Abafite amazu muri Kigali rwagati basabwe gusenya, bakifatanya mu kubaka amazu mashya

Abafite amazu muri Kigali rwagati basabwe gusenya, bakifatanya mu kubaka amazu mashya


Yanditswe kuya 8-07-2012 - Saa 08:00' na Kagenza C.

Ba nyir’amazu ari mu Mujyi wa Kigali rwagati uhereye imbere y’inyubako Union Trade Center hakorera Akagera Motor, ukazenguruka imbere yo kwa Rubangura, kugeza ahakorera sosiyete Benalco, basabwe kwishyira hamwe bakubaka mu buryo bujyanye n’igishushanyombonera cy’umujyi, bitaba ibyo bakagurisha ibibanza ku bashoboye kubaka.

Ibi byemerejwe mu nama yabaye kuri uyu wa Gatanu tariki ya 6 Nyakanga yahuje ubuyobozi bw’Umujyi wa Kigali bwari buhagarariwe na Nizeyimana Alphonse, Umuyobozi Wungirije ushinzwe ubukungu, na ba nyir’amazu y’ahavuzwe haruguru, aba banahawe igihe ntarengwa cy’itariki 25 Kanama, aho bagomba kuba bamaze kwimura ibikorwa byose byahakorerwaga, bityo imirimo yo kubaka igatangira.

Usibye kandi aka gace kagiye gusenywa gahera kuri Rond Point nkuru yo mu Mujyi wa Kigali, gukomeza imbere y’umuturirwa Kigali City Tower no kwa Rubangura, ukazamuka kugera aho sosiyete Akagera Motor ikorera, ahandi hagiye gusenywa ba nyiraho bagasabwa kubaka inyubako zijyanye n’igishushanyombonera ni abafite amazu ari mu gace gahera ahahoze hakorera ORTPN, hafi ya Hotel des Mille Collines, ugatambika ahakorera BCR kugeza kuri Hotel Serena.

Hari kandi ahandi biteganyijwe ko hagiye kubakwa inzu zijyanye n’igishushanyombonera, harimo agace kahozemo ishuri rya ETO Muhima kugeza ahakorera Alimentation Chez Venant, ahari isoko rya Nyabugogo, ndetse no mu Kiyovu cy’abakene, mu nkenkero z’inyubako nshya ya RSSB, hose bikaba biteganyijwe ko abahakorera ibikorwa bitandukanye kuri ubu baba bari gushaka aho bimukira, nk’uko byatangwajwe n’ubuyobozi bw’Umujyi.

Benshi mu basabwe kwimuka ahagiye kubakwa batangarije IGIHE ko n’ubwo bamenyeshejwe ku nshuro nyinshi ko aho bakorera hagiye kubakwa bushya, ngo kugeza n’ubu kubona amazu yo kwimuriramo ibikorwa byabo biracyagoye mu Mujyi wa Kigali, kuburyo bamwe muri bo bafite impungenge ko bizabatera igihombo.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO