Kwamamaza

Uko Perezida Kagame na Museveni babona ishoramari no kwihuza kw’ibihugu bya Afurika

Yanditswe kuya 5-09-2016 saa 15:38' na Cyprien Niyomwungeri


Mu nama mpuzamahanga y’iminsi ibiri yiga ku ishoramari rya Afurika yatangiye kuri uyu wa Mbere i Kigali, Perezida Kagame na Perezida Yoweli K. Museveni, bagaragaje ko umusaruro witezwe mu kwihuza kw’ibihugu bya Afurika n’ishoramari bikomeje gusubizwa inyuma n’imyumvire ya bamwe itabibonamo inkingi y’iterambere rirambye.

Mu kiganiro cyayobowe na Eleni Giokos, Umunyamakuru wa CNN muri Afurika, kikitabirwa na Perezida Kagame, Perezida Museveni, Admassu Tadesse Umuyobozi wa PTA Bank, na Paul Hinks uyobora sosiyete y’ishoramari Symbion, bagarutse ku mbogamizi mu ishoramari rya Afurika n’amahirwe ahaboneka.

Inama yiga ku ishoramari ifatwa nk’amahirwe akomeye ku bihugu bya Afurika yo gutangira gukorana ku mishinga bihuriyeho ishobora gukurura ishoramari, ikazamura ubukungu.

Perezida Kagame yagaragaje ko imwe mu mbogamizi ikomeye ibangamiye ukwihuza n’imikoranire y’ibihugu ari imyumvire mibi ya bamwe mu banyafurika baseta ibirenge mu ishyirwa mu bikorwa ry’imishinga y’ubufatanye iba yaremeranyijweho, ntibayihe agaciro nk’inzira imwe ishobora gufasha Afurika gutera imbere.

Yagize ati “Ikibazo dufite ni amahitamo y’uko dukoresha igihe cyacu, hari uguhitamo gukoresha igihe cyawe mu bucuruzi, gukorera amafaranga ngo utere imbere cyangwa utekereza byimbitse ku bukene.”

Yakomeje agaragaza ko Umuryango wa Afurika y’Iburasirazuba ari urugero rwiza rwo kwihuza kw’ibihugu, kandi utanga icyizere ko uzagera kuri byinshi mu gihe kizaza.

Aha yatanze urugero rw’aho ubuhahirane bworohejwe abaturage bagakoresha indangamuntu, gukuraho ikiguzi mu guhamagarana n’ibindi.

Perezida Museveni yashimangiye ko ubwo Afurika yigabanyagamo imiryango ine y’ubukungu, hari abatarabyumvise ariko muri iyi minsi nibura hari icyizere ko birimo kugaragara ko kwihuza bizatuma Afurika ihangana n’ibibazo iterwa no kugira isoko ritoya ry’ubucuruzi.

Ubucuruzi buracyari inzitizi

Muri iyi nama ibiganiro biribanda ku ngingo zirimo ubucuruzi hagati y’uturere, ibimaze kugerwaho n’imbogamizi zigihari mu gucuruzanya hagati y’imiryango itatu, Tripartite Free Trade Area (TFTA), ariyo EAC, COMESA na SADC.

Perezida Kagame yavuze ko iyi ngingo ikirimo imbogamizi kuko usanga Abanyafurika bishimira gucuruzanya n’u Burayi cyangwa indi migabane kurusha ubwabo hagati yabo.

Yagize ati “Hari ubucuruzi bwinshi bukorwa hagati ya Afurika n’u Burayi n’ahandi ku Isi kuruta ubucuruzi bukorerwa muri Afurika ubwayo. Ibi ngibi bikomeza kuduteza ibibazo turimo kugarukaho ubungubu, twishimira gukorana ubucuruzi n’abandi kuruta kubukorana ubwacu. Nidukorana ubucuruzi nk’Abanyafurika ibi bibazo bizakemuka.”

Isura ya Afurika mu bidindiza ishoramari

Paul Hinks uyobora sosiyete y’ishoramari Symbion yo muri Leta Zunze Ubumwe za Amerika yakomoje ku ngingo ituma abashoramari benshi badashishikazwa no kugana Afurika kandi ari umugabane ukize, avuga ko imyumvire y’intambara, amakimbirane n’ibindi biwubamo ari bimwe mu bibakumira.

Yagize ati “Ahenshi muri Afurika hari intambara, amakimbirane n’ibindi bituma abashoramari bagira imyumvire mibi ntibashore imari.”

Perezida Museveni asanga ikibazo kiri mu bumenyi bafite, bityo akavuga ko bagakwiye kumenya ko Afurika yose atariko irimo ibibazo.

Yagize ati“Ikibazo ndakibona mu kutagira ubumenyi kuri Afurika, kuko amakuru mabi ntabwo ari muri Afurika yose, kuki batajya aho bimeze neza ngo babe ariho bakorera. Ibintu birimo kugenda bimera neza cyane.”

Kuri iyi ngingo Perezida Kagame yavuze ko imiyoborere myiza ari ingenzi mu kugena isura nziza y’ibihugu bya Afurika bityo bigakurura abashoramari.

Hari amahirwe ahishe muri Afurika

Perezida Kagame yagaragaje ko u Rwanda rwahisemo gushora imari mu gutanga serivisi, ikoranabuhanga n’ubumenyi kuko nk’igihugu kidakora ku Nyanja nta kindi cyazamura ubukungu bwacyo vuba.

Yagize ati “Ntacyo tugitegereje nta n’icyo tubuze. Dukorere hamwe, twihute maze twubake Afurika dushaka.”

Perezida Museveni yavuze ko Afurika ari ahantu heza abashoramari bayishora mu mashanyarazi, kongerera agaciro ibihingwa, amabuye y’agaciro, kongerera Abanyafurika ubumenyi, ikoranabuhanga n’ibindi.

Amafoto:Gov. Rwanda


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved