Kigali: Hagiye kubakwa imihanda irimo n’izanyurwamo n’imodoka enye zitabyigana

Yanditswe na Uwishyaka Jean Louis
Kuya 31 Kanama 2016 saa 10:47
Yasuwe :
0 0

Imihanda ya Nyabugogo-Muhima-Rond Point n’uwa Kanogo-Rwandex igiye kwagurwa igirwe ibice bibiri bizajya bicamo imodoka enye zitabyigana. Nyuma izakomeza kugeza kuri Prince House ndetse hakazanavugururwa umuhanda uzengurutse Stade Amahoro.

Iyo mihanda kandi izajya yifashishwa mu bikorwa byo gutwara abantu mu buryo rusange, aho hari ibice bizajya bigenerwa imodoka ku buryo bwihariye kugira ngo bigabanye umubyigano w’ibinyabiziga wajyaga ubangamira abagenzi mu mujyi wa Kigali.

Iyo ni imwe mu mihigo y’Umujyi wa Kigali muri iyi ngengo y’imari ya 2016-2017, iteganya ko uretse kwagura iyo mihanda, hazubakwa n’indi mishya ya kaburimbo, izagendana n’iterambere ry’isura y’Umujyi wa Kigali irimo kugenda igana mu cyerekezo cyiza.

Busabizwa Parfait, Umuyobozi w’umujyi wa Kigali wungurije ushinzwe iterambere ry’ubukungu yabwiye abaherutse kwitabira Inteko rusange y’Umujyi wa Kigali, ko hari indi mihanda mishya igiye kubakwa inashyirwemo kaburimbo izaba ifite uburebure bw’ibirometero 51.

Iyo mihanda irimo Gisozi-Karuruma n’imihanda yahoze ari iy’umushinga w’amabuye aconze ireshya n’ibirometero 20, yose ikazashyirwamo kaburimbo. Hari kandi undi muhanda uva kuri 15-Ndera w’ibirometero bisaga 2.5 na Rubirizi-Busanza- Ikigo cya gisirikare cya Kanombe na wo w’ibirometero 5.832.

Busabizwa yatangaje kandi ko hari n’imihanda y’ibitaka izagenda itunganywa inafatwe neza irimo icyiciro cya kabiri cy’uwa Birembo- Bumbogo uzaba ufite ibirometero 5.78 n’uwa Zindiro-Masizi-Birembo-Kami-Gasanze w’ibirometero 10.

Mu karere ka Nyarugenge, imihanda izatunganywa izaba ifite uburebure bw’ibirometero 11.6, irimo uwa Nyamirambo-Mageragere n’uwa Karama-Mwendo.

Iyo mihanda izaza isanga iyamaze kubakwa mu ngengo y’imari y’umwaka ushize, irimo icyiciro cya mbere cy’uwa Birembo-Bumbogo w’ibirometero bitanu, wubatswe mu karere ka Gasabo, uw’ibirometero 12 wubatswe mu mirenge ya Gatenga, Nyarugunga, Masaka na Kanombe muri Kicukiro, ndetse n’iya Rugarama-Nyamirambo, Kanyinya-Nyamweru, Karama-Mwendo yubatswe mu karere ka Nyarugenge ku burebure bw’ibirometero hafi bine.

Hazubakwa kandi ikiraro cya Nyirakibehe gihuza imirenge ya Nduba na Jabana.

Mu bindi bizakorwa, birimo gusimbuza amatara yo ku muhanda Kanogo-Rwandex, muri rusange azashyirwa ku burebure bw’ibirometero 20. Ayo matara azashyirwa no ku mihanda uva RBS- ku Karere ka Kicukiro - Kagarama- Muyange- n’ahahoze hakorera PAM.

Hari kandi Paruwasi Kicukiro-ahahoze hakorera PAM, mu Kiyovu azashyirwa ku burebure bwa kirometero 4.5, Ikigo Nderabuzima cya Gatenga, Kanombe Military Camps- Mulindi Biodiesel, Nyamirambo- Akumunigo no ku Kibuga cy’Indege – Nyandungu w’uburebure bwa kirometero 3.1.

Uretse ibyo bizakorwa muri uyu mwaka w’ingengo y’imari watangiye, Umujyi wa Kigali urateganya kubaka n’indi mihanda itandukanye. Iyo irimo uwa Rwandex-Gishushu, Rwandex-Mu myembe, Mu myembe-Kimihurura, ndetse n’uwa Nyamirambo-Rebero-Kicukiro (Nyanza), Nyamirambo-Cyumbati-Gikondo,Kagugu-Batsinda-Nyacyonga, Down town-Yamaha na Kimisange-Cyumbati.

Umushinga wo kubaka iyo mihanda watewe inkunga na banki yo mu Bushinwa (Chinese Exim Bank).

Iyo mihanda izubakwa mu mezi 32 na sosiyete yo mu Bushinwa ya China Road and Bridge Corporation, ikazatwara miliyoni 76 z’amadolari ya Amerika.

Uko igice kimwe cy'umuhanda Nyabugogo-Rond Point- Rwandex kizagurwa
Umuhanda Nyamirambo-Mageragere uzatunganywa neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza