BK yatangije ‘Urumuri’, gahunda igamije gufasha ba rwiyemezamirimo bafite imishinga myiza

Yanditswe na Mukaneza M.Ange
Kuya 8 Werurwe 2017 saa 06:30
Yasuwe :
0 0

Banki ya Kigali, yatangije gahunda yitwa Urumuri, igamije gutera inkunga ba rwiyemezamirimo bakiri bato, bafite imishinga ishobora kuvamo ubucuruzi bukomeye mu gihe kiri imbere.

Iyi gahunda yiswe “BK Urumuri Initiative” yatangijwe ku itariki ya 7 Werurwe 2017, ikaba iri muri gahunda yo kwizihiza imyaka 50 iyi banki imaze itangiye gukora.

Umuyobozi Mukuru wa BK, Dr Diane Karusisi, yavuze ko ikigamijwe ari ukureba abafite ibitekerezo bizima, bishobora kuvamo ubucuruzi bukomeye mu bihe biri imbere.

Ati “Iyo turebye imyaka 50 iri imbere, twibazaga uko twafasha abakiri bato, kugira ngo ejo hazaza bagire ubucuruzi bukomeye kandi bakoresha ikoranabuhanga. Twabonaga ko natwe tugomba kubigiramo uruhare kuko natwe bizatugiraho ingaruka.”

Yakomeje asobanura ko abantu bose babyifuza bazohereza imishinga yabo, nyuma hagatoranywamo 50 yahize indi aho ba nyirayo bazahabwa amahugurwa azamara amezi arindwi, ku bufatanye n’Ikigo INKOMOKO gisanzwe gihugura ba rwiyemezamirimo.

Ati “Icyo dushaka ni ibitekerezo bizatuma u Rwanda rw’ejo rutera imbere cyane. Nta myaka twashyizeho […]. Muri abo 50 tuzafatamo batanu tuzaha inguzanyo ariko itariho inyungu.”

Umuyobozi ushinzwe ibikorwa mu Kigo cy’igihugu cy’Iterambere (RDB), Hategeka Emmanuel, yashimye BK ku bikorwa bihindura ubuzima bw’abantu birimo n’iki gikorwa yise Urumuri yagiye ikora mu myaka imaze ibayeho.

Yakomeje avuga ko iyi gahunda itazagirira akamaro ba rwiyemezamirimo gusa, kuko izagera no ku baturage ubuzima bwabo bukazahinduka binyuze muri iyi mishinga.

Banki ya Kigali ivuga ko amahugurwa n’inguzanyo zizatangwa, bizatwara miliyoni zirenga 100 zishobora kwiyongera bitewe n’ubwoko bw’imishinga izaba yatanzwe.

Ku bisobanuro birambuye no gutanga umushinga, wasura urubuga http://www.bk.rw/urumuri/ . Imishinga izakirwa kugeza tariki ya 5 Mata 2017.

Umuyobozi ushinzwe ibikorwa muri RDB, Emmanuel Hategeka
Umutoni Pamela wari mu bahatanira ikamaba rya Miss Rwanda 2017 nawe n'umwe mu bitabiriye igikorwa cyo gutangiza iki gikorwa cya BK
Umuyobozi mukuru wa BK, Dr Diane Karusisi
Abantu batandukanye bari bitabiriye itangizwa ry'iyi gahunda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza