Banki y’Isi yashimye uko u Rwanda rurwanya ubukene binyuze mu buhinzi

Yanditswe na Kanamugire Emmanuel
Kuya 15 Gicurasi 2016 saa 07:32
Yasuwe :
0 0

Imibare iheruka gutangazwa n’Ikigo cy’Igihugu cy’Ibarurishamibare (NISR), igaragaza ko Abanyarwanda babarirwa mu murongo w’ubukene bagera kuri 39.1% bavuye kuri 44%, naho abari mu murongo w’ubukene bakaba ari 16.4%.

Umuyobozi wungirije wa Banki y’Isi ushinzwe umugabane wa Afurika, Maktar Diop, avuga ko kuba u Rwanda rwaragabanyije ubwinshi bw’abari mu murongo w’ubukene binyuze mu guteza imbere ubuhinzi ari intambwe yo kwishimira kandi umugabane wose ukwiye kurwigiraho kugira ngo Afurika ibe umugabane uzira inzara.

Kuri uyu wa Gatandatu tariki 14 Gicurasi, Diop na Minisitiri w’Ubuhinzi n’Ubworozi, Dr. Gerardine Mukeshimana basuye imwe mu mishinga iterwa inkunga na Banki y’Isi binyuze mu mushinga wa LWH/RSSP mu Karere ka Rwamagana, Umurenge wa Mwurire akagari ka Gahengeri.

Diop yavuze ko ibyo u Rwanda rukora cyane cyane mu kugabanya ubukene ari intangarugero ku mugabane wa Afurika.

Yagize ati “Imyaka 20 itwereka ko twishyize hamwe twakora byiza nk’Abanyafurika n’abandi bakatureberaho. Ibyo u Rwanda rukora bitanga icyizere ko Afurika yose izihaza mu biribwa ikarwanya inzara n’ubukene.”

Akomeza avuga ko yishimira ibyo Guverinoma y’u Rwanda ikora kuko ari ibintu bishimishije kubona abaturage bakoresha ikoranabuhanga rishya bakifashisha amaterasi mu kongera umusaruro wabo, bigatuma bita ku mirire myiza binyuze mu byo beza, kandi bakabikuramo umusaruro ubateza imbere.

Mu mushinga LWH/RSSP abaturage bigishwa guhinga mu buryo bwa Kijyambere bifashishije ifumbire n’imbuto z’indobanure bakeza byinshi bityo bakikura mu bukene.

Abaturage batanze ubuhamya barimo Musabyemariya Gaudence, yavuze ko mbere yabaga muri Nyakatsi ariko umushinga wo guhuza ubutaka wamufashije kubaka inzu nziza ikomeye akigurira na moto imufasha kwibeshaho neza.

Yagize ati “Niyubakiye inzu, ngura moto nitwarira, iwacu mu itsinda twazanye umuriro w’amashanyarazi n’amazi meza tubikesheje uyu mushinga utuma tweza byinshi.”
Muri rusange abo baturage batojwe kugana ibigo by’imari barizigamira kandi babasha kwiyishyurira ubwisungane mu kwivuza ku gihe.

Minisitiri Mukeshimana yasabye abaturage gukomeza gushyira mu bikorwa ibyo bize bakubakira ku majyambere bagezeho kugira ngo batazasubira mu bukene.

Yagize ati “Mukore ubuhinzi bw’umwuga bubahe umusaruro ubateza imbere. Mushake indi mirimo yunganira ubuhinzi kandi mwite ku mirire y’abana kuko Leta itazemera ko abana bagwingira kandi dufite ibyangombwa byose.”

Umushinga LWH/RSSP wakoze amaterasi y’indinganire ku buso bungana na hegitari 3000 mu mirenge ya Mwurire, Nzige na Gahengeri. Abaturage bahabwa imbuto n’ifumbire bagahinga ibigori, ibishyimbo na soya bakiteza imbere.

Umuyobozi wungirije wa Banki y’Isi ushinzwe umugabane wa Afurika, Maktar Diop
Minisitiri w'Ubuhinzi n'Ubworozi,Dr. Gerardine Mukeshimana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244