Girinka igejeje ku ki Abanyarwanda habura iminsi itagera kuri 300 ngo ipfundikirwe?

Yanditswe na Jean Pierre Tuyisenge
Kuya 8 Werurwe 2017 saa 01:15
Yasuwe :
0 0

Mu myaka 11 ishize, Guverinoma yatangije gahunda igamije kuzamura imibereho myiza y’abaturage by’umwihariko ubukene n’imibereho mibi bikaba amateka mu Banyarwanda. Intumbero yari uko buri muryango ubona indyo yuzuye n’ifumbire yo kuzamura ubukungu binyuze mu musaruro w’ibikomoka ku buhinzi.

Mu 2005, Ubushakashatsi ku mibereho y’abaturage (DHS) bwagaragaje ko mu bice bimwe by’igihugu, 40% by’ingo zari zifite ikibazo cyo kudashobora kwihaza mu biribwa, ndetse 45% by’abana bari hasi y’imyaka itanu bari bugarijwe n’ikibazo cy’imirire mibi, muri bo 19% byari ikibazo gikomeye kuri bo.

Inama y’Abaminisitiri yo ku wa 12 Mata 2006 yemeje uburyo bwo gukemura ibi bibazo binyuze muri porogaramu ya ‘Girinka Munyarwanda’ ishamikiye ku muco w’Abanyarwanda, aho kuva hambere bagabiranaga inka nk’ikimenyetso cy’umubano mwiza n’iterambere rusange.

Muri uwo mwaka Girinka yahawe icyerekezo cyo gufasha buri rugo rukennye kubona no korora inka ya kijyambere, iyo ibyaye ikaziturirwa urundi rugo, bityo bityo ku buryo igera kuri benshi kandi mu gihe gito.

Mu 2006, umuhigo wari ugutanga inka 350,000 bitarenze 2017. Kugeza ubu, Ikigo cy’Igihugu cy’Ubuhinzi n’Ubworozi (RAB) gitangaza ko kimaze gutanga izibarirwa ku kigero cya 76% ndetse hari n’abagiye bazitura.

Umwaka wa 2016 warangiye hatanzwe inka 248,566 ku miryango ikennye, hakaba hari hasigaye 101,434 kugira ngo umuhigo w’inka 350,000 weswe.

Ikibazo cy’imirire mibi nyuma y’itangizwa rya Girinka

Nk’uko byagaragajwe n’Ubushakashatsi bwa kabiri ku mibereho y’ingo mu Rwanda (EICV 2) bwakozwe mu mwaka wa 2005, ubukene mu cyaro bwari ku kigero cya 62,5%.

Ikindi kandi ubushakashatsi rusange ku birebana no kwihaza mu biribwa no ku mirire (CFSVA) bwagaragaje ko 28% by’Abanyarwanda baba mu cyaro bari bafite ikibazo cyo kudashobora kwihaza ku biribwa mu gihe 24% byabo bashoboraga kuba bahura n’icyo kibazo igihe icyo ari cyo cyose.

Kugeza ubu, ubushakashatsi bwa Minisiteri y’Ubuhinzi n’Ubworozi n’Ikigo cy’Igihugu cy’Ibarurishamibare ku mibereho y’Abanyarwanda bwibanda ku kwihaza mu biribwa bwakozwe mu 2015, bwagaragaje ko 80% by’ingo zihagije mu biribwa naho 20% akaba ari zo zonyine zigifite ikibazo.

Bwagaragaje kandi ko imirire mu bana bari munsi y’imyaka itanu yiyongereye ugereranyije na 2012, aho umubare w’abana bagwingiye n’abafite ibiro bike wagabanutse. By’umwihariko mu 2015 habarurwaga ko ikibazo cy’imirire mibi cyavuye kuri 47% kikagera kuri 35% mu 2015.

Muri Girinka, hatangwa inka za kijyambere

Umusaruro w’amata wariyongereye bitewe n’ubwiyongere bw’inka, kuko abaturage bahawe inka nziza kandi zigira umukamo uhagije.

Raporo y’ikigo gishinzwe guteza imbere ibyoherezwa mu mahanga, NAEB, yo mu 2015, yagaragaje ko ibikomoka ku matungo,birimo inyama, amata, amatungo n’impu byinjiririje u Rwanda asaga miliyoni 63.62$. Ni mu gihe umunyarwanda abarirwa kuba anywa litiro zigera kuri 59 ku mwaka zivuye kuri zirindwi mu myaka 17 ishize.

Imibare igaragaza ko Abanyarwanda bohereje ku isoko ryo mu karere ibinyampeke n’ibinyamisogwe byinjije asaga miliyoni 44.53 $ mu gihe imyumbati, amafi, ibitoki, n’ibindi byinjirije u Rwanda asaga miliyoni 29.89$, bikaba byaraturutse ku ngamba zo kongera umusaruro zirimo no gukoresha ifumbire.

Gusa ariko nubwo iyi gahunda yahinduye imibereho y’Abanyarwanda mu buryo bugaragara, yakomwe mu nkokora inshuro zitari nke n’abayobozi cyane cyane abo mu nzego z’ibanze bazikubiraga cyangwa bakazigenera abaturage bagendeye kuri ruswa n’ikimenyane.

By’umwihariko mu mwaka ushize wa 2016, hakozwe igenzura mu bice bitandukanye by’igihugu harebwa uburyo gahunda za leta zigamije imibereho myiza y’abaturage zibagezwaho, abayobozi bamwe barafunzwe abandi n’ubu baracyakurikiranwa mu butabera. Hamwe ruswa y’amafaranga basabaga abaturage bayihaye akabyiniriro “k’ikiziriko”, utagitanze akabura inka.

Ikindi kandi hari abaturage bagiye bahabwa izi nka barangiza bakazigurisha abandi bakanga kwitura bagenzi babo. Nko mu 2016, hakozwe isesengura biza kugaragara ko inka 12219 zagurishijwe ba nyirazo bataritura mu gihe abagera kuri 929 banze kwitura.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza