00:00:00 IGIHE NETWORK KN KINYARWANDA EN ENGLISH FR FRANCAIS

Kigali: Ibikorwa 170 by’ubucuruzi bimaze kuvanwa mu nzu zo guturwamo mu myaka itanu ishize

Yanditswe na IGIHE
Kuya 14 Ugushyingo 2021 saa 01:53
Yasuwe :
0 0

Ubuyobozi bw’Umujyi wa Kigali bwatangaje ko mu myaka itanu ibikorwa 170 muri 211 by’ubucuruzi aribyo byakuwe mu nzu zagenewe guturwamo bijya ahagenewe ibikorwa by’ubucuruzi.

Iki cyemezo cy’Inama Njyanama cyo kwimura ibikorwa byakorerwaga mu nzu zo guturwamo bikajyanwa ahagenewe gucururizwa, cyafashwe mu 2016, hagamijwe gushyira mu bikorwa igishushabyo mbonera cy’umujyi wa Kigali.

Ni ukuvuga ko ibikorwa byaba ibya Leta, iby’abikorera ndetse n’imiryango itari iya leta byakoreraga mu nzu zaganewe guturwamo bigomba kwimurirwa mu nzu zagenewe ubucuruza zaba izihuza abantu benshi cyangwa se iz’abantu ku giti cyabo ariko zubatse mu buryo bwo gucururizwamo.

Bamwe mu bashyize mu bikorwa iki cyemezo baganiriye na RBA, bagaragaza itandukaniro riri hagati y’abo bahoze bakorera ndetse n’aho bakorera ubu.

Umwe muri aba baturage yagize ati “Byarahindutse kubera ko nk’uko mubona hano Nyabugogo ni urujya n’uruza rw’abantu kuko nk’aha Nyabugogo usanga hahurira abantu benshi.”

Abashoye imari mu nyubako z’ubucuruzi zigezweho, bavuga ko ubwitabire bw’abaza gufata ibyumba muri izi nzu butaragera ku rwego rushimishije, ibintu bavuga ko bifitanye isano n’ibikorwa by’ubucuruzi bigikorera hirya no hino mu nzu zo guturamo.

Umuyobozi w’Isoko ry’Inkundamahoro, Niyonshuti Rwamo Emile yagize ati “Iyi nzu igizwe n’ibyumba birenga 687, turasaba ubuvugizi, abantu bagikorera mu gikari, abakorera ahataragenewe ubucuruzi ko Umujyi wa Kigali wabazana kuko harahari aho bakorera.”

Umukozi ushinzwe ibikorwa mu nyubako ya CHIC, Bugingo Jean Bosco yagize ati “Umujyi wa Kigali icyo wadufasha ni ukubyumvisha abacuruzi n’abandi baturage ko bikwiye ko baza gukorera mu nyubako zabugenewe.”

Umuyobozi ushinzwe iterambere ry’ubukungu mu mujyi wa Kigali, Jean Rubanzangabo yavuze ko n’ubwo iki cyemezo cyakomwe mu nkokora n’icyorezo cya Covid-19, ku bufatanye n’abikorera ngo bigiye gushyirwamo imbaraga.

Ati “Ibaze nk’inzu yubakiwe guturwamo n’imiryango itandatu, ukajya gukoreramo resitora. Ba bantu baza kuriramo cyangwa gukoreramo ibindi, barenze ubushobozi bw’iyo nyubako.”

Yakomeje agira ati “Abikorera nibagire icyizere kandi turafatanya nabo, uruhare rwabo rugomba kugaragara kandi rugashyigikorwa mu buryo bwose bushoboka.”

Mu mwaka w’ingengo y’imari ya 2019/2020 ibikorwa by’ubucuruzi byagombaga kwimuka byari 211, ibyimutse ni 170 ibindi 35 bivugurura inzu byakoreragamo ziba iz’ubucuruzi, ni mu gihe ibindi 6 byongerewe igihe kubera impungenge byagaragaje.

Inyubako z'ubucuruzi zigezweho zikomeje kwiyongera mu mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .