2016: Ifaranga ry’u Rwanda ryataye agaciro ku kigero cya 9.7% ugereranyije n’idolari

Yanditswe na Mukaneza M.Ange
Kuya 22 Gashyantare 2017 saa 11:17
Yasuwe :
0 0

Banki Nkuru y’u Rwanda, BNR, yatangaje ko umwaka ushize ubukungu bw’u Rwanda butahungabanye cyane, ariko ifaranga ryarwo rikaba ryarataye agaciro ku kigero cya 9.7% ugereranyije n’idolari rya Amerika.

Ibi byatangarijwe mu gikorwa cyo kugaragaza uko ubukungu bw’u Rwanda buhagaze kuri uyu wa Gatatu tariki ya 22 Gashyantare 2017.

Banki Nkuru y’u Rwanda yagaragaje ko mu 2015 ifaranga ry’u Rwanda ryari ryataye agaciro ku kigero cya 7.6% ugereranyije n’idolari.

BNR isobanura ko nubwo mu 2016, ikinyuranyo hagati y’ibyoherezwa n’ibitumizwa mu mahanga, kingana na 5.9% aho cyavuye kuri miliyoni 1752.5$ umwaka ushize kikagera kuri miliyoni 1649.7$ uyu mwaka, bitabujije ifaranga ry’u Rwanda guta agaciro.

Agaciro k’ibyo u Rwanda rwohereza mu mahanga kazamutse ku kigero cya 7.1% bigera kuri miliyoni 598.7$ bivuye kuri miliyoni 558.7$ umwaka ushize, ni mu gihe ingano yabyo yazamutse ku kigero cya 19.3%.

Uku kwiyongera kwaturutse ku kwitwara neza ku isoko kw’ibicuruzwa u Rwanda rwohereza mu mahanga bitari umwihariko warwo nk’ibiribwa, ifu, imitobe n’ibindi, bifite agaciro ka miliyoni 155.27$ bivuye kuri miliyoni 115.73$ mu 2015, bikaba byihariye 34.2% y’ibyoherejwe.

Ibyo igihugu gitumiza hanze kikongera kikabyohereza byo byinjije miliyoni 224.5$ bivuye kuri miliyoni 177.87 $ mu 2015, bikaba bihwanye na 26.1% by’ibyo u Rwanda rwatumije.

Ibicuruzwa by’umwimerere w’u Rwanda rwohereje hanze, birimo icyayi, ikawa, amabuye y’agaciro n’ibindi, mu 2016 byari bifite agaciro ka miliyoni 219.1$, bivuye kuri miliyoni 265.2$ mu 2015, bihwanye na 36.6% by’ibyoherejwe mu mahanga, ugereranyije na 47.5% by’umwaka wabanje.

BNR ivuga ko iyo witegereje agaciro k’ibyo ubicuruzwa usanga kuva mu 2014 katiyongera nubwo ingano yabyo yo ikomeza kwiyongera. Ibi ahanini biterwa n’igabanuka ry’ibiciro byabyo ku isoko mpuzamahanga.

Ni mu gihe agaciro k’ibyatumijwe mu mahanga kagabanutse ku kigero cya 2.7%, aho byavuye kuri miliyoni 2 311.24 $ mu 2015 bikagera kuri miliyoni 2 248.48$ mu 2016.

BNR itangaza ko nubwo agaciro k’ibitumizwa mu mahanga byagabanutse, ibiribwa biri mu bigitumizwa hanze ku bwinshi aho byihariye 32.4% y’ibyatumijwe byose.

Bituma kandi ibiciro by’ibiribwa bikomeje kwiyongera, by’umwihariko imboga n’ibindi bikomoka ku buhinzi, ahanini bitewe n’amapfa. Impuzandengo y’izamuka ry’ibiciro yari 5.7% ivuye kuri 2.5% mu 2015.

Guverineri wa Banki Nkuru y’u Rwanda, John Rwagombwa, yavuze ko muri uyu mwaka wa 2017, ubukungu bw’u Rwanda buzaba bumeze neza kuko imvura izaboneka neza; bigatuma ubuhinzi butanga umusaruro uhagije ugereranyije n’umwaka ushize.

Yakomeje avuga ko kandi ikibazo cy’ibiciro by’ibyo u Rwanda rwohereza mu mahanga byari byaragabanutse mu myaka ibiri ishize gisa n’ikigiye gukemuka, kuko kuva mu mpera za 2016 byatangiye kuzamuka.

Ati ”Imibare tubona ku rwego mpuzamahanga ni uko ibyo biciro byongeye kuzamuka, tukaba twizeye ko abacuruzi bohereza ibintu mu mahanga, bazashobora kutuzanira amadevize yiyongereyeho kurushaho ayo twabonye mu mwaka ushize.”

BNR itegereje imibare y’Ikigo cy’igihugu cy’ibarurishamibare (NISR)kugira ngo igaragaze ishusho nyakuri y’imiterere yo guta agaciro k’ifaranga ry’u Rwanda n’ihindagurika ry’ibiciro.

Bamwe mu bakurikiranye igikorwa cyo kumurika uko ubukungu bw'u Rwanda buhagaze muri iki gihe
Sanjeev wagizwe umuyobozi mukuru ushinzwe serivise z’ubucuruzi muri Atlas Mara
Visi Guverineri wa Banki Nkuru y'Igihugu, Monique Nsanzabaganwa
Guverineri wa Banki Nkuru y'Igihugu, John Rwangombwa

Amafoto: Hugues Ghislain
[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza