00:00:00 IGIHE NETWORK KN KINYARWANDA EN ENGLISH FR FRANCAIS

Ba rwiyemezamirimo bakora ibijyanye n’ikoranabuhanga mu buvuzi bagiye guhatanira ibihembo

Yanditswe na Muhonzire Sylvine
Kuya 29 Ukwakira 2021 saa 12:59
Yasuwe :
0 0

Norrsken, ikigo gifasha ba rwiyemezamirimo bafite imishinga y’ikoranabuhanga, gifatanyije na Novartis Foundation, bateguye amarushanwa kuri ba rwiyemezamirimo bakora mu bijyanye n’ubuvuzi, aho batorezwa muri ‘HealthTech Hub Africa’ yatangijwe mu Rwanda igamije guteza imbere serivisi z’ubuzima muri Afurika.

Aya marushanwa yatangiye kuva tariki 20 Ukwakira 2021, azahuza ba rwiyemezamirimo bagera kuri 30 bafite imishinga yamaze gutangira ariko ifite igishoro kitarengeje miliyoni ebyiri z’amadolari ya Amerika.

Icyiciro cya mbere cy’imishinga izahabwa amahirwe ni ikora ibijyanye no kurwanya indwara z’umutima, kanseri y’ibere ndetse n’iteza imbere itangwa ry’ubuvuzi hifashishijwe ikoranabuhanga.

Muri iyi gahunda hazahembwa itatu yahize iyindi, aho uwa mbere uzahabwa 30.000$, uwa kabiri uhabwe 20.000$ naho uwa gatatu uhabwe 5.000$. Abasigaye bazahabwa amahugurwa n’ibiro byo gukoreramo umwaka wose ku buntu mu nyubako ya Norrsken iri ahahoze Ecole Belge mu Mujyi wa Kigali.

HealthTech Hub Africa iherereye ku cyicaro cya Norrsken yatangijwe mu rwego rwo gufasha ibihugu ndetse n’imishinga gukorana ku bijyanye no guhanga udushya mu ikoranabuhanga kugira ngo bazamure inzego z’ubuzima muri Afurika, hagamijwe gukemura ibibazo bizirangwamo kuko usanga zifite icyuho kinini cyane mu bihugu bikennye n’ibiri mu nzira y’amajyambere.

Iyi mishinga yose, izahabwa amasomo arimo ajyanye no kubaka ubushobozi, ubufashamyumvire (mentorship), bahuzwe n’inzego za leta n’abikorera, harebwe niba ibyo bakora bitanga ibisubizo ku nzego z’ubuzima muri Afurika maze bafashwe kubyagura.

Buri mushinga ufashwa ugomba kuba waratangijwe nibura n’abantu babiri, aho izaba igizwe n’abantu b’ibitsina byombi izahabwa amahirwe kurusha iyindi.

HealthTech Hub Africa yavutse nyuma y’uko icyorezo cya Covid-19 gihagaritse ihuriro ryari kubera i Kigali mu 2020 rigamije kwigisha no guhuza abafite imishinga irimo udushya mu bijyanye n’ikoranabuhanga mu buzima.

Ryari ryarateguwe na Novartis Foundation ifatanyije n’Ishuri rikuru ry’ubuvuzi rya Harvard Global Health Institute, irya Massachusetts Institute of Technology (MIT) ndetse n’abandi bafatanyabikorwa.

Nyuma y’uko rihagaritswe nibwo hashatswe ubundi buryo bwo gufasha iyi mishinga muri Afurika maze mu 2021 hashyirwaho iyi ‘Hub’ i Kigali, ikaba izafungurwa ku mugaragaro ku itariki 2 Ukuboza 2021, ari na bwo imishinga yahize iyindi izahembwa.

Ba rwiyemezamirimo bashaka kwinjira muri iri rushanwa bashobora kwiyandikisha kuburyo bworoshye banyuze ku rubuga rwa HealthTech Hub Africa https://www.norrsken.org/hthubafrica

Norrsken izakira iyi gahunda, ni ikigo cyashinzwe na Niklas Adalberth mu 2016, gifite intego zo gufasha ba rwiyemezamirimo bafite imishinga yakemura bimwe mu bibazo byugarije Isi.

Novartis Foundation yo yashinzwe mu 1979, ifite icyicaro mu Busuwisi aho mu byo yibandaho ari uguteza imbere urwego rw’ubuzima mu bihugu byo munsi y’ubutayu bwa Sahara ndetse no mu Majyepfo y’Uburasirazuba bwa Aziya.

Ba rwiyemezamirimo bazafashwa muri iyi gahunda bazaha ibiro byo gukoreramo ku buntu ku cyicaro cya Norrsken
Inyubako Nshya ya Norrsken iherereye ahahoze Ecole Belge mu mujyi wa Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .