Ingomero z’amashanyarazi Leta yaragije Rwanda Mountain Tea zihagaze zite?

Yanditswe na Jean Pierre Tuyisenge
Kuya 19 Gicurasi 2017 saa 08:58
Yasuwe :
0 0

Inama y’Abaminisitiri yateraniye muri Village Urugwiro ku wa Gatatu tariki ya 6 Kanama 2015, yemeje ko zimwe mu ngomero nto z’amashanyarazi zari iz’iyahoze ari EWSA zegurirwa abikorera, izaragijwe Ikigo gifite inganda zikora zikanatunganya icyayi (Rwanda Mountain Tea) zasuwe n’ Ikigo gitunganya, kikanatanga serivise z’Ingufu z’Amashanyarazi (EUCL), gisanga zihagaze bwuma.

Impamvu zo kwegurirwa abikorera zisobanurwa n’icyo kigo mu buryo butaziguye nk’izishingiye ku mikorere itari myiza icyo gihe ndetse n’umusaruro ukaba utari umeze neza uko bikwiye.

Nyuma y’iyo nama y’Abaminisitiri, Rwanda Mountain Tea yahise igirana amasezerano n’Ikigo gitunganya, kikanatanga serivise z’ingufu z’amashanyarazi (EUCL), agamije gucunga ingomero ebyiri z’amashanyarazi; urwa Gihira ruherereye mu Karere ka Rubavu rutanga Megawatt 1.8 n’urwa Rugezi rwo mu Karere ka Burera rutanga Megawatt 2.2.

Ayo masezerano y’imyaka 25, aha Rwanda Mountain Tea ububasha bwo gucunga izo ngomero ndetse ikanazibonera ibikenerwa byose kugira ngo zibashe gutanga umusaruro uko bikwiye.

Urugomero rw’amashanyarazi rwa Gihira rwubatse ku mugezi wa Sebeya uherereye mu karere ka Rubavu mu gihe urwa Rugezi na rwo rwubatse ku isumo y’amazi ya Rugezi riherereye mu Karere ka Burera.

Kuva ku wa Gatanu tariki ya 28 kugeza 29 Mata 2017, itsinda ry’abatekinisiye ba EUCL basuye uturere twa Burera na Rubavu ahari izo ngomero, nyuma y’imyaka ibiri bashyize umukono kuri ayo masezerano, ngo barebe niba Rwanda Mountain Tea itaratereye agati mu ryinyo mu kuzitaho gusa nk’uko babyivugira, ngo batunguwe n’uko basanze zihagaze.

Umuyobozi w’Ishami rishinzwe gutanga amashanyarazi muri EUCL, umwe mu basuye izo ngomero, Mbarunkundiye Eugène, yavuze ko bigaragara ko zicunzwe neza ndetse ko bitanga icyizere ko igihe basezeranye kizarangira ibisabwa Rwanda Mountain Tea yarabikoze neza.

Yagize ati “Ibyo tubonye ni uko imirimo yakozwe ari myiza kandi myinshi akaba ari iyo gushimirwa. Abakozi twahasanze ni abahanga; nta mpungenge tujyanye ko ibitararangira na byo bizakorwa neza. Bakoze akazi keza kandi karimo ubuhanga. Mu by’ukuri urabona ko Rwanda Mountain Tea yakoze nk’iyikorera, ntabwo yakoze nk’abubahiriza amasezerano nk’uko abenshi babigenza.”

Nyuma yaho kandi ku wa Mbere tariki ya 15 Gicurasi 2017, EUCL yatangije urugomero rwa Rugezi nyuma yo kubona ubwiza n’ubuhanga rukoranye maze yemeza ko rukwiye gutangira gutanga amashanyarazi ku murongo mugari.

Urugomero rw'amashanyarazi rwa Gihira

Umuyobozi w’ishami rishinzwe gusana ingomero z’amashanyarazi muri EUCL, Musana Edo, yavuze ko basanze Rwanda Mountain Tea yarakoze ibirenze ibyo batekerezaga.

Yagize ati “ Uruganda mu by’ukuri dusanze rumeze neza, kandi bihuje neza n’ibyo twari turutegerejeho ndetse n’igihe cyarubahirijwe, Rwanda Mountain Tea irangije imirimo mbere y’igihe cyari cyateganyijwe mu masezerano. Ikindi twishimiye ni uko imashini zashyizwe muri uru rugomero ari nshya z’imvaburayi zakozwe mu 2016, abahanga twahasanze batunganya imirimo ya nyuma biherejwe n’uwazohereje bagaragaza kutajenjeka.

Barakamfitiye Jean d’Amour wakoze kuri urwo rugomero mbere y’uko ruhabwa Rwanda Mountain Tea, avuga ko mbere hari imashini zishaje ndetse umuriro ukaba utarashoboraga kumara isaha utagiye ndetse ngo n’iyo imashini zapfaga byashoboraga kumara igihe zitarakorwa.

Itsinda ry'abatekinisiye ba EUCL bari kumwe n'abakozi ba Rwanda Mountain Tea

Umuyobozi ushinzwe imishinga y’ingomero z’amashanyarazi muri Rwanda Mountain Tea, Georges Appelmans, yavuze ko icyatumye urugomero rwa Rugezi rwuzura vuba, ari umurava n’ubushake byahyizwemo ndetse no kutareba ikiguzi ahubwo hakarebwa umusaruro uzavamo.

Ati “ Uru rugomero ruriho imashini zikomeye kandi zujuje ubuziranenge, icyatumye imirimo yihuta harimo no kuba harakoreshejwe abahanga babigize umwuga ku buryo byihutishije imyubakire. Turateganya ko izi mashini zizamara igihe kirekire kuko zirakomeye.”

Icyizere Leta yagiriye Rwanda Mountain Tea ntigishingiye ku busa kuko nayo ubwayo yifitiye ingomero z’amashanyarazi zitanga megawati umunani ndetse irateganya no kubaka urundi rwenda kungana z’izo zombi.

Ingomero zayo ni izihe ?

Uru rugomero ruzaba rwiyongera ku zindi ebyiri zubatswe n’iki kigo, zamaze kuzura ndetse zatangiye gutanga umusaruro, wabyajwe mu mazi y’umugezi wa Giciye, ufite isoko mu ishyamba rya Gishwati. Urwa mbere ni Giciye I rutanga Mwt 4 kimwe na Giciye II na rwo rutanga Mwt4, zombi zahujwe n’umuyoboro mugari w’umuriro w’amashanyarazi w’Ikigo gitunganya, kikanatanga serivise z’Ingufu z’Amashanyarazi (EUCL).

Urugomero rwa Giciye I rwuzuye mu 2014 ndetse runatahwa ku mugaragaro na Perezida Paul Kagame ku wa 5 Kamena 2015, rutwaye akayabo ka miliyoni 14$ naho Giciye II yatangiye gukora kuwa 15 Gicurasi 2016, nyuma yo kuzura itanzweho miliyoni 18.

Abahanga mu by'amashyanyarazi bashimye uko izo ngomero zubatse

Iki kigo ngo cyagize igitekerezo cyo kubaka ingomero z’amashanyarazi bitewe n’uko inganda zacyo z’icyayi zakeneraga umuriro mwinshi wo gukoresha kimwe no kunganira leta mu rugamba rwo kongera ingano y’umuriro, nkuko byemezwa n’Umujyanama w’Umuyobozi mukuru w’Inama y’Ubutegetsi ya Rwanda Mountain Tea, Majyalibu Jotham.

Ati “Ibikorwa byo kubaka ingomero z’amashanyarazi, Rwanda Mountain Tea yabitangiye mu 2012 kuko twakeneraga umuriro mwinshi mu nganda zacu z’icyayi ariko tuza kubona ko na leta ifite icyuho(deficit) mu bijyanye n’ingufu, turavuga tuti ‘byaba byiza ko tujya muri ibi bikorwa tugatanga umusanzu ku bukungu bw’igihugu cyacu, ariko tukanongera ingufu z’amashanyarazi ziri mu gihugu’.”

Majyalibu yashimangiye ko nyuma yo kuzuza ingomero ebyiri, basanze umugezi wa Giciye uherereye mu Karereka Nyabihu, ufite ubushobozi bwogutanga amashanyarazi menshi, ikaba ariyo mpamvu biyemeje kubakamo urwa gatatu(Giciye III) rwitezweho gutanga ingufu zikubye hafi ebyiri zitangwa n’izo ngomero zamaze kubakwa.

Ati “Icyo dushyize imbere ni ukubaka urugomero runini rushobora gutangwa n’amazi aturuka muri uyu mugezi, rufite ubushobozi bwo gutanga Mwt 7.2.Turiteguye ngo tubishyire mu bikorwa haba mu bikoresho byose bisabwa; ubu igisigaye ni ibiganiro tukigirana na leta kubijyanye n’amasezerano azadufasha gukora uyu mushinga.”

Yakomeje agira ati “Ni umushinga twumva utazatwara igihe kirekire kuko twumva uzamara imyaka ibiri kandi twumva biri mu nzira yo kugira ngo tuyabone.”

Rwanda Mountain Tea ishimangira ko ibyo imaze kugeraho ibikesha imiyoborere myiza irangajwe imbere na Perezida Kagame washyizeho uburyo bunoze bworohereza abikorera gukora imishinga yabo.

Igice cy'urugomero rwa Gihira
Urugomero rw'amashanyarazi rwa Rugezi
Urugomero rwa Giciye ya II

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244