00:00:00 IGIHE NETWORK KN KINYARWANDA EN ENGLISH FR FRANCAIS

Gakenke: Kawa yabaye isoko y’akazi n’iterambere mu banyamuryango ba Koperative Abakundakawa

Yanditswe na Claude Bazatsinda
Kuya 21 Kamena 2021 saa 12:10
Yasuwe :
0 0

Bamwe mu banyamurwango ba Koperative Abakundakawa yo mu Murenge wa Rushashi mu Karere ka Gakenke, biganjemo urubyiruko, bavuga ko kwibumbira hamwe muri iyi Koperative byabateje imbere binyuze mu buhinzi bwa Kawa bakora umunsi ku munsi.

Koperative Abakundakawa ibumbiye hamwe abanyamuryango 1873 harimo abagore 788 abagabo 1087 n’ababarizwa mu cyiciro cy’urubyiruko 367.

Kuri ubu, bamwe muri abo banyamuryango bavuga ko bamaze gutera imbere binyuze muri ubu buhinzi bwahoze bufatwa nk’ubw’abakuze.

Nyiramasengesho Serapie w’imyaka 24, yavuze ko ubu buhinzi amazemo imyaka itandatu bwamuteje imbere kandi ateganya kongera ubuso n’ibiti bya kawa, agamije kongera umusaruro mu bwinshi n’ubwiza.

Yagize ati "Nabonye kawa ari cyo gihingwa kirambye cyateza imbere urubyiruko, ubu nsarura ibiro 500 mu biti 100 nateye. Byanteje imbere ubu ntangira umuryango wanjye ubwisungane mu kwivuza kandi mbasha kwikemurira ibibazo byose binsaba amafaranga mbikesha ubu buhinzi. Ndizigamira, ubu noroye ingurube ebyiri n’intama zimaze kurenga zirindwi, mu gihe kizaza ndateganya kugura inka."

"Icyo nabwira urubyiruko bagenzi banjye ni uko bahaguruka bakinjira mu buhinzi bwa kawa kuko ariho dushobora gukura iterambere rirambye”.

Habiyaremye Oswald wo mu Murenge wa Rushashi yavuze ko ubuhinzi bwa kawa bwatumye yiyubakira inzu igezweho yo guturamo. Ati "Njye njya gukunda kawa nabikomoye ku babyeyi banjye bajyaga kuzikorera tukajyana."

"Ubu mfite ibiti birenga 150, nkinjira muri Koperative Abakundakawa, batwakiriye neza, batwigisha kwita kuri kawa, batwigisha gukora ifumbire y’imborera. Ndetse batugurira n’umusaruro dukuramo bakanaduha ubwasisi, by’umwihariko nagize n’amahirwe yo kubona akazi muri koperative, Ubu maze kwiyubakira inzu igezweho murayibona, ntunze umuryango w’abantu batanu kandi no mu buzima busanzwe ntacyo mbaye ndi mu iterambere nk’abandi.”

Usabamariya Alice na we yagize ati “Maze kugabanyirizwa umugabane shingiro nkaba umunyamuryango wa koperative, nahinze kawa ubu mfite ibiti 100 nkuraho ibiro birenga 800, byanteje imbere, nirihiye kaminuza ndarangije. Mfite inka za kijyambere ebyiri. Mfite intego yo kugira ibiti 500 byanjye bya kawa.’’

Agoronome ushinzwe gukurikirana kawa muri Koperative Abakundakawa, Habyarabatuma Stanislas agira inama abahinzi yo kwita kuri iki gihingwa birinda kucyangiza ngo bahingemo ibihingwa bitagendanye na cyo.

Yagize ati "Hari ibindi bihingwa bishobora kuvangwa na kawa harimo nk’ibiti by’imyungo ushobora no gushyiramo insina ariko ukazitaho ntizibe nyinshi kuko ibyo birinda kawa kuba yakubitwa n’urubura cyangwa izuba ndetse biranayifumbira, ariko ntibivuga ko wavangamo n’ibijumba cyangwa ibindi bihingwa bituma uyitema imizi iyo ubihinga cyangwa ubisarura, byo birabujijwe."

"Hano duhinga kawa yo mu bwoko bwa Arabica, tukayitegura mu bihoho bw’ibirere tukayiha abahinzi na bo bakayihinga ku buryo mu myaka itatu iba yatangiye gutanga umusaruro kandi ishobora kwera kugeza ku myaka 50 iyo yitaweho igafumbirwa neza."

Umucungamutungo wa Koperative Abakundakawa,Kagenza Antoine, yavuze ko usibye kuba koperative ifasha abanyamuryango bayo gukusanyiriza hamwe umusaruro wabo inawugura ndetse ikawutunganya ikawushakira n’amasoko nyuma haboneka inyungu bakayigabana.

Ati "Duhuriza hano umusaruro wa kawa y’abanyamuryango twirinda abamamyi babahenda, tukayitunganya ari na ko bahabwamo akazi. Kawa yacu irazwi ku ruhando mpuzamahanga kuko iba yarafumbijwe imborera gusa ari umwimerere noneho tukayohereza i Burayi na Amerika."

"Mbere bayigurirwaga ku 100Frw ariko twe tubaha 250 Frw ku kiro, iyo tuyicuruje neza dusubira inyuma tukabaha ku nyungu, nk’ubu twabongereyeho 30 Frw ku kilo. Twatanze akazi ku baturage baturiye uruganda ndetse dufite n’imishinga y’iterambere kuko duteganya kubaka uruganda rutonora kawa y’amaganda, twatangiye no kubaka Guest House izadufasha kujya twakira abashyitsi batugana muri aka gace."

Umuyobozi wa Koperative Abakundakawa, Bizimana Anastase yavuze ko batangiye gahunda yo gusazura kawa bagamije gusimbuza izimaze igihe zishaje.

Yagize ati "Twatangiye gahunda yo gusazura kawa twari dufite kuko buri mwaka dutegura ingemwe zirenga ibihumbi 10 twifashishije urubyiruko dufite muri Koperative. Bizateza imbere igihingwa cya kawa na koperative ikagira icyizere kirambye ko izakomeza kubona umusaruro uhagije wa kawa."

Koperative Abakundakawa, ifatanyije n’abafatanyabikorwa bayo barimo Starbucks, Agriterra na Sustainable Growers ifasha abanyamuryango bayo kubona ibikoresho by’ibanze bifashisha muri ubu buhinzi aho umwaka ushize bahawe ibifite agaciro ka miliyoni 19 z’amafaranga y’u Rwanda.

Abanyamuryango ba Koperative Abakundakawa Rushashi bavuze ko ubuhinzi bwa kawa bumaze kubageza kuri byinshi
Ubuhinzi bwa kawa bugaragaramo ibyiciro by'abantu batandukanye kandi bose bavuga ko bwabahinduriye ubuzima
Koperative Abakundakawa Rushashi ibanza gusukura kawa mbere yo kuyitunganya
Muri Koperative Abakundakawa Rushashi bita kuri kawa kuva ikiri nto kugeza igiye gutunganywa
Ubuhinzi bwa kawa bwabahinduriye ubuzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .