BDF yatanze amazi meza ku baturage bavomaga ibirohwa i Muhanga na Ruhango

Yanditswe na Jean Pierre Tuyisenge
Kuya 1 Ukuboza 2017 saa 07:08
Yasuwe :
0 0

Ikigega gitera inkunga imishinga mito n’iciriritse, BDF, cyubakiye abaturage bo mu Murenge wa Byimana mu Karere ka Muhanga n’abo mu wa Ruhango mu Karere ka Ruhango, amavomo nyuma y’igihe kinini bakoresha amazi yanduye bavomaga mu mibande.

Mu turere twa Muhanga na Ruhango haracyagaragara abaturage badafite amazi meza hafi y’aho batuye, bigatuma bavoma kure ndetse n’ayo bavomye akaba atari meza.

Umuyobozi muri BDF ushinzwe amategeko no gukurikirana imishinga wari uhagarariye umuyobozi mukuru mu muhango wo gutaha ibyo bikorwa byafunguwe kuri uyu wa 1 Ukuboza 2017, Umugwaneza Monique, yavuze ko biri muri gahunda icyo kigo gifite cyo guteza abaturage imbere nta wusigaye inyuma kandi gihereye ku buzima bwabo.

Ubundi BDF icyo dushinzwe ni ugushyigikira imishinga y’iterambere,umuturage tukamufasha kuva mu bwigunge, no kuva mu bukene ariko ntabwo ushobora gushyigikira imishinga mito n’iciriritse mu bantu badafite ubuzima buzima, murabizi amazi ni ubuzima, tukaba twaratekereje tuti ‘aba bantu tubahaye amazi bakagira ubuzima bwiza byatuma bahaguruka bagakora bafite ubuzima natwe tukabona kubafasha muri BDF.”

Yavuze ko usibye kuba babahaye amazi basanzwe banakorana n’akarere ka Ruhango na Muhanga mu gufasha abafite imishinga, bakaba ngo bitegura no gukomeza kugeza ibindi bikorwa no mu yindi mirenge.

Umuyobozi w’akarere ka Ruhango, Mbabazi F. Xavier, yashimiye BDF ku nkunga iteye akarere, avuga ko kugeza ubu abaturage bafite amazi bageze kuri 80% kandi byari biteganyijwe ko uyu mwaka urangira abaturage 100% bagomba kuba bose bafite amazi meza.

Yagize ati “ Igikorwa BDF idukore ni cyiza cyane kuko akarere kacu ni kamwe mu tutaragira amazi ahagije ku baturage bitewe no kuba nta masoko ahagije ahari, kuba badufashije kugeza amazi hano ku baturage bo mu Kagari ka Rwoga, ni igikorwa gitumye twongera umubare w’abaturage bafite amazi meza mu karere kacu.”

Amazi ahabwa abaturage bo mu Karere ka Ruhango aturuka ku ruganda rw’amazi rwa Mpanga ruri mu Karere ka Nyanza ariko na yo akagarukira mu Mujyi wa Ruhango gusa.

Abaturage bahawe amazi bashimye icyo gikorwa cyakozwe na BDF bavuga ko baruhutse kumanuka imisozi bajya gushaka amazi, ndetse bavuga ko n’abana babo batazongera gukererwa ishuri cyangwa ngo babe bakomereka bagiye gushaka amazi ku mugezi kuko ngo habaga ari habi kandi hari abantu benshi.

Uwizeye Jacqueline yagize ati “ Turishimye kuba tubonye amazi hafi tuyabonye tuyashaka kuko umuntu yajyaga gufura nk’umwenda w’umweru ugasanga urahindanye kubera amazi mabi, n’iyo wahinguraga ufite inyota waburaga icyo unjywa mu gihe wabaga utarateka ayo ufite, turabyishimiye cyane rwose sinzi uko nabivuga.”

Amazi yatanzwe azafasha ingo z’abaturage basaga 300 batuye muri iyo mirenge, abayobozi bitabiriye gufungura ku mugaragaro ayo mazi basabye abaturage kurushaho kuyafata neza no kuyabungabunga, kumva ko ari ayabo no kuyarinda ko ibikoresho biyubatse byakwangirika.

Amazi yahawe abaturage atahwa ku mugaragaro n'abayobozi mu nzego zitandukanye
Abaturage bahawe amazi bishimiye ko agiye kubafasha kugira ubuzima bwiza
Umuyobozi muri BDF ushinzwe amategeko no gukurikirana imishinga wari uhagarariye umuyobozi mukuru mu muhango, Umugwaneza Monique
Umuyobozi w’Akarere ka Ruhango, Mbabazi F. Xavier

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza