Kwamamaza

Uruganda rw’isukari rwa Kabuye rugiye gushorwamo miliyari 60 Frw

Yanditswe kuya 13-09-2016 saa 11:34' na Mukaneza M.Ange


Mu rwego rwo kwagura no kongera umusaruro ukagera kuri toni ibihumbi 55 ku mwaka, Madhvani Group isanzwe igenzura uruganda rw’isukari rwa Kabuye yagaragaje ko yifuza gushoramo miliyari 60 z’amafaranga y’u Rwanda.

Ubusanzwe uruganda rw’isukari rwa Kabuye rutanga umusaruro uri hagati ya toni ibihumbi 10 na 15 ku mwaka.

Madhvani Group isanzwe ifite icyicaro muri Uganda yamaze kugeza kuri leta y’u Rwanda umushinga ujyanye no kwagura uru ruganda.

Mu kiganiro na The Newtimes, Mayur Madhvani, umuyobozi wa Madhivani Group yavuze ko muri uyu mushinga mushya bifuza ko umusaruro ugera kuri toni ibihumbi 55 ku mwaka.

Ibi yabivuze ko ejo hashize ubwo yari mu Rwanda aho yari ayoboye itsinda ryagiranye ibiganiro n’abayobozi baturutse mu Kigo cy’igihugu cy’iterambere, RDB.

Nk’uko yabisobanuye, muri miliyari 60 z’amafaranga y’u Rwanda bifuza gushora mu ruganda rw’isukari rwa Kabuye, harimo azakoreshwa mu bijyanye n’ingufu aho bateganya kubona megawatts 12 z’umuriro w’amashanyarazi na litiro miliyoni esheshatu za Ethanol ku mwaka.

Mayur yavuze ko zimwe muri izi ngufu zizakoreshwa mu mirimo y’uruganda, mu gihe izizasaguka zizashyirwa ku muyoboro w’igihugu.

Yanagarutse kandi ku mbogamizi bahuye na zo mu bihe bishize zirimo ubutaka buto no kuba umugezi wa Nyabarongo waruzuraga bikangiza ibisheke, ari na byo byatumye umusaruro utaboneka nk’uko babaga babyiteze.

Ati” Mu bibazo turi gukemura harimo ikijyanye n’ubutaka. Twahuye n’ibibazo cyane kubera imihindagurikire y’ibihe mu myaka ine cyangwa itanu ishize, byagiye bituma umugezi wa Nyabarongo wuzura, ibisheke bikangirika.”

Kamlesh Madhvani,umwe mu bagize inama y’ubutegetsi ya Madhvani Group yavuze ko biteguye guhita batangira imirimo yo kwagura, igihe cyose leta yaba ibahaye uburenganzira.

Yakomeje avuga ko hari miliyoni umunani z’ama euro yatangiye gukoreshwa mu guhangana n’ingaruka zituruka ku kuzura k’umugezi wa Nyabarongo.

Madhvani Group yaguze uruganda rw’isukari rwa Kabuye mu 1997 kuri miliyoni 1.5 z’amadorali, byatumye iki kigo kiba icya mbere mu bigo bya leta byeguriwe abikorera nyuma ya Jenoside yakorewe Abatutsi mu 1994.

Umuyobozi mukuru wa RDB, Francis Gatare yemeje ko koko uyu mushinga bawushyikirijwe ubu ukaba uri gusuzumwa kugira ngo wemezwe.

Yongeye ho ko igitekerezo cyo kongera umusaruro w’isukari bacyakiriye neza kuko kugeza ubu asaga miliyari 28 z’amafaranga y’u Rwanda atakarira mu gutumiza isukari mu mahanga.

Gatare yagaragaje ko bari bamaze igihe basaba uru ruganda kongera umusaruo kugira ngo bagabanye isukari itumizwa hanze ahubwo barebe uko yajya yoherezwayo ariko ntibigerweho kubera ibibazo bituruka ku mugezi wa Nyabarongo.

Yavuze ko amasezerano ya nyuma leta ishobora kuzagirana na Madhvani Group kugira ngo intego igerweho ari uko impande zombi zashoramo amafaranga.

Kugeza ubu toni ibihumbi 80 ku mwaka ni cyo kigereranyo cy’isukari iba ikenewe mu Rwanda.

Uretse gushora imari mu ruganda rw’isukari rwa Kabuye, Madhvani Group yanagaragaje ubushake bwo kugura Hotel Umubano iherutse gushyirwa ku isoko nyuma y’uko sosiyete Libya Africa Investment Portfolio yari ifitemo imigabane ingana na 60% inaniwe gukomeza kuyicunga.

Mayur Madhvani, umuyobozi wa Madhivani Group yavuze ko muri uyu mushinga mushya bifuza ko umusaruro ugera kuri toni ibihumbi 55 ku mwaka

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved