Kwamamaza

Gicumbi: Igishushanyombonera cy’akarere, iturufu ya ruswa mu bayobozi

Yanditswe kuya 9-09-2016 saa 20:16' na Pacifique Ntakirutimana


Bamwe mu baturage bavuga ko igishushanyombonera cy’akarere ka Gicumbi cyamaze kuba urwitwazo rwo kwaka ruswa ku bayobozi mu gihe bamenye ko umuturage akeneye kubaka.

Abashyirwa mu majwi n’aba baturage, ni bamwe mu bakozi b’Imirenge ndetse n’Utugari bafite imyubakire mu nshingano zabo cyane ko ngo ari bo bahora hafi y’abaturage bityo bakaba bamenya ko umuturage runaka afite igitekerezo cyo kubaka.

Abaturage bavuga ko bamwe mu bayobozi bitwaza igishushanyombonera kugira ngo basabe ruswa cyane ko ngo baba bazi neza ko umuturage nta makuru ahagije afite ku mabwiriza agenga imyubakire y’aho atuye cyangwa aho ashaka gutura.

Umwe mu baturage baganiriye na IGIHE kuri iki kibazo utashatse ko umwirondoro we ushyirwa ahagaragara, twasanze mu Murenge wa Cyumba, yavuze ko abayobozi bitwaza igishushanyombonera bakaka ruswa abaturage.

Muri uyu murenge hanamaze iminsi havugwa ibibazo by’abari baturiye umupaka wa Gatuna bimuwe kubera ibikorwa byo kwagura umupaka ariko bakavuga ko n’ubwo bahawe amafaranga batoroherezwa kubona ahandi bubaka.

Yagize ati“ Ijambo igishushanyombonera rigiye kutumaraho amafaranga kuko umuyobozi yumva ko ugiye kugura ahantu ngo wubake akagerageza mugahura akakubwira ko hatateganirijwe gucururizwa ni urugero, ariko akakwereka ko umwegereye neza yabigufashamo ubwo kandi akabibwira ugurisha n’ugura mwese mukamuha akantu. Ariko ibi tubona byamarwa n’uko aho ariho hose umuturage yajya asobanurirwa igishushanyombonera yewe akanagira uruhare mu kugishyiraho.”

Mugenzi we yivugira ko nyuma yo kugerageza kubaka bakaza kumusenyera yaranatanze ruswa ngo yahisemo kwigira gukorera muri Uganda.

Yagize ati“Bamaze kungurira nashatse kubaka, mudugudu ambwira ko mbanza gutegereza igishushanyombonera kikaza ;nyuma rero yaje kunyegera ambwira ko hari uburyo twabigenza. Urumva namuhaye amafaranga ariko inzu imaze kuzamuka abakozi b’Akarere baraje barayisenya ngo nubatse ahagenewe gushyirwa isoko. Byose biterwa n’uko batatwereka icyo gishushanyo ngo tukimenye twicare tugifiteho amakuru. Nahise numva ncitse intege mpitamo gufata ayo nsigaranye ndambuka ubu nkorera Kabare.”

Undi twavuganye atuye mu Murenge wa Rwamiko we yagize ati“ Twebwe hano n’ubundi batwita abaturage, akenshi hari abayobozi baba banavuga ko tutabisobanukiwe; ubwo wamubwira ko ushaka kubaka akakwereka ko ibyo ushaka kubaka atari byo byahagenewe kandi ntanabikwereke ngo ubirebe, ubwo rero iyo umwegereye neza arakureka ukiyubakira;mbese udafite agafaranga ngo umuhe ntiwubaka pe!”

Ku ruhande rw’ubuyobozi bw’Akarere ka Gicumbi ntibwerura ngo bwemere ibyo aba baturage bavuga, gusa ngo n’aho bigaragaye ababikoze barakurikiranwa byabahama bagahanwa.

Mudaheranwa Juvenal, Umuyobozi w’Akarere ka Gicumbi, agira ati“Ayo ni amakuru umuntu atahita avuga ko mu Karere ikibazo cyabaye kirekire ariko na none tugomba koko gukurikirana tukareba. Inama nagira rero abaturage ni uko ukeneye kubaka yajya yihutira kwegera ubuyobozi guhera ku Kagari agasobanurirwa amabwiriza ajyanye n’ibyo ashaka kubaka akabyibonera. Ikindi kuki bumva ko bagura uburenganzira bwabo? Nibacike ku muco wo kumva ko nibatanga ruswa ari bwo bahabwa serivisi kandi natwe nk’Akarere hari ubwo tumanuka mu nama zitandukanye tukabibasobanurira.”

Mu minsi ishize ubwo ubuyobozi bw’Akarere bwagiranga inama n’abajyanama bako, abayobozi bagiriwe inama yo kujya begera abaturage bagasobanurirwa ibijyanye n’igishushanyombonera cy’akarere mu rwego rwo guca burundu imyubakire y’akajagari ikunze kuvugwa hirya no hino mu Karere ka Gicumbi.

Ibi byo kwaka ruswa abaturage kugira ngo babashe kubaka, biri muri bimwe bituma abaturage batagirira icyizere abayobozi babo cyane abo mu nzego z’ibanze nkuko byagaragajwe mu bushakashatsi bwakozwe na Sena y’u Rwanda mu 2014,aho abayobozi b’uturere bizerwa ku kigero cya 84,4% naho abo mu Nama Njyanama zo mu Midugudu icyizere kikaba kiri kuri 79%.

Ibiro by'akarere ka Gicumbi

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved