga rw’Abikorera, PSF, Benjamin Gasamagera avuga ko abamuritse uyu mwaka harimo abanyenganda, abatunganya ibikomoka ku buhinzi n’ubworozi, imyambaro, ubukorikori, ikoranabuhanga n’abatanga izindi serivisi zinyuranye.

Yongeyeho ko ibitumizwa mu mahanga bikomeje kugabanuka kurusha ibindi birimo “Sima yagabanutse ku rugero rwa 36% n’imyenda yagabanutseho 21%”.

Minisitiri Munyeshyaka yanasuye aho abikorera bamurikiye, ashimishwa n’ibicuruzwa bidasanzwe bisigaye bikorerwa mu Rwanda birimo moto za RMC, inyubako zihendutse, ibikoresho by’ububaji bikora imirimo myinshi icyarimwe, imyenda ihendutse, …

Imurikagurisha rya Made in Rwanda ryatangiye ku ya 29 Ugushyingo 2017 rizasozwa ku ya 5 Ukuboza.

Abakora ibikoresho byo mu nzu nabo bamaze gutera imbere
Strawtec ikora inzu zihendutse yamusobanuriye uburyo ari igisubizo ku banyarwanda
Yatashye uruganda rukorera moto mu Rwanda, RMC
Yashyize umukono mu gitabo cy'abanyacyubahiro bitabiriye Made in Rwanda
IPRC South bakoze akabati gashobora kuvamo intebe cyangwa igitanda
Rwiyemezamirimo w'i Musanze ukora imyenda ihendutse kandi imeze nk'iy'i Burayi
Abanyeshuri ba IPRC South bitabiriye imurikagurisha ry'ibikorerwa mu Rwanda
Minisitiri Munyeshyaka afungura Made in Rwanda Expo 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza