Imirimo yo kubaka uruganda ruzagabanya ingano y’imiti u Rwanda rwakuraga hanze yatangijwe

Yanditswe na Mukaneza M.Ange
Kuya 15 Ukuboza 2017 saa 01:39
Yasuwe :
1 0

Uruganda rwo muri Maroc rukora imiti n’ibindi bikoresho byifashishwa mu buvuzi, Cooper Pharma, rwatangije imirimo yo kubaka ishami ryarwo mu Rwanda, igikorwa kitezweho kugabanya icyuho cyaterwaga no kuba imiti ikenerwa mu gihugu itumizwa hanze.

Gutangiza imirimo yo kubaka uru ruganda byabereye mu cyiciro cya kabiri cy’agace kagenewe inganda (Special Economic Zone Phase II), kuri uyu wa 15 Ukuboza 2017.

Umuyobozi w’Ikigo cy’Igihugu gishinzwe iterambere, RDB, Clare Akamanzi, wari witabiriye uyu muhango yagaragaje ko uruganda nk’uru rwari rukenewe mu Rwanda, aho ruzagabanya amafaranga atangwa hatumizwa imiti mu mahanga.

Ati ”Umwaka ushize twaguze imiti iturutse hanze igera kuri miliyari hafi 80 z’Amanyarwanda. Bivuze ko ibyo bazakora hano bizadufasha kugabanya icyo giciro kinini tugura imiti hanze. Niyo mpamvu tuvuga ko ari uruganda rw’ingenzi ku gihugu cyacu kugira ngo dukorere imiti mu Rwanda.”

Yakomeje avuga ko uretse ibi uru ruganda rwitezweho no gutanga akazi ku banyarwanda, aho mu cyiciro cya mbere kizaba cyuzuye mu mezi 18 ari imbere abagera kuri 40 bazahabwamo imirimo.

Umuyobozi uhagarariye inyungu za Cooper Pharma mu Rwanda, Ismail Cheik Lahlou, Ismail Cheik Lahlou, yavuze ko kubaka uruganda bizakorwa mu byiciro, icya mbere kikazashorwamo amadolari ya Amerika angana na miliyoni ziri hagati ya 6-7.

Nk’uko yakomeje abisobanura kandi bazakora ubwoko bw’imiti butandukanye, ariko ku ikubitiro bakazakora iterwa mu maraso (injectable medicine), nyuma bakazakurikizaho ibinini by’ubwoko butandukanye.

Ati” Intego yacu ya mbere ni ugufasha u Rwanda kwigenga ku bijyanye no kugura imiti, imiti yatumizwaga hanze uyu munsi isimburwe n’ikorerwa mu Rwanda.Turagira ngo haboneke imiti iri ku rwego rwujuje ubuziranenge igenewe Abanyarwanda n’abandi baturage bo mu karere […]. Dufite icyizere ko tuzaba dufite ubushobozi bwo kugabanya imiti yatumizwaga hanze ku kigero kiri hagati ya 10-20%.”

Uruganda Cooper Pharma rwatangije izuba mu 1933 rugiye gutangiza ishami ryarwo mu Rwanda nyuma y’amasezerano yashyizweho umukono mu Ukwakira 2016, ubwo Umwami Mohammed VI wa Maroc, yari mu ruzinduko rw’iminsi itatu mu Rwanda.

Ambasaderi wa Maroc mu Rwanda, Youssef Imani na we yari yitabiriye iki gikorwa
Umuyobozi Mukuru wa RDB, Clare Akamanzi ashyira ibuye ry'ifatizo ahazubakwa uruganda rwa Cooper Pharma
Umuyobozi Uhagarariye inyungu za Cooper Pharma mu Rwanda, Ismail Cheik Lahlou

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza