Kwamamaza

U Rwanda rwungutse abashoramari babiri bagiye kubaka inganda zikora imyenda n’inkweto

Yanditswe kuya 7-09-2016 saa 08:44' na Ezechiel Mbananabo


Muri gahunda yo gukomeza guteza imbere ibikorerwa mu Rwanda hacibwa imyenda n’inkweto bicuruzwa byarambawe bizwi nka caguwa, kuri uyu wa Kabiri Minisiteri y’Ubucuruzi n’Inganda( Minicom) yasinyanye n’abashoramari babiri amasezerano y’ubukode burambye bw’ubutaka y’imyaka itanu bagiye kubakaho inganda ebyiri zikora imyenda n’inkweto.

Ubwo butaka bungana na hegitari 2.5 buherereye mu gice cyahariwe inganda i Masoro ‘Kigali Special Economic Zone’.

Abo bashoramari ni Nsengiyumva Albert uhagarariye ikompanyi Albert Supply Ltd na Bède Bedetse, Umuyobozi Mukuru w’Ikompanyi ‘Rwantan’ izwiho gukora inkweto, imikandara n’ibindi bikoresho bikorwa mu mpu.

Minisitiri w’Ubucuruzi n’Inganda, François Kanimba washyize umukono kuri aya masezerano, yavuze ko abashoramari bagorwa no kubona ubutaka bikaba byaratumye mu ngengo y’imari y’uyu mwaka baraguze hegitari eshanu z’ubutaka zigomba guhabwa abashoramari mu gukora inkweto n’imyenda.

Yagize ati “Ubutaka bw’aha mu by’ukuri burahenda kuko metero kare igura ibihumbi 43 by’amafaranga y’u Rwanda washyira kuri hegitari bigasaba miliyoni 430. Mu by’ukuri ni amafaramga menshi cyane!Mu ngengo y’imari ya Minisiteri y’Ubucuruzi n’Inganda, guverinoma yemeye kuyashaka tukagura ubutaka kugira ngo tubuhe abashoramari bubake inganda zo gukora imyenda n’inkweto ubundi tukagirana amasezerano y’uburyo bazayishyura Leta mu myaka 20 mu rwego rwo kuborohereza mu myaka ya mbere ngo bashobore gukora.”

Nsengiyumva Albert yashimye Minisiteri y’Ubucuruzi n’Inganda ku nkunga yabateye, yizeza ko kuri uyu wa Gatatu batangira gusiza aho bazubaka uruganda ku buryo umwaka utaha ruzaba rwatangiye gukora imyenda n’inkweto nyuma yo gushora amafaranga y’u Rwanda agera kuri miliyari icumi.

Bède Bedetse uturuka mu Burundi, yagaragaje ko uruganda bagiye kubaka ruzatangira gukora umwaka utaha, aho bazajya bakora ibikoresho bitandukanye biva mu mpu nk’inkweto, imikandara n’amasakoshi, kandi ko bizaba bijyanye n’amikoro y’Abanyarwanda.

Yagize ati “Niyemeje gukora inkweto z’ubwoko bwose kugira ngo baba abantu b’amikoro, abari hagati na hagati n’abamikoro menshi buri wese agire izo yibonamo bijyanye n’amafaranga afite.”

Agaruka ku bushobozi bw’uruganda rwabo, yatangaje ko mu ntangiriro ruzaba rukora inkweto kuva ku 1000 kugera ku 3000 buri munsi.Icyakora ntiyashimye kugaragaza amafaranga bashoye kubera ko umushinga ukiri mu nyigo.

Minisititiri Kanimba yavuze ko hari n’izindi nganda zari zisanzweho zirimo UTEXRWA,C&H n’Abanyarwanda batandukanye bafite ibigo bito n’ibiciriritse bakora imyenda, ariko ko bisaba n’izindi nganda nyinshi kugira ngo ibyo gutumiza caguwa birangire.

Yagize ati “Uyu muhango w’uyu munsi uri muri gahunda yo gukurura abashoramari mu nganda zikora imyenda n’inkweto. Abakeneye gukorana na twe nibabanguke cyane kuko hari n’izindi hegitari 2.5 zisigaye zitarabona abazikoreraho.”

Aba bashoramari bagaragaje ko umubare munini w’abakozi bazakoresha ari Abanyarwanda ku buryo bizaba n’amahirwe yo kubona akazi ku batari bake.

Umushoramari Albert Nsengiyumva (uri hagati) Minisitiri w’Ubucuruzi n’Inganda, François Kanimba n'Umunyamabanga Uhoraho muri Minisiteri y’Ubucuruzi n’Inganda, Hategeka Emmanuel
Bitegereza igishushanyo mbonera cy'izo nganda
Bède Bedetse ashyira umukono ku masezerano
Minisitiri Kanimba ubwo yashyiraga umukono ku masezerano
Nsengiyumva Albert uhagarariye ikompanyi Albert Supply Ltd

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved